青蛙雙週記是青蛙仔在澳洲一份每兩星期出版一次的報章--澳洲訊報的一個專欄,為了讓澳洲地區以外的朋友可以看到青蛙雙週記, 現特此將該專欄已出版的文章再一次放在此, 讓大家可以知道青蛙仔在青蛙日記以外, 究竟還可以有什麼寫出來呢? 答案可在此中尋!       請給我電郵告訴我您的意見

14.01.2005 No.195

29.12.2004 (Wed) 晴，早上氣溫九度
最近的南亞國家大災難，多個地方的不同機構都發起賑災運動，好多人都伸出同情之手，但青蛙仔的想法比較另類，無疑他們是值得同情及需要幫助，但似乎係應該係國家的事，無論該國點貧窮都好，國家都應要負起責任去重建，拎儲備出來又好、軍費又好，甚至問其他國家借都好，都應該要攪掂佢，實在唔需要香港人或其他地方的人咁粗心，因為救援有需要幫助的人係無邊個優先的，中國及香港夠大把人需要幫手啦，自己人都未得閒救，仲有錢幫其他國家的人？咁樣講其實唔係自私，因為有需要的人唔係一兩個，根本係整個國家的事，理應國家負責，雖然幫人者都係出於自願，但青蛙仔覺得行善係平時都應該做，千祈唔好有大災難先拎錢出來，如果真係想做好心的話，其實平時都大把人等住幫手呢，況且話就話係集掖成裘，但如果唔係一次過拎一大筆出來買物資或者係其他必需品，其他人的三幾百，到底幾時先會去到災民的手上，真係無人知曉，所以唔好話青蛙仔硬心腸，真係寧願先救近火，好過將遠水傳過去，以免俾人過水濕腳，又或者途中被太陽蒸發了，不過當然青蛙仔都好欣賞肯捐錢出來的朋友，呢個係青蛙仔自己的問題吧，大家請伸出援手幫助有需要的人吧！

30.12.2004 (Thu) 晴，冷
再提番尋日青蛙仔的【偉論】，其實唔係話叫人唔好幫助南亞災民，祗係呢個世上需要幫助的人實在太多了，祗要係出了心去幫人，問心無愧，幫咩人都係一樣，都係一樣日日有人因捱餓而死亡，【世界和平】始終都祗係人們永遠的【願望】，何況係【世界大同】？更加係奢望中的奢望了。

01.01.2005 (Sat) 晴，43年來最冷的元旦
2005年第一次同大家見面, 青蛙仔在此祝大家新年進步, 身體健康, 好多謝一年到晚都來捧場的朋友, 希望青蛙雙週記能夠帶給大家一丁點娛樂, 你快樂, 青蛙仔就快樂了!

02.01.2005 (Sun) 晴，仍然寒冷
2005年的元旦真係熱鬧中帶著傷感, 有唔同團體發起遊行, 今年的焦點破例不放在董伯伯及特區政府上, 而係對亂港政客的大控訴, 相信董伯伯都還得神落, 尋日一定打少好多噴嚏, 今年的身體一定比往年更好了, 而以【大奸】為首及其他幾位所謂議員可以講得係厚顏無恥, 到底佢地知唔知自己係幾咁乞人憎呢? 而傷感方面當然就係南亞大災難, 到目前為止已經有十幾萬人傷亡, 而香港都仲有多人在災區失蹤生死未卜, 本來新年係全世界值得慶祝的時候, 卻有唔少人家園盡毀, 都唔知幾時先可以重建, 而青蛙仔見到新聞片中, 有些人更加在災區趁火打劫, 乘機周圍搜掠財物, 真係唔得佢死, 該死的人就唔死, 唔該死的人就死先, 你話天理何在呢?

03.01.2005 (Mon) 晴，氣溫稍升但仍冷
香港人做事一向行船爭解纜，樣樣野都不甘後人，最近的救災行動幾乎係全城效應，就算平時唔會做善事的人都驚俾人問捐左錢未，似乎已經係唔係出心做善事，而係人捐你唔捐就會好OUT，不過無論係點都好, 肯拎錢出來都係好事, 真係多少無拘, 不過大家真係要認清係邊個團體先係正貨, 唔好人捐你又捐, 以免被人混水摸魚欺騙了, 果班利用災民來呃呃騙騙的人, 都唔知幾時先有報應, 分分鐘長命過你, 所以大家真係要提高警覺呢!

04.01.2005 (Tue) 晴，稍暖
今日比昨日再暖少少，聽日會係【小寒】的日子，但天文台預測氣溫最高有十九度，嚴寒天氣暫時緩和，大家都舒服好多，唔知過兩星期的【大寒】同埋農曆新年會係點呢？天氣同人心一樣難測，都係自己掌握唔到的。

最近的南亞世紀大災難令更多人講【珍惜眼前人】呢句說話，因為生命無常兼脆弱，邊個會估到開開心心在享受陽光與海灘之時會被海水淹沒呢？真係配合【該死唔使病】呢句說話，但呢句話又令好多煙民用來做唔戒煙的藉口，既然要死就幾時都死得，仲點解要戒煙？所以珍唔珍惜生命真係兩睇，要自己覺悟先得，【珍惜眼前人】講就容易，大家係唔係真係做得到先？對於身邊或眼前人有無真正珍惜過呢?

05.01.2005 (Wed) 晴，稍暖
最近各界的賑災籌款真係盡心盡力，香港人的善心爆棚，好似要榨乾一分一毫與災民同甘共苦一樣，另外個個藝人都紛紛高調出來做善事，青蛙仔就以小人之心來想，平時又唔聽聞某些人樂善好施，忽然間咁落力，又話傷心又話見到都喊，到底藝人的感情係唔係真係咁豐富呢？而呢幾日有唔少藝人捐出【心愛】物品來拍賣，青蛙仔見到都覺得班藝人平時好奢侈，一隻什麼名牌限量版手表都要十萬八萬，話就話係限量版, 其實買完睇兩睇都未必鍾意, 食之無味棄之可惜, 如今就趁機會拎出來拍賣【益】歌迷, 又可以令災民受惠, 都算唔錯, 不過有兩件物品就令青蛙仔一彈一讚, 唔講唔安樂, 同是兩位運動員, 國寶【跳水王子】竟然捐出陪佢拎金牌的泳褲出來, 真係令人打冷震, 到底會唔會引來戀物狂的女/男FANS爭相競投呢? 如果無戀物狂, 若然真係投得之後又會點處置條泳褲好呢? 搵相架鑲起, 放在客廳中款客, 定係放入真空箱好呢? 真係耐人尋味! 而另一位香港【飛魚王子】就唔同, 佢就捐出佢九九年第一次贏得的全港背泳金牌, 看似一件不值錢的小小金色獎牌, 但內藏了物主多少的汗水與努力呢? 呢樣真係用錢都買唔到, 如果青蛙仔係富豪, 與其買樣樣野都係用來擺, 一定會揀呢個金牌來買, 起碼好肯定人地真係有紀念價值, 什麼靚歌衫, 出過一次show之後就有如舊報紙, 仲點會值錢呢? 佢而得有人接收, 唔好阻住佢衣櫃就真啦!

08.01.2005 (Sat) 晴，稍暖
最近【大哥】為了賑災的事情奔走，出錢出力幫手，日前又往電台呼籲，並向記者講左兩句英文精句：【where's the god？we do something wrong？】，呢個疑惑存在了青蛙仔心中已久，如果有神，點解六四可以死咁多精英人材，如果有神，點解會有戰亂，如果有神，點會有咁多無辜的愛滋受害者，如果有神，點解會有海嘯大災難，如果有神.......，實在太多太多唔可以令人信服的事，唔該唔好話俾青蛙仔知，受難者全部都係好人，所以神就提早邀請佢地上去享福，又或者神利用呢種種事件去令世人醒覺，又或者神係俾好大自由權人類，任佢地點做都唔會加以插手，祗要信就不會怕，唔係反對人信教，因為各人都會為自已心中信念而前進，如果心靈空虛就咩都做唔到，但如果太盲目無理智去信, 自己根本無付出的話, 神都幫你唔到!

31.12.2004 No.194

13.12.2004 (Mon) 晴朗, 南京大屠殺67周年
今日係南京大屠殺67周年的記念日, 事隔這麼多年, 雖然唔係個個都會記得這段歷史, 但中國人仍然會從不同的渠道得知當年日軍的暴行, 三十萬條人命足以可以形成一個小國, 但一下子就被他們殺掉了, 但我們憤怒了幾十年又如何, 難道可以期望他們作出正式的道歉及賠償? 不用了, 這樣子繼續下去, 每年都會有人提起這段歷史, 令他們覺得羞恥, 令他們知道他們曾經做過令全世界人不恥的行為, 無論他們怎樣進步, 怎樣有禮儀都難以掩蓋一切暴行, 世世代代都欠中國人一個公道!

最近長腿女歌手【伊蚊】話要錄國語唱片, 所以請了專人指導普通話, 本來好學不倦係幾好的優點, 不過唔知佢係為了宣傳定係另有原因, 話學普通話好難, 祗係學講一個【神】字都講了五六小時都講得唔正, 所以就話普通話好難學, 不過青蛙仔覺得個【神】字用普通話講出來係有少少難度, 但都不致於話一粒字都要講五六個鐘掛, 到底真係難, 定係有人好蠢呢?

14.12.2004 (Tue) 晴朗
今朝睇娛樂版得知地鐵搵錢真係層出不窮, 點解會係娛樂版? 因為有汽水商搵了人氣女歌手, 配合舖天蓋地的宣傳聖誕新歌【自蛙華】, 所以塞錢入地鐵袋, 買了兩站的【聲音】, 即係話在聖誕期間, 大家搭地鐵之時, 在金鐘與尖沙咀之間聽到【下一站係金鐘】的聲音, 將會係人氣女歌手把聲, 而唔係地鐵車長的聲音, 呢一招真係高招, 宣傳公司咁都諗得到, 真係令人寫個服字, 呢條先例一開, 地鐵公司真係財源滾滾來, 話唔定將來每一個站都由唔同歌手報站, 可能有fans會專登搭多幾個站來聽下偶像把聲都未定, 哈!

15.12.2004 (Wed) 晴朗
午飯時間食飯盒之時, 看到墊飯盒的報紙上有招聘廣告, 快在香港開幕的主題公園請人, 有唔少職位空缺, 當中包括了園丁雜務員, 祗要對園務有所認識就可以應徵, 似乎學歷要求不必太高, 不過青蛙仔搵勻段廣告都無地址及查詢電話之類, 但入有一句【請進入http://www......com, 本公司網頁登記應徵, 青蛙仔睇到覺得佢地真係好勁, 雖然係請園丁雜務, 學歷不拘, 不過首先起碼要識得上網先可以有機會投身主題公園, 否則就真係無得傾, 到底會唔會咁易請到人, 又會唔會因此而請唔到一些真係對園務有工作經驗的人呢?

17.12.2004 (Fri) 晴朗
【心神】事件中，祗係一個【大奸】就攪到政府團團轉，幾十萬市民的幾十億被玩弄於股掌間，有如【王三日】的騙術電影劇情橋段，祗因自己無份做顧問就可以度出條【公報私仇】橋，他的賤格行為，比起自編自導自演的封咪事件有過之而無不及，相信連屎尿屁導演都要向佢寫個服字，不過今次事件已令佢盡失民心，連投過佢票的人都後悔，因為今次可算係恩將仇報，因為有好多投票者都有入股【心神】準備賺少少零用，如今俾佢攪一攪可能見財化水，你話唔嬲就假了，據聞有網民仲發起一月一日【倒大奸】大遊行，素來唔會參與遊行的青蛙仔都有少少衝動去參加，睇佢成日聲大大反人反得咁過癮，今次做正主角都算出盡鋒頭了。

21.12.2004 (Tue) 晴朗，是日冬至
今日係馬鐵正式通車的日子, 對於青蛙仔來講, 真係事不關己, 因為相信好日都唔會入馬鞍山, 即係好少機會搭馬鐵, 不過見到新聞片的乘客在搶搭頭班車都幾好笑, 大多數都係年輕人, 可能係得閒無事做, 又或者係火車迷, 一開放之後就爭住衝線霸頭位, 熱鬧又有趣, 鐵路公司應該會幾開心有一班支持者, 兼且可以幫佢地宣傳做新聞, 其實香港的交通網越來越完善, 如果票價再相宜一點, 令香港人更受惠就好了!

22.12.2004 (Wed) 晴朗
今朝打開份娛樂版真係笑到反轉, 見到一位新晉女影星【採耳】出庭應訊藏毒事件, 竟然著到純情女學生咁款, 白恤衫配灰色長袖冷衫, 再加深黑長裙, 明顯係有人教佢如此穿著, 好讓裁判官對佢印象加分, 其實娛樂圈污煙瘴氣就係人都知, 但寧俾人知莫俾人見, 既然俾人捉到痛腳就梗係要補番隻鑊, 做場好戲俾人睇下, 戲子即是戲子, 睇來【採耳】真係好有潛質拎演戲的獎項, 加埋佢位資深大律師, 相信好有機會判得好輕, 到時認句錯又重新來過, 又多人認識, 【王三日】的新片可能加重佢戲份捧佢上位都未定呢!

25-26.12.2004 (Sat-Sun) 晴朗，聖誕假期
相信聖誕新年期間一定會掀起【功夫】熱, 青蛙仔有兩位朋友在昨晚已經率先睇了優先場, 其中一位仲話套戲有一百分, 真係好睇得咁緊要? 哈! 不過兩位都話今次星爺的戲份較少, 俾了好多機會其他人, 可能因為兼顧埋導演一職, 戲份少了都係理所當然, 青蛙仔在網上睇過呢套戲在聖誕假期的夜場都爆得八八九九, 果然係萬眾期待, 好在天水圍的戲院仍然仲有唔少吉位, 於是就約了舊同事在聖誕正日睇, 外國人投資的電影果然係與別不同, 片頭雖然係熟口熟面的立體製作, 但仍極有氣勢, 配樂方面用了多首中國音樂配以西方先進技術, 令年輕人可以接觸中樂, 原來中樂可以這樣好聽, 實在應記一功, 另一方面, 青蛙仔驚歎我國的人材濟濟, 要幾多有幾多, 隨隨便便都可以在片中找到奇人異士, 中國功夫的各門各派多不勝數, 片中祗係介紹數種功夫讓大家認識, 加上大量特技已令觀眾歎為觀止, 雖然袁和平先生的動作設計已離不開Matrix的框框, 但放在元華、元秋、梁小龍及星爺身上的化學作用又有別一番攪作, 整體來說, 【功夫】並不是一部笑片, 而是一部特技卡通功夫片, 三年凡期待總算沒令人失望, 題外話是元秋女士被翻出歷史背景, 除了是元家班的師姐之外, 在廿多年前已經與占士邦【羅渣摩亞】合作過【鐵金剛大戰金槍客】, 成為中國邦女郎的鼻祖, 青蛙仔看舊劇照與現在相比, 元秋女士都沒有兩樣, 證明外省人得天獨厚, 面容保養極佳呢!

17.12.2004 No.193

02.12.2004 (Thu) 晴朗, 和暖
相信好多人都估唔到黃霑先生的喪禮會戲劇化地在昨日迅速完成了, 青蛙仔睇見劉德華接受訪問時真係講得好, 佢話唔覺得意外, 因為係朋友就會知道呢個安排, 你唔知就唔奇, 因為你唔係佢朋友, 所以你就唔知, 無錯, 可能黃霑先生知道自己時日無多的時候, 一早已經交帶好家人要點辦他的身後事, 佢唔想打攪人, 唔想愁雲慘霧令人傷心, 亦唔想人浪費不必要的金錢, 確實係非常豁達, 加上他的家人更加唔想有人藉他的名義來沽名釣譽, 攪什麼籌款、成立基金之類, 因此早早就通知傳媒發況消息, 暫時唔會有關此類行動, 要有都係佢地親屬自己攪, 唔該那些佢佢過橋的人行開一面, 更加令人佩服, 雖然今次好多朋友都覺得錯過了他的喪禮好唔抵, 但一切都係佢自己意願, 大家亦應該學習豁達一點吧, 不過青蛙仔老爸就有個想法, 今次黃先生這樣的安排, 一定唔受攪殯儀同埋整花圈的歡迎, 因為本來佢地可能以為會有一筆額外的龐大收入, 如今真係見財化水了!

03.12.2004 (Fri) 晴朗，仍然溫暖
早前提及三色台的兒童節目將會大改革，老臣子【譚姐姐】竟然被飛出局，但最近情況有變動，三色台終於決定留低【譚姐姐】以平息【民憤】，【譚姐姐】似乎真係深得民心，贏了漂亮的一杖，不過青蛙仔認為大家都唔好開心得太快，因為大公司始終都有其原則，而且總係會冷酷無情，權宜之計就係暫時留住她，但好有可能將她變為閒角，可有可無般投閒置散，假以時日，觀眾係貪新忘舊與善忘的，好快就一樣會被淡出，當然呢個係一個假設，未到新節目出街都唔知會點，個人認為如果到時真係咁殘忍的話，反正佢都搵埋唔少，不如轟轟烈烈的自行宣佈唔玩，永留青史仲好過了。

05.12.2004 (Sun) 晴朗，國際義工日
食過早餐之後就歎下報紙, 睇下尋晚金馬獎的賽果, 華仔努力了多年之後, 終於憑【終極無間】修成正果, 相信好多人都會替他心, 雖然青蛙仔唔係佢fans, 但覺得佢一向都勤力如他的生肖, 無理由【天濛光】可以得但佢唔得掛, 今次總算吐氣揚眉, 青蛙仔都覺得佢應得的, 至於吳彥祖憑【新警察故事】奪得最佳男配角, 除左證明佢唔係靠靚仔之外, 陳木勝導演同大哥肯俾呢個機會佢嘗試, 確係幫左佢唔少, 其實【新警察故事】係大哥翻身之作, 能夠在本屆金馬獎獲得最多獎項, 亦係實至名歸, 而【2046】祗係得兩個獎, 一點也不出奇, 而美術設計同電影配樂正正就係這部電影吸引觀眾之處, 睇來王家衛係時候要好好反思一下了!

下午電視現場直播緊黃霑先生的追思會, 每位朋友都準備了悼詞, 當然每一位都對他的生平讚口不絕, 人都已離開了, 相信就祗有【林姑娘】一位係對他痛恨及說他的不是, 但就如【白姐姐】所說, 呢個時候講呢種說話, 實在太不聰明, 不過清官難審家庭事, 當年的恩恩怨怨就祗有當事人才會明白了, 而青蛙仔祗係覺得奇怪, 香港人真係喜歡湊熱鬧同埋貪小便宜, 雖然黃霑先生的作品為大家所熟悉, 他的朋友相識亦滿天下, 但到底入場的【觀眾】目的何在呢? 真係想向他致敬或追思? 還是想看明星? 在新聞片中看見不守秩序【搶掠】場刊而令工作人員受傷的人, 不知他們覺不覺得羞恥, 搶了追思會的場刊放在家中, 會否恭恭敬敬還是用來墊煲底呢? 最令青蛙仔深刻的是有些出席的朋友都在悼詞上呼籲大家戒煙, 煙的禍害相信唔使解釋大家都知道, 就係唔明點解咁多人仍然都會吸食, 希望今次之後會多了人戒煙吧!

07.12.2004 (Tue) 晴朗，清涼
今日的娛樂頭版係【大哥】拍戲墮馬受傷的消息，可能呢部古裝片【驚天傳奇】一直都在內地拍攝，所以新聞唔算多，甚至好多人都唔知佢拍緊、或者部戲講乜，所以唔多唔少都要有點【消息】傳出來宣傳下，但無論係少少傷都作大，定係真受傷，作為影迷朋友都總係會擔心，希望【大哥】可以繼續順順利利完成，到時大家又有好戲睇了。而娛樂版的題外話係【大哥】的【新警察故事】DVD附送的拍攝花絮竟然有【大哥】爆粗的片段，原來係唔應該出街的，青蛙仔其實都有留意，心裡仲奇怪點解唔剪掉先出街，原來真係有問題產品，而家要全面回收，再剪輯過先出得街，估唔到青蛙仔第一時間買呢套DVD都有點好處，即係話呢套有【大哥】爆粗片段的拍攝花絮更加值得珍藏，真係多多錢都唔賣，哈！

09.12.2004 (Thu) 晴朗，清涼
相信大家都有留意到, 深圳的地下鐵路在本月廿七日就通車了, 其實青蛙仔都幾背, 一直都唔知深圳在建設地下鐵路, 到而家起好先知而家內地有咁宏偉的建設, 而且收費都唔算貴, 仲有機會可以使用八達通, 相信到時真係方便好多港客, 半個鐘就可以去到香蜜湖及世界之窗, 比起而家真係方便好多, 一來唔使搭旅遊巴, 二來又唔驚路上被人敲腳骨, 肯定會安全好多, 青蛙仔一向無回鄉證, 可以講得係有點偏見, 如果未來的內地再發展得好的話, 相信真係可以放下誠見, 有機會上去行一轉都唔定!

11.12.2004 (Sat) 晴朗，清涼
發展商決定【順應民意】唔拆【紅蕃半島】, 並研究將三幢樓宇改裝, 雖然可能賺少幾十億, 但兩個集團為免影響社會的穩定及和諧, 以【尊重法治, 包容民意】來做主題, 贏取更佳形象, 相信唔係話用錢可以買得來的, 今次決定對一般市民來講, 可能唔覺得事情有幾大的好處, 因為無論拆與唔拆, 如果唔會有份入住其中的單位, 就係所謂事不關己, 己不勞心, 如果唔係住附近, 話之佢拆定唔拆啦, 但對愛護地球的環保人士來講, 確實係一個喜訊, 千萬噸的廢物, 肯定會令地球減壽, 今次市民真真正正贏了漂亮一杖, 令今次事件唔可以列入世界記錄大全, 大家都唔會覺得可惜吧? 哈! 不過青蛙仔又想, 那些食飽飯無事做等示威的無聊人, 今次一定好無癮, 又要唔知搵邊樣野來反對好了!

03.12.2004 No.192

15.11.2004 (Mon) 晴，轉涼
今朝有同事帶了盒香港名牌【某某齋】的原粒杏仁餅回來請大家食，本來青蛙仔興趣不大，但知道要八十蚊一盒之後，真係人一世物一世，幾大都試番件，不過試完之後又覺得不外如是, 同普通澳門買回來, 十零廿蚊盒差唔多, 祗是比較硬, 但沒有那麼乾, 內裡亦真係有些杏仁粒, 味道比較真, 沒有太假的杏仁味, 但如果八十蚊值唔值, 真係見仁見智, 青蛙仔寧願用呢個價錢買盒大曲奇餅仲好食, 哈! 大家又鍾唔鍾意食杏仁餅呢?

17.11.2004 (Wed) 晴，清涼
睇報紙得知尋日有位失明老翁被騙, 辛辛苦苦儲埋的幾萬元被兩個無良女子偷光了, 一生坎坷的失明老翁, 十二年前喪偶, 可幸認識了一位茶樓點心女工, 投緣之下結誼為父女, 契女一直都在照顧他, 後來卻因病逝世, 失明老翁一直渴望會有另一位契女可以繼續照顧他, 而近來因為銀行無息兼且提存唔方便, 所以一次過將幾萬元積蓄及平時的綜援金提出來放在家, 卻被兩名女子睇中, 假意噓寒問暖, 又話要認佢做契爺, 結果失明翁引了兩條大蛇入屋, 將幾萬元偷走了, 可憐失明翁連兩人的樣貌都唔清楚, 就將畢生積蓄失掉了, 祗怪自己太過信人, 以為人地真係會照顧自己, 青蛙仔真係覺得奇怪, 連銀行咁穩陣都唔信, 要將所有錢提出來放在家, 卻相信陌生人的幾句說話, 孤獨是否真的這樣可怕?老來之時一定要找人依附, 呢兩個女仔呃了人地的辛苦錢有無報應真係要天先知, 會唔會又係關因果一說呢? 係阿伯前世對佢地唔住, 抑或要到下世先報應呢?

18.11.2004 (Thu) 晴，清涼
本來已經無興趣再提果位年輕二打六藝人【Forever】，但呢兩日真係恭喜佢，繼剛剛因藏毒交完感化報告之後，又因醉酒鬧事再見報，仲向傳媒say sorry解釋話以前未試過飲酒，所以一飲就醉，仲話以後唔會唔飲，更加要學好酒量，以應付將來出席中國人的場合云云，青蛙仔睇完真係覺得好笑, 之前未試過飲酒係唔係大話真係唔敢講, 祗係口話口賠, 但真係唔明點點解要學好酒量先可以出席中國人的場合, 講句野都幼稚過人, 二打六即係二打六, 唔該佢睇一睇幾多天王級的紅人, 大多都係滴酒不沾唇的, 原來做一個成功藝人唔係先要學好唱歌做戲之類, 反而係先要學好酒量, 真係服得佢緊要!

20.11.2004 (Sat) 陽光普照
尋晚打完日記之後就專心睇台慶節目, 今日想講下少少感受, 三色台一向係大台, 人力物力都足夠, 樣樣野都高科技現代化, 但就迷信到不得了, 逢有四字同七字都唔提, 可能大家都以為係38周年台慶, 其實佢地一直都強調係邁進38年, 即係37周年, 青蛙仔在想, 唔知去到40周年之時, 佢地會出咩招數去應付十年都係四字的數字呢?其實整晚的節目都唔算太精彩, 但齊心合力的感覺係幾令人感動, 除了一些重要人物可以睇清楚樣貌之外, 大部份參與演出的藝員都係曇花一現, 字幕雖然有打出演出者, 但要搵佢地出來真係唔易, 不過全部都勝在夠落力, 那計較祗係鏡頭掃到佢一兩秒, 總之做掂自己就可以了, 不過以青蛙仔所見, 【虧佬小生】的表現真係麻麻地, 繩中舞的演出真係好牽強, 比起同佢一齊演出的華埠小姐真係差得遠, 人地好快已經做齊所有動作, 包括空中一字馬, 但【虧佬小生】就好似出盡九牛二虎先做得來, 不能拍劇太令佢身心疲累了, 到佢得獎的時候, 又因為兩位主持人發台瘟, 令到佢不知所措, 雖然唔關佢事, 不過都係覺得佢太唔識執生了!

至於最多話題的男女主角獎項, 青蛙仔一向唔覺得【戙篤華】有幾好, 所以佢得唔到男主角獎亦唔覺得有咩問題, 祗係覺得佢扮大方得來又有點不屑, 講真連【禿頭小生】都拎唔到, 又幾時輪到佢丫, 而當【雯女】拎左個實力獎之後, 大家都知道女主角獎唔會屬於佢啦, 結果由【愛美神】勝出, 有人快活有人愁, 快活的當然係青蛙仔啦, 因為其實一直都覺得【愛美神】好掂, 祗係欠缺一點機會, 今次忽然跑出, 青蛙仔估計係因為三色台想留住佢拍多幾套劇, 話曬【雯女】都無可能出外拍電影, 屬於走唔甩果種, 而【愛美神】就隨時可以出外拍劇拍電影, 而令外兩位勢成水火的【金豬】女主, 一位就舊年己經威過, 又北上了拍劇, 另一位【嗲精】根本就未夠班, 所以獎項落在觀眾緣較好的【愛美神】手上, 相信最合情合理, 而事實上尋晚佢真係神采飛揚, 算係咁多年來見佢最靚的一晚, 出道十八年並唔代表佢年紀大, 現在的成熟美真係剛剛好, 再努力多兩三年, 相信佢仲有排得獎, 其實總係覺得應該會有唱片公司食住條水, 幫佢出番隻新曲加精選唱片, 肯定會有銷路!

24.11.2004 (Wed) 晴
今早在網上看到了黃霑先生逝世的消息, 有點突然, 亦有點失落, 一直都沒有估計過他的年歲, 原來祗是64歲, 忽然覺得很可惜, 應該還有不少事情可以做呢! 相信在這幾天之內, 大家都會從不同的途徑看到霑叔的生平及欣賞到他的作品, 確實他是一代鬼才, 他的作品, 無論是廣告、小說、散文、不文笑話, 以及歌曲, 都陪伴了香港人數十年, 還記得廿幾年前的【不文集】瘋靡全港, 不停再版幾十次, 每出一版新版, 封面都會用上不同顏色, 當時沒有用電腦排版, 印刷的顏色竟然不夠用, 衛道之士一邊看一邊罵, 但仍然阻止不了銷量, 成為一時佳話。

當然, 他的歌曲最令人難忘, 與顧家煇先生合作的電視劇主題曲天下無敵, 紅了不歌星, 最近青蛙仔提及的懷舊精選碟【家傳戶曉】的歌曲, 大部份都是他的作品, 首首令人難忘, 根本不必刻意數出來, 但其實青蛙仔更欣賞他一手包辦曲詞的歌曲, 例如當年的【舊夢不須記】, 唱紅了當時根本歌藝不精的雷安娜, 一直到如今廿幾年都令上年紀的人士記得她, 又例如深受歌星喜愛的【明星】及【問我】, 通常都會在演唱會當正自己歌來唱, 其實兩首都係由【陳麗斯】女士原唱, 相信已經唔係咁多人記得佢了, 不過眾多首霑叔作品之中, 青蛙仔其實幾鍾情一首不算太流行的【我是痴情無限】, 當年由【關菊英】女士原唱, 青蛙仔去卡拉ＯＫ之時, 亦偶然會點來唱, 而最近張偉文亦在演唱會上重唱過, 令青蛙仔欣喜非常, 其實霑叔的佳作眾多, 亦不必由青蛙仔來再三擦鞋, 較為特別的要數【滄海一聲笑】, 一首五音階的歌曲, Do Re Mi Fa So La Ti 之中, 祗係用了Do Re Mi So La五個音就可以作得如此出神入化, 相信唔少作曲家都會佩服, 就像是專為金庸先生所度身訂造的【笑傲江湖】曲, 其實霑叔的作品亦曾經為青蛙仔參加歌唱比賽帶來唔少獎頂, 樂壇又少了一位奇才, 確實令人黯然, 人長大了, 總係要面對生老病死, 又有多少人可以像他一般豁達呢?

27.11.2004 (Sat) 晴，清涼
晚上看電視台為黃霑先生製作的記念特輯, 手上又拿著一本以他做封面的記念雜誌, 雖然不認識他, 但他好像是每一位香港人的朋友一樣, 因為每人都會或多或少接觸過他的作品, 甚至隨口哼過他所作的歌, 所以他離大家而去, 總係覺得來得太快, 太可惜了, 短短兩小時的特輯, 祗是唱出了十來首他的歌, 並不能代表他的全部, 可能大家會說【晚風】呢? 【勇敢的中國人】呢? 【家變】呢? 【世間始終你好】呢? 甚至發哥的【大丈夫日記】呢? 還有全國流行的【我的中國心】等等, 都是他的心血, 我們的瑰寶, 看著, 聽著, 忽然也跟隨著感性的嘉實一同落淚了........

19.11.2004 No.191

31.10.2004 (Sun) 晴朗，萬聖節快樂
睇報紙得知台灣著名作曲家梁弘志先生因胰臟癌逝世, 享年祗係四十九歲, 總係覺得有點可惜, 因為梁先生自八十年代開始已創作了唔少令人難忘的校園民歌, 歌曲可以講紅遍中港台, 好多歌星都係因為唱他的歌而成名或者大豐收, 大家可能一時唔梁弘志係邊位, 但如果話【怡似你的溫柔】就係佢作品, 大家一定認同呢首係好歌, 仲有每年中秋都會陪思親的【但願人長久】, 沙麗的【祝福】, 譚校長的【半夢半醒】都係梁先生所作曲, 他的逝世確實是樂壇的損失, 相信唔少都手都會因此而悲痛!

01.11.2004 (Mon) 晴朗
尋日係【長髮議員】的辦事處開幕的日子，議員同僚都禮貌地祝賀，並送上賀禮，但賀禮及賀詞都語帶相關，或者係有含意地潤他一潤，希望佢可以在開會時生生性性，當然佢都唔係省油燈，自然識得點回應，不過都係好平和的針鋒相對，不過最攪笑就係有人抬紙棺材同花圈來敬賀，真係風水輪流轉，佢都抬得多棺材送俾人，今次自己都收番次，終於都嚐下收花圈的滋味，感受到受禮者係幾咁【高興】，結果他的支持者忍唔住同送禮的人發生衝突，足以證明【修養】唔係咁易練出來，董伯伯的功力，佢拍馬都追唔上啦！

08.11.2004 (Mon) 晴
相信大家行過文化中心海傍都會見到有好多攝影檔在替遊人留下美好回憶, 記得幾年前未流行數碼相機之時, 祗係得三幾檔領正牌在做生意, 夜景照片拍出來放在燈箱上, 零舍悅目賞心, 青蛙仔亦曾經幫襯過, 檔主事後亦電租郵了照片檔給青蛙仔, 算係幾有交帶, 隨著數碼相機的流行, 加上肥田耕開多人爭, 幾年後的今日, 文化中心海傍的攝影檔多不勝數, 頂爛市爭生意都係為求搵兩餐, 但到今日青蛙仔先知道, 原來隨著藝墟的結束, 攝影檔的牌照亦於本件六月完結了, 即係話, 全部的檔口都係無牌經營, 好話唔好聽, 食環署係可以當佢地小販搬拉鎖, 但可能因為習慣成自然, 加上寬限期, 所以都盡量隻眼開隻眼蔽, 得閒先係咁意驅趕下, 到底官惡定民惡, 大家心中有數啦, 不過青蛙仔覺得, 本來祗係聊聊數檔就唔太影響, 但多到成行成市的話, 就會被霸佔了唔少有行位置, 普通人想在欄杆附近行近一點欣賞景色都會唔好意思, 但地方又唔係佢地的, 你話幾無癮呢, 但如果唔俾佢地擺檔, 又會多了一班人失業, 真係兩難!

09.11.2004 (Tue) 晴
今朝睇娛樂版話三色台在上星期限量推出發售的三千套【金豬六碟】套裝DVD經已售磬，因為有無良奸商將$580一套炒高至千幾蚊，為免觀眾失望與損失，所以加推最後二千套出來應市云云，青蛙仔睇完覺得好好笑，到底【金豬】係唔係好睇得咁緊要，剛剛免費有得睇完仲要俾幾百甚至千幾去買來睇？雖然套裝係有藝員簽名相、手絹同香囊贈送，但係是否幾千人都拎得出來呢？所以話唔可以盡信報紙，因為青蛙仔尋日去買DVD之時仲見到有【金豬】賣，多口問句店員點解仲未斷市，對方回答話造個勢姐，呢度仲有得賣，可想而知根本唔係果回事，祗係想捉緊香港人唔執輸的心態，人買我又買，買左都唔知為乜，而青蛙仔覺得呢套套裝祗係附送仿製【爾淳的香囊】同埋【安茜的手絹】(大家終於都知道個【茜】字係讀【善】字音，而唔係讀【西】了，哈！)係未夠睇頭，如果可以附送埋【玉瑩小主】在戲中著過的肚兜先夠份量，起碼咁樣，青蛙仔都會考慮擁有一套，哈！

10.11.2004 (Wed) 晴, 氣溫稍升
最近政府有意對再犯的垃圾蟲加重刑罰, 在兩年內重犯的垃圾蟲, 除了罰超過千五蚊之外, 仲考慮要判佢行社會服務令, 青蛙仔真係舉腳贊成, 但唔知點解會有人覺得有問題, 話刑罰太重, 其實佢地點解要幫呢一班咁自私的人呢? 為垃圾蟲爭取權益? 咩議員來架? 投佢票的人都覺得丟架, 青蛙仔唔記得邊位政府發言人提及, 在茫茫人海之中捉到佢掉垃圾, 一次罰過佢之後, 下次又咁橋俾人發現再捉, 真係抵罰啦, 但有議6員又話, 兩年時間太長, 半年就差唔多, 即係話, 要人守兩年規矩會好難, 都唔知係咩道理, 良好市民唔係應該一生一世都奉公守法咩? 打家劫舍的人, 一世都有案底, 再犯事的話, 法官都會睇佢有無前科而判罪, 再犯的垃圾蟲點解唔可以加重刑罰呢? 青蛙仔覺得應該似內地的刑罰, 將果D再犯兼打執法人員的人渣掛牌遊街示眾就最好添呀!

11.11.2004 (Thu) 晴，再度溫暖
最近【章小姐】的【處女】電影上畫，引來唔少迴響，好多人聽見佢個名就怕怕，話之位導演係著名藝術家，總之偏見就係抹煞了一切，所以票房慘淡，青蛙仔在十多年前與【章小姐】有數面之緣，覺得佢對人都幾友善，至於佢本身的人品係點，因為無加以了解及證實，唔敢太武斷，所以一直都對佢無惡敢，祗係覺得她用了自己最大的本錢去生存吧，至於其他人點解咁憎佢，佢又得罪了他們些什麼就不得而知了，電影真係好殘酷與現實，好反映主角的受歡迎程度，垃圾笑片祗要係【大笑姑婆】或者係佢【緋聞男友】主演就閒閒地收過千萬，明明係誠意製作，但主角唔討好的話，就會慘淡收場，其實唔緊要，因為市場係明買明賣，各有需求，你唔鍾意可以唔睇，但偏偏就會有人就唔俾錢入戲院卻一邊睇盜版一邊鬧，好似【章小姐】的新戲，有些人提起都好似侮辱左佢全家咁，但偏偏可能又會在網上睇盜版，目的係想睇下佢點衰法、到底有無整大對波，青蛙仔覺得好睇唔起呢類人，如果真係唔鍾意就睇都唔好睇啦，又要忍唔住好奇去睇，真係仲衰過叫雞唔俾錢兼趙完唱，至於青蛙仔仲未有心理準備去睇呢位朋友露兩點，但總覺得呢位導演的戲唔會太差，也許留待出VCD之時再睇吧!

14.11.2004 (Sun) 陽光普照
今朝睇娛樂版報導, 三色台將會改革兒童節目, 主持人會被卡通公仔人物取代, 以配合將來的發展, 好使資源調配得更好, 亦更加有利可圖, 因此當了廿年的超級元老【譚姐姐】將會被飛出局, 電視台的現實與無情, 真係令人歎息, 因為【譚姐姐】真係一個品牌, 見到佢就知道三色台的兒童節目, 雖然佢做了咁多年, 收到都算豐厚, 報導仲話佢有隱形富婆之稱, 置了多間物業無人知, 但其實都祗係幾萬蚊一個月收入, 青蛙仔覺得佢物有所值, 做了廿年先有呢種報酬, 絕對唔過態, 記者訪問佢若然真的被飛出局之後, 有咩打算, 會否嫁人, 對方祗係話會繼續進修, 不過因為見慣太多離離合合, 反而唔會有結婚的衝動, 做到老學到老之中又帶點看破世情, 確實令人佩服!

05.11.2004 No.190

17.10.2004 (Sun) 晴朗, 國際消滅貧窮日
今日係國際消滅貧窮日, 其實唔知道貧窮係如何定義, 因為好多人住洋樓養番狗都一樣可以話自己窮, 有好多人就真係連三餐都保唔住, 在內地落來之後, 唔領綜援, 一家幾口逼在細小的房間內住, 一個人搵錢幾個人使, 小朋友連去食餐老麥都係奢望, 所以有時共產都唔係唔好, 起碼人人有飯食, 但國家又會因為太保守而唔可以富裕起來, 到底點先可以滅貧, 點先可以幫到有需要的人, 真係好難的!

18.10.2004 (Mon) 晴朗
今日係羅文先生逝世兩周年的日子, 電視的娛樂節目播了幾分鐘的記念特輯, 祗係短短幾分鐘, 都特別令人懷念, 每播一首歌, 青蛙仔都懂得跟住唱, 看著片段, 難免令人鼻酸, 畢竟他的歌聲都陪伴了青蛙仔好多年, 雖然與他不認識都也像好朋友一樣, 試想一下, 會有哪位朋友可以令自己感動得會哭會笑, 他的歌聲就可以做得到, 學唱他的歌亦令青蛙仔得到唔少榮譽, 沒有他, 青蛙仔所獲得的獎項會少了一半以上, 隨著時間的流逝, 相信他亦漸漸會被人遺忘, 但青蛙仔好想老土的講一句：【永遠懷念你！】

20.10.2004 (Wed) 晴朗，世界骨質疏鬆日
今日係世界骨質疏鬆日，係提醒大家注意骨骼健康的日子，相每一個人都會或多或少試過骨痛的時候, 骨骼健康對一個人真係好重要, 但又偏偏好多人都唔在意, 偶然痛下, 打波整親或者平時唔覺意撞到都唔會刻意理會, 最多真係好痛之時先會係咁意捽下就算, 其實後生就當然可以咁樣, 但到了年紀大就會有好多問題出現, 因為無論男女, 年紀越大, 鈣質就會保唔住, 真係應該好似賣奶類產品廣告般, 由後生就要keep住身體的鈣, 到老就可以減少骨病的機會, 青蛙仔自細體弱, 小學時已經要打補針, 食鈣水過活, 但牙齒仍然都唔能夠好健康地生長, 確實係一種憾事, 而成長之後雖然已經唔使靠補藥過活, 但仍然會每日一奶做早餐, 廿年如一日, 近幾年更加係高鈣低脂奶, 可能好多人覺得幾廿年都係食同樣的早餐會好悶, 但青蛙他又真係唔覺, 都係飽肚野姐, 有得食, 唔好要求太高了!

21.10.2004 (Thu) 晴朗
報紙報導一宗法庭新聞，有一年輕人因藏有搖頭丸而候判，竟然穿著一件印有英文係【可加因】字樣的T恤上庭，裁判官見到都指責佢仲係對毒品咁推崇，但都無對佢加重刑罰，祗係罰款了事，其實青蛙仔覺得而家好多年輕人著有字的衫都係不求甚解，祗要有型就著上身，根本唔會解會身上的字或者圖樣係點解，話之佢係粗鄙字又好、涉及性愛又好，甚至係大麻葉圖樣佢地都未必知道, 不過有次見到一個年輕人身上的名牌運動T-恤印住一個又長又深的英文字, 青蛙仔問佢知唔知點解, 佢竟然答得出, 都算佢幾叻仔, 唔知大家有無著過一件自己都唔知點解的文字衫呢?

23.10.2004 (Sat) 晴朗
今朝打開份報紙真係嚇一驚, 除了最觸目的小巴片車災難死了兩個人之外, 仲有大嶼山青嶼幹線七人車狂撞, 妻死夫危殆, 又有建築材料東主, 因為操控吊臂時慘遭突然折斷的吊臂壓下致死, 又有老翁推輪椅送老妻洗腎而被鹵莽的小巴司機狂撞, 又有一輛滿載水喉鐵及工具的客貨車撞斷燈柱, 碎片濺傷途人, 更有過百宗山火報告, 有幾十人被困山頭, 幾乎重演八仙嶺大火事件, 嘩, 原來呢個重陽假期發生咁多事, 但其實大部份意外都係屬於人為性質, 祗要司機安全駕駛就唔會有事, 使用吊腎唔超重又可以逃過大難, 甚至掃墓人士小心火種, 根本就唔需要大逃亡, 報紙就會空出好多框框來了, 點解偏偏每日都會有人做出不當的行為來令到他人受傷害, 到底是緣還是債呢?

25.10.2004 (Mon) 晴朗
今朝睇方向報的娛樂版真係令人氣憤，【跳水王子】終於落實以千三萬簽約【楊先生】旗下，因為【跳水王子】話好想同【大哥】合作，於是記者就訪問【大哥】，【大哥】就好老實話佢係國寶，同佢合作當然榮幸，但未知可以拍邊類片種，所以唔可以草率，其實好希望佢贏埋08奧運先再投身，本來真係幾普通的回答，但標題就被寫成【大哥潑冷水】，真係好離奇，如果【跳水王子】的fans唔睇內文齋睇標題，又會以為大哥係唔抵得人而亂講野，對大哥又會加深成見，到底娛樂版的編輯居心何在呢？煽風點火希望有戲好睇，可能之後又再訪問入世未深的【跳水王子】點回應，沒完沒了又可以霸幾日頭版唔使諗新稿，真討厭！

26.10.2004 (Tue) 晴朗
尋日尖沙咀的警匪戰真係似電影情節，今次警方收到線報部署好麻鷹捉雞仔，在毫無傷亡下大獲全勝，拘捕數名涉案疑犯，雖然係值得高興的事，但因為案件發生在日間的尖沙咀鬧市，警方曾經開了兩槍，於是有市民就質疑警方有無做錯，青蛙仔覺得真係兩難，又要掛住市民安危，又要捉賊，你估差人唔使搵命搏？遇著班悍匪膽正命平，佢地會唔會理你死活先？如果差人唔先發制人，後果有幾嚴重無人知，而家捉到人又無傷亡，讚賞都無句，仲係要質疑警方有無關注市民安危，真係好唔應該，點解唔可以多點體諒，多點鼓勵呢？

30.10.2004 (Sat) 晴朗
美國總統選舉在即，傳媒都在積極報導，雖然無論那一方勝出都會對中國及香港有不同的影響，但青蛙仔覺得，既然都唔可以左右選情，亦唔到其他國家的人話事，都唔使太緊張啦，日日報導什麼民意調查，最新比率又如何？最終都係確實選票先實際，所以青蛙仔真係少理選情，到底香港的平民百姓有邊個會理會阿布定阿克贏呢？澳洲的移民又會否關心呢？青蛙雙週記出街之時，新總統經已選定，是你心目中的人選嗎？

22.10.2004 No.189

02.10.2004 (Sat) 晴，轉涼
相信好多人都對【異靈細路】充滿期望, 拍了咁年時間, 用了咁多粒巨星, 到底可以有咩俾大家睇, 青蛙仔都係以同樣心情, 打醒十二分精神去睇, 不過睇完之後就係有點茫然, 又唔係失望, 又唔係唔好, 祗係覺得如果以香港的版本來講, 使唔使拍咁耐呀? 一年兩年都夠啦, 三年都仲唔夠, 要拍五年? 為的是要等章小姐出世? 係都要等到佢先適合個女主角? 而且真係好替張震不值, 唔係話係捧出來就可以任你魚肉, 幫你去全世界宣傳, 無功都有勞, 拍了咁耐, 唔通值得出街的就係得唔夠一分鐘咁多? 真係唔知張震去睇首映的心情係點, 到底係酸係甜, 真係冷暖自知, 祗可以講個導演真係自我得令人討厭的地步, 浪費了近十位演員, 根本得唔到最佳效果, 難怪康城遭到滑鐵廬, 確實係應得的惡果, 到底五年出一部好, 定係一年出五部的王晶好, 青蛙仔寧願揀王晶, 邊位影帝影后未拍過王晶的戲先?

04.10.2004 (Mon) 晴，涼
【機場客運站(The Terminal)】係湯漢斯另一部純演技渾身解數之作，中年發福的他，演活了俄羅斯鄰國格高沙人，到底他的語言口音下了多少苦功，他增了幾磅去扮身形龐大的東歐人，相信都唔係一件易事，而為了這部戲而將整個假機場客運站建成真的一樣，動用了多少人力物力，每一位在機場演出的茄喱啡都渾身是戲，你就會讚歎史匹堡的能耐，難怪可以屹立在影壇二三十年都不倒，套戲完結之後，連字幕都令人驚喜，連演員及工作人員表都係他們的動畫親筆簽名，配合故事的關鍵所在，青蛙仔睇完真係覺得非滿意，帶著愉快的心情離場，而美國的票房不是太突出，確實是可惜！

06.10.2004 (Wed) 天清氣爽
唔知大家有無放貴重物件到銀行保險箱的習慣, 尋日有銀行被揭發裝修時將保險箱當做爛鐵事件, 真係匪夷所思, 呢種人為錯誤真係百年難得一見, 其實青蛙仔從來都無去過銀行保險庫, 睇電影就睇得多, 到底租保險箱的程序係點, 真係白馬一名, 通常客戶都係放金銀珠寶、屋契甚至出世紙, 又或者一切有記念價值的東西, 如果一個唔該就被壓爛變成廢鐵後不知所終, 又幾似電影橋段, 某一日就會有人尋寶都未定, 今日銀行已定了兩個賠償方案, 位位賠五萬之外, 如果同意的就可以額外再賠多十萬, 並簽署不再追究, 唔同意就繼續商討, 相信真係有人歡喜有人愁, 如果祗係放些濕碎野, 忽然有十五萬就真係唾飯應, 但當然會有些人肯定自己的物件貴重好多, 一定要追究到底啦, 但又會唔會有些係搏大霧, 幾大都睇定先決定呢? 如果屋契唔見了, 到底點先可以補回呢? 青蛙仔雖然係業主, 但從來都未見過自己張屋契, 而出世紙就會自己keep住, 大家又知唔知自己張出世紙晌邊呢?

09.10.2004 (Sat) 晴朗
某牌子的傷風素在超過十年後才有另一首新廣告歌推出, 由樂壇天后做新代言人演繹新歌, 成績如何, 暫時都係未知之數, 但都總算係易上口之作, 但如果以【搶耳】來計, 青蛙仔就覺得當年的【感冒】比較令人耳目一新好難忘, 而且當年的【湯記】形象清新, 聲線亦獨特, 記得當時的【感冒】有其中一句【時間令痛苦都醫好】, 特別令青蛙仔有共嗚, 無錯, 時間唔止可以醫好痛苦, 仲係最厲害的武器, 又有咩人可以敵得過時間呢?

11.10.2004 (Mon) 晴朗
今日睇到一則台灣新聞都幾攪笑，丈夫恰個老婆唔識電腦，在網上認識了【外遇】並打得火熱，而且仲儲存了唔少自拍春宮圖在電腦內，點知老婆暗地去學習電腦，之後就打開丈夫的電腦, 細看他每晚上網所謂何事, 竟然發現了天大秘密, 於是集齊證據提出離婚, 呢件事證明人係應該要進步, 如果原地踏步不長進, 好易就會被蒙騙, 真相永遠都唔會揭開, 無論幾多歲都好, 真係要做到老學到老!

12.10.2004 (Wed) 晴朗
藝人【基斯杜化里夫】逝世了，雖然與青蛙仔沒甚關係，但他在廿年前確是成功塑做了【超人】的形象，演出愛情片【時光倒流七十年】更影響當時的年輕人非常深遠，亦創造了當時單一間戲院播放最長影期的記錄, 成為佳話, 可惜他但卻在盛年之時因為墮馬而至癱瘓，一位能夠上天下海的【超人】, 竟然不能再動, 都算係一個大諷刺, 但他仍沒有放棄自己，甚至繼續努力嘗試繼續幕前幕後的演出，直至最近因為長期失去活動能力而令肌肉腐爛，繼而引併發症，至心臟衰竭而結束了他短暫的一生, 果真令人覺得人生無常, 所以每人都應該把握今天, 過後就難追悔了!

14.10.2004 (Thu) 晴朗，世界視覺日
今日係世界視覺日, 視力真係好重要, 大家真係要好好保護自己雙眼, 打得電腦多, 久不久都要休息一下眼睛, 青蛙仔的家族幾乎全部都要戴眼鏡, 幾兄弟姊妹全部都係細細個就要配眼鏡, 而青蛙仔的散光都算深, 而且仲有飛蚊的問題, 所以其實都幾困擾, 其實年輕時因為想入娛樂圈, 曾經都試過配隱形眼鏡, 但竟然因為淚水唔夠唔適合而放棄了, 唯有繼續做四眼佬算了!

16.10.2004 (Sat) 晴朗
最近睇電視的某香港樓盤廣告, 有幾位類似商家的人士在飛機上談論在世界各地買樓的經驗, 忽然有一位懶係自豪, 氣定神閒話要買香港某處, 話係六星級酒店豪宅, 初時青蛙仔都唔知地點在哪處, 覺得多數都會係山頂之類的高尚住宅, 點知後來先發覺呢座所謂六星級豪宅竟然座落於荃灣工業區的前面, 一點都唔覺得佢有幾高尚, 真係唔知就嚇死, 知就笑死, 唔通真係工廠老闆買來方便返工? 哈!

08.10.2004 No.188

20.09.2004 (Mon) 間中有大雨
最近唔少報紙雜誌都有報導影后【瑪姬】的生日, 份份報導都話佢四十大壽, 但青蛙仔真係好疑惑, 因為由【瑪姬】廿幾年前選港姐開始, 青蛙仔已經好喜歡睇佢, 加上佢係大哥的紅顏知己, 所以青蛙仔都幾清楚佢生肖屬兔, 亦即係1963年出世, 今年明明四十有一, 無靖端端又會變了屬龍四十歲, 唔通女人都係喜歡報細年紀? 但細一年又有咩作為呢?

22.09.2004 (Wed) 間中有雨
自從沙士之後, 房署實行公屋扣分制已經超過一年, 當中有幾多戶受扣分受罰、房署有無做野, 青蛙仔都唔係太有興趣去研究, 但最近房署終於都認為冷氣機滴水都係一個問題, 仲有機會將呢樣都納入埋扣分之列, 其實青蛙仔都住了公屋居屋十幾年, 一直都覺得住戶的冷氣機滴水問題嚴重, 六合彩唔易中, 但呢樣野就成日中頭獎, 青蛙仔係戴眼鏡的人, 好多時仲會咁橋滴到鏡片, 有時都幾勞氣, 但偏偏房署就無能為力, 任由班住戶犯法都唔去管, 如果將來真係有扣分制, 青蛙仔一定第一時間走去投訴平時必經之路, 又滴了幾年水無人理的地方, 點都要懲戒下唔理公德的人!

24.09.2004 (Fri) 晴
今晚同朋友去睇【新警察故事】，一開始已經有種好睇的感覺, 雖然係純正港產片, 但頗有一種外國大片格局, 首幕香港夜景又有邊處外國地方及得上, 睇完之後不得不讚大哥終於做番齣好戲, 雖然劇本係仲有可以執漏之處, 但無論文與武的戲份, 大哥都係交足一百分, 就算之前好多人一直覺得佢無演技, 但今次睇完佢的喊戲, 一定會有改觀, 基本上今次係一部群戲電影, 好多演員的戲份都好平均, 但大哥仍然可以突圍, 主角仍然係無俾其他人搶戲, 而好多動作場面的選景, 都係從未在港產片出現過, 例如海港政府大樓, 幾位演員由天台牆邊直衝落地下, 中環行人天橋頂追逐, 仲有日光日白在會展新翼槍戰, 相信如果唔係大哥的面子, 根本無可能借出來, 當然, 動作戲已經拍了幾十年, 要度的招式都已經技窮, 就係睇下點安排先好, 以大哥五十歲都尚可同廿幾歲的安志杰對打得咁流暢, 一定化了唔少時間去排練, 而完場當然仲有NG片睇, 直至到真正完場都仲好似睇唔夠咁, 青蛙仔認為今次大哥真真正正的尋回路向, 呢套片放在荷里活播影, 一點也不輸蝕, 如果你會睇【江湖】, 你會睇【旺角黑夜】, 你會睇【大事件】, 你就一定更加要睇【新警察故事】, 青蛙仔一向都唔喜歡那些唔入戲院但又扮高檔睇唔起港產片的人, 自己都無付出過就想人俾好野你睇, 有無咁著數呀?

26.09.2004 (Sun) 晴，世界心臟日
今日係世界心臟日, 青蛙仔個心一向無平常人咁好, 不過最近幾個月運動多了, 心肺功能似乎都比以前好少少, 雖然都仲有久不久跳得唔係幾好, 但比起以前無咁頻密, 已經係唔錯了, 青蛙仔親身經歷, 想同大家講, 真係趁後生要做多點運動, 真係有好無壞的!

候任的【長髮】立法會議員事先張揚, 講明到十月六日宣誓之時會將誓詞加上自己的編撰, 呢種做法分明就係突出自己, 嘩眾取寵, 青蛙仔覺得一個人應該【得些好意須回手】, 立法會唔係話任你玩的地方, 當選議員係應該用自己的實力, 身體力行去幫香港市民, 並唔係攪呢種小動作就有用, 參選得就要明白遊戲規則, 如果個個都話自己喜歡加減邊句就邊句, 咁樣仲成世界? 如果唔效忠基本法, 仲做咩中國香港人? 真係好唔明有咩人會投佢一票, 覺得佢真係會幫到香港咩? 青蛙仔反而唔想佢退縮, 唯有佢繼續堅持, 咁先會有機會可以罷免佢, 睇下佢無左呢份咁優厚的人工, 係唔係會開心D!

28.09.2004 (Tue) 晴，中秋節+公益金便服日
今日係中秋節正日，先祝大家中秋快樂，人月兩團圓，願望成真。今日雖然係中秋，但好多學校仍然要返學，不過見到好多學生返學都好輕鬆，因為今日係【便服日】，兼且有節日假期情緒，好多人的面口都無訓唔醒同恰恰下，取而代之係開心的面容，雖然到正日的節日氣氛仲係唔算濃厚，但見到好多人都開開心心，都算唔錯了。

29.09.2004 (Wed) 晴，追月
本來早兩日口頭上的態度己經軟化的【長髮候任立局議員】, 美其名話向選民交代, 所以有可能唔再攪事, 將宣誓一事小事化無, 但經過幾日之後, 可能得到軍師相助, 忽然又有新招, 惡人先發爛渣, 話如果唔俾佢照自己意思宣誓就會告立會及政府, 又話有宗教信仰都可以稍為更改, 而佢的信仰就係民主自由及人民, 青蛙仔聽完祗係覺得呢個人真係橫蠻無理, 到底點可以擔重任呢? 如果場戲繼續演下去, 祗有浪費政府更多人力物力, 反正多佢一個都唔會令市民有咩得益, 不如真係少佢一個, 大家仲無咁煩!

01.10.2004 (Fri) 國慶日，晴，轉涼
今日狗仔隊周刊又係有新料, 【十三郎影帝】在上海【偷食】被記者清楚影到正, 真係幾失望, 因為青蛙仔睇了呢位話劇之王的話劇都有十幾年, 一向覺得佢同太太感情好好, 曾經共過患難, 如今唔算好富貴, 但都總算捱出頭來, 估唔到都會發生呢種事, 當然夫妻感情事係不容旁人來左右, 一家唔知一家事, 但確實令人對感情失去信心, 另一方面青蛙仔又想, 如果他的太太一直都被蒙在鼓裡, 到有朋友或親人睇到本周刊再向佢詢問之時, 相信真係比死更難受, OMG!

24.09.2004 No.187

07.09.2004 (Tue) 晴
國家隊奧運金牌精英旋風到港，雖然所有金牌運動員都到齊了，不過傳媒同香港市民的焦點都集中在【【亮晶晶】同【劉翔】等幾位的身上，所到之處就像龍捲風, 令佢地想好好地購物都唔得, 在精英大匯演中, 運動員都要變做歌星開金口, 果然係辛苦佢地辛苦大家, 青蛙仔真係寧願睇佢地表演自己的拿手好戲仲好, 例如五位舉重大力士力敵50位舞獅舞龍精英, 以一敵十的拔河比賽仍然可以勝出, 真係令人咋舌; 題外話係奧運精英旋風竟然帶來真的龍捲風，昨日機場的小型龍捲風，雖然無外國或者電影般勁，但呢種自然現象始終極少在香港出現，因此有唔少市民都趁機拍低照片，先進科技就有這樣的好處，隨時拿起手機就可留住情景，真相永遠都容易大白。

09.09.2004 (Thu) 早上傾盆大雨
晚上在網上收到消息, 香港市民在下個星期一可以免費寄一封信, 詳情如下: 【郵政署為鼓勵市民寄信傳心意，將在9月13日容許市民在4間郵局寄出一封免費信件。郵政署規定，市民寄的信件要是私人地址，左上角要寫上寄信人的名和地址，重量是50克、即郵費的港幣2.2元以下的信件。市民當日可以在中環、尖沙咀、荃灣和沙田中央郵局寄免費信，他們要將信件投放在指定特別的郵箱中。】郵政署今次的宣傳係因為每日三百幾萬封信件中, 有九成都係商業信, 祗係得一成係私人信, 所以覺得想擴大呢個數字, 希望市民可以重拾紙筆傳情達意, 以增加收入, 青蛙仔以前都好喜歡寄信寄咭, 但自從上網之後, 漸漸就祗用電郵傳情, 加上一來懶, 二來在網上傳情太方便, 三來以環保為藉口, 所以寄信寄咭的數目下降了九成有多, 一個月都唔知有無寄一封信出去, 不過寄信呢個動作仍然係值得鼓勵, 如果唔係絕交或分手信, 相信寄同收都一樣咁開心的, 大家又幾耐無寄過信同收過信呢?

10.09.2004 (Fri) 轉晴
晚上睇新聞見到有團體又舉行盂蘭節派米活動, 對象主要係長者, 每人可獲香米一袋同埋利是一封, 晨早已經有成萬人在排隊等候, 秩序雖然良好, 仍然有長者因為排得耐或者種種原因而感到唔舒服要醫療人員協助, 甚至送院, 有記者訪問向隅的長者, 竟然係喊咁口, 好似損失了唔少咁, 此時青蛙仔真係覺得有點自豪慶幸兼托賴, 因為自己家裡的兩位長者無需要去呢種場合領取免費贈品, 他們都活在滿足的生活裡, 青蛙仔唔敢講全部係自己的功勞, 但老一輩的人都沒有退休計劃, 老有所依唔係人人都可以得到, 總係要有些福份先會有子女反哺的一日, 見到成萬人在爭住領取小便宜, 總係覺得班老人家都幾可悲, 青蛙仔將來都會係孤獨終老, 所以退休計劃真係唔少得, 當無人無物的時候, 健康同錢點都要留在身邊!

11.09.2004 (Sat) 天涼好個秋，911事件三周年
唔經唔覺911事件已經三年, 回想當晚出事之時在家上網, 看見新聞片都唔多信件事係真, 因為無聽真報導, 仲以為係咩特技, 後來片段越出越多, 聽真睇真原來發生咁大件事, 之後在網上都不斷有人在討論, 資訊發達真係好, 真相唔容易被收藏, 雖然事件發生在美國, 死得人多都係佢地, 但策劃恐怖活動的人滅絕人性, 就算一時得逞, 都唔得到世人認同, 在這記念日子的附近, 全世界包括香港都一樣會戒備, 以防有事再發生, 但青蛙仔想, 會唔會咁串, 又揀番今日來襲擊呀? 係都等你無防無備先整多鑊杰啦!

12.09.2004 (Sun) 912投票日
宣傳了一段長時間的912立法會選舉, 終於在今日舉行, 唔知大家投了票未呢? 青蛙仔唔係選民, 亦無打開電視跟進選舉的消息, 不過住到37樓都仍然聽到偶然有聲音在街上傳上來, 呼籲市民去投票, 相信新界西真係太少人去投票, 連政黨都仲有空閒時間同圍走去呼籲, 新界西就少人去投票, 其他地區的投票站就相反, 竟然出現票箱爆滿, 要暫停投票等新票箱運來, 真係幾攪笑, 呢d就係政府一向的風格, 永遠都係想最好的一面, 人人都會摺到張票靚靚, 齊齊整整先放入去, 又唔預人多時候會點, 但其實邊個個咁得閒同你摺得咁好丫, 求期蓋完個印就塞入去票箱, 因此就會形成堵塞情況, 加上今次真係人多左投票, 所以先預計唔到, 有選民話會投訴呢件事, 真係惡得緊要, 事情都發生左, 睇怕當局都好騰雞了, 聽日自不然有人出來解釋=掩飾一番, 算罷啦!

16.09.2004 (Thu) 晴
選舉過後, 仍然餘波未了, 報紙、電視、雜誌, 甚至身邊的同事都在談論著選舉的種種事, 甚至有同事同青蛙仔講：【死喇, 廿三條來喇！】, 點知青蛙仔回應：【咦, 好喎, 早應該立法啦, 都唔明D人好人好姐, 係都要驚警察隨時可以上門拉人, 你唔見電視劇咩, 就係因為要出張搜查令, 往往賊人就有時間逃之夭夭, 唔可以將佢好繩之於法, 即時破門而入就沖白粉入廁所都沖唔切啦！】, 同事俾青蛙仔講到無癮, 於是就唔同青蛙仔講, 又有令人同事在講去投票時點點點激氣野, 於是青蛙仔又話, 學下青蛙仔啦, 唔投一身輕, 唔去投票站就無煩惱啦, 真係哈哈哈! 不過青蛙仔都知自己唔係一個好公民, 無盡到呢個責任, 但投票唔係話人去你就去, 如果唔清楚候選人的背景或者政綱之類, 曚查查去投票, 咁就更加罪人了!

18.09.2004 (Sat) 晴, 間中有雨, 九一八事件七十三周年
今日係九一八日軍侵華事件七十三周年, 1931年9月18日, 日本關東軍蓄意製造事端, 向東北軍駐地發動進攻, 我國死傷無數, 而日軍的暴行一直到今時今日仍然係唔會被忘記, 今日就有唔少團體分別在北京及香港的日本領事館示威及要求賠償或道歉, 其實呢個曾經侵犯仔國領土的國家, 又點會肯低頭認錯丫, 因為事實歸於事實, 全世界人都知, 係不容竄改, 於是祗好借了聾耳陳隻耳, 當聽唔到, 如果稍有心軟講了些唔好意思的說話, 就即係承認錯誤, 想唔賠死都難, 所以每年有唔少【特別日子】(多數都係日軍侵華的日子), 都會尷尷尬尬地讓我們子子孫孫世世代代的在他們門前吶喊叫囂, 擾攘一番先肯收手, 唔係咩呀, 你敢趕佢地走呀!

10.09.2004 No.186

23.08.2004 (Mon) 晴，早上煙霞
相信大家都有留意到，尋日有數千人排隊換領啤酒宣傳品的新聞，香港人真係久不久就會有此類羞家情形出現，今次活動由某洋行主辦，顧客只需以十二個啤酒樽蓋或十八個易拉罐的拉環，另加一百零八元，便可換購一副所謂「水晶麻雀」。換購活動原於上月廿六日開始進行，換購地點共有二十個，但因反應熱烈，不少換購地點無法應付，故代理商改為昨日於華潤大廈香港展覽中心內舉行，數量為二萬二千副。青蛙仔真係唔理解，又唔係免費派米，飲完十幾罐啤，仲要加錢先可以換到，都可以有近萬人爭相換領，其實主辦單位都講到明有足夠貨源，但呢班市民仍然係慌死蝕底，爭先恐後，十多名小童與家人失散，部分人更大打出手，不少老弱者被擠至跌倒，有人跌落手機亦不敢俯身拾取，怕被從後而上的人潮淹沒，亦有人被焗至透不過氣來，嘔吐大作，一時間嚎哭慘叫聲不絕。在場百多名保安員根本無法控制，保安員與市民紛紛致電報警。於是警方派出大批人員到場協助維持秩序，警員手拉手築成人鏈，並採潮水式疏導人群，結果人龍全部如願換到麻雀，並剩下一萬副無人問津，而成功換領的並非個個都開心，因為發覺祗是一副【水晶膠】，並不是真水晶，大叫貨不對辦，青蛙仔睇到真係好笑，食懵你喇，一百零八蚊買一百四十四隻水晶麻雀，哈！

24.08.2004 (Tue) 酷熱警告，仍然有煙霞
最近有議員被揭發懷疑【以權謀私】，將自己的負資產物業分成幾份，高於市價出租俾議員辦事處，以公帑交費租樓供樓，並隱暪自己持有物業公司的五成股份，卻以為自己得一股咁大把，真係呃你細路哥膝頭唔食辣椒醬，平時為民拯命，義正嚴詞，其實內裡都係為自己多過為人，臨近選舉，相信仲有唔少爆大鑊或互篤背脊的情況出現，祗要唔係陷害式的虛假抹黑，作為市民真係好歡迎有呢種真相揭出來，【人到無求品自高】，當有求之時，係唔係品行會降低呢？忽然覺得，董伯伯成日俾人鬧，一定要佢落台，但又似乎捉唔到佢在人格上的錯處，否則已經一早公告天下逼佢落台啦，似乎佢先真係全心全意的為香港市民服務，【大班】果種，你話佢為你定為自己呢？

29.08.2004 (Sun) 黃雨，盂蘭節
潮起潮落, 有開始就會有結束, 大家追看奧運十幾日, 終於都曲終人散, 中國隊亦破了以往拿金牌的記錄, 相信全世界的中國人都會好開心, 希望中國隊唔好自滿, 繼續自強不息, 在四年後的北京奧運可以再創佳績, 今屆奧運結束, 相信大家又會回覆正常生活, 唔使等到半夜都唔訓來收看賽事 ,唔知點解, 青蛙仔對今屆的賽事唔係太熱衷收看, 祗係有得睇就睇, 唔會話追住來睇, 最多都係第二日上網同睇電視update下最新消息就算, 其實最近除了跑步有恆心之外, 對其他事情都唔會太投入熱衷, 處於一種隨便的態度, 心態真係變左好多, 真係十足一個等退休的人, 哈!

31.08.2004 (Tue) 晴，間中有雨
香港乒乓球孖寶李靜同高禮澤今日凱旋歸來, 政府安排了祝捷會, 有數百人接機歡迎, 場面浩盪, 最令人感動係安排埋雙方的家長都由內地到港接機, 睇見子寶長時期都四萬咁口, 由心底裡開心出來, 晚上仲上電視面對廣大市民, 讓大家從多角度睇清楚, 相信未來幾年一定會掀起乒乓球熱潮, 小朋友又多樣運動選擇, 青蛙仔覺得真係好事來的, 不過近日都從別人口中側聽到一些負面的說話, 有些人幾介意從內地來香港的人, 就算佢地為香港揚威, 都覺得唔光采, 認為佢地唔夠代表性, 反之如果珊珊可以拎到獎牌就唔同, 因為佢先係土生土長, 但青蛙仔又唔係咁諗, 既然孖寶係正式申請成為香港人, 無論佢地現時有三粒星未, 都係手持香港身份證, 絕對係可以代表香港, 點解仲要質疑佢地資格呢? 唯一解釋都應該係唔抵得人地咁威, 在雞蛋裡挑骨頭, 青蛙仔反而覺得講呢種說話的人唔配做香港人, 人地明明付出了最大努力與汗水, 爭取到好成績連多謝都無句, 偏偏要【叉輪廚】人地, 無野下話?

02.09.2004 (Thu) 晴
今晚睇劉德華的第三場演唱會，雖然祗係平日，仲要係開了學的日子，但仍然係全場爆滿，現今能夠開到十五場都爆滿的歌手真係唔多，可見佢的受歡迎程度都係不減，本來青蛙仔以為會好遲先開場，但主角八點半前已出場，增添了不少分數，可惜主辦單位的音響設備似乎唔多照顧平價飛的觀眾，揚聲器又少又掛得唔夠高，因此好多時都聽唔到佢講野，而開場略嫌唔夠氣勢，雖然在火圈中演唱，但個火都唔算太旺盛，隨後的演出大多都唱舊歌為主，但都換了不少造型，佈景方面都滿足到觀眾的需要，演唱了幾首歌之後把聲亦開了，但到中段仍然唱唔少舊的慢歌，氣氛稍嫌拖悶，現實的青蛙仔即時被睡魔急call了去捉番盤棋，之後換上改良的中式造型演唱【大地恩情】青蛙仔覺得暴露了他的缺點，可以用差字來形容，到後來唱自己歌【中國人】先挽回觀眾情緒，直至末段以【大隻佬】扮相唱新歌再將氣氛推至最高然後說再見，安歌出場竟然有特別嘉實【影帝秋生】出現合唱【世界第一等】，頗為驚喜，總括來講青蛙仔買平價飛都唔可以要求太高，係疑惑點解會唔唱近期都好流行的【綠茶歌】，到底有無內情呢？

03.09.2004 (Fri) 晴
星期五的早上天氣幾好，雖然唔多夠訓, 但起碼都已經星期五, 好快就有得休息, 都算唔錯啦, 食早餐時睇新聞, 見到董伯伯向北京市委書記劉淇提出強烈要求, 希望香港可以協辦2008年北京奧運的部入項目, 祗見董伯伯好像小朋友戰戰競競以講笑形式為港人提出要求, 而劉淇的回答帶著希望：【也不是不可以爭取的】, 雖然最有可能的比賽項目都祗係馬術比賽, 但已是令香港人興奮的消息了, 而香港奧委會會長霍震霆先生面對記者時更滿有信心的說：【我好少出來講野, 講得都成數好高。】，睇來中港一家親, 血脈相連之下, 要騰出一個項目來讓董伯伯立個功都唔算難, 這是一個好開始, 話唔定若干年後, 香港有本事主辦整個奧運都唔定呢, 哈!

04.09.2004 (Sat) 陽光普照
又到周末了, 雖然唔夠訓, 但心情點都會好, 一早睇新聞見到俄羅斯北奧塞梯共和國校園挾持人質事件, 死傷超過二百人, 雖然青蛙仔見到血腥混亂場面, 但唔知點解, 總係覺得事不關己, 完全無動於衷, 世界唔少角落每日都有戰亂之事, 似乎令人麻目, 祝願世界和平亦係遙不可及的奢望, 唯有退而求其次, 祗係希望我國及香港唔會有亂事, 中國人一日比一日進步就已經唔錯了!

27.08.2004 No.185

09.08.2004 (Mon) 晴
青蛙仔一向對爛賭的人恨之入骨, 尋日就有個祗係四十三歲的男子, 因為嗜賭如命, 涉嫌盜用公款而令自己數度入獄, 出獄後仍然不知悔改, 仲要老父用盡畢生積蓄來替佢還債, 但近兩年老父已耗盡金錢, 祗靠綜援過活，爛賭兒子仍然常常登門欲死相逼, 要老父交出金錢, 你話呢種人唔死仲有咩用? 次次都話死, 連老父都唔再信佢, 話之佢攀欄跳樓都好, 一於無眼睇佢, 青蛙仔都幾贊同用呢種方法對付佢, 要死的人就唔會出聲話俾人知, 打鑼打鼓高調要死的, 祗係想引人注意, 爛賭之人係有心魔, 好難可以改邪歸正, 長痛不如短痛, 就算係幾親的人都好, 一定要斬纜斷絕關係, 否則盞令自己永無寧日, 話改話改的人, 根本唔會戒得甩, 唔信? 你同佢輸賭丫!

13.08.2004 (Fri) 晴
落巴士步行返公司途中, 見到唔少政黨在街上宣傳拉票, 雖然佢地的政綱唔一樣, 但助選團方面竟然都一樣係有一班年輕人在派單張, 就好似平時在街頭派廣告傳單的年輕人一樣, 青蛙仔忽然好懷疑呢種助選團到底係唔係出自真心, 定係受僱而出來派單張呢? 如果問佢地對於候選人的一切, 你估佢識唔識答呢? 既然青蛙仔係一個政治冷感的人, 所以對待佢地都係一視同仁, 唯有完全唔拎任何一張單張, 公平掛!

16.08.2004 (Mon) 晴
今日下午有同事食齋, 先醒起原來今日初一了, 舊曆七月一向都給人一種神秘而寒慄的感覺, 細個成日都聽大人話會鬼門關開放, 其實目的都係想後生唔好去夜街, 而舊曆七月係一年之中最少人結婚辦喜事的, 所以大家會發覺好少人會在此時擺酒, 但其實就算幾好日子結婚的人都一樣有機會離婚, 根本係睇人而定, 好似青蛙仔有舊同學就係正正在清明節擺酒結婚, 唔使擇日亦唔使同人爭, 酒樓方面, 不知幾歡迎, 俾廳都不知幾鬆動, 大家亦飲得非常開心, 到而家都十幾年, 一仔一女, 家庭幸福到不得了, 所以證明人好就得啦, 唔好的話, 擇乜都無用!

早前有娛樂版報導三色台播放奧運直播之時, 因為訊號及時間上唔配合, 以致在雅典的特派報導員懵盛盛唔知鏡頭影住, 仲話原來【飛魚王子】同【華埠小姐】有拗撬, 攪到口黑面黑云云, 但尋晚在網上傳來了一條當晚的事件經過, 青蛙仔細心睇了兩次, 覺得兩位完全唔似係報導般不和, 因為當【飛魚王子】講到眉飛色舞, 話【華埠小姐】【串佢】之時, 【華埠小姐】係用聆聽同微笑來回應, 根本唔似有唔妥, 而肥谷在事後亦解釋, 【串】係佢地的術語, 即係跟住落說話, 今次青蛙仔都信肥谷, 而傳媒可能根本未睇得清楚就將事情扭曲挑撥, 真係令人無奈, 不過有樣事實係青蛙仔所見, 【華埠小姐】無論英文與普通話都係一流, 派佢過去做記者係一個極好的決定, 養兵千日, 用在一朝, 總係覺得有料的人, 始終都會有人賞識的!

17.08.2004 (Tue) 晴
【傻大姐】的新戲【鍋貼】即將上畫, 電影公司將套戲被列為三級而大造宣傳, 相信目的都祗係想話俾觀眾知, 套戲幾有睇頭兼震憾, 連電檢處都覺得十八歲以下唔適宜睇, 青蛙仔就覺得今次呢個勢造得好好, 因為每逢有電影節舉行, 參展電影在小冊子上已標明三級的話, 唔理係咩內容片種, 總係第一時間爆滿, 雖然少了班年輕觀眾, 但不愁沒人入場, 而且今次【鍋貼】係【傻大姐】搏盡轉做演技派之作, 可以話係佢演藝事業的轉捩點, 青蛙仔雖然唔喜歡佢的笑片, 但今次監製同導演都係知人善用的人, 加上原著係神秘的【李小姐】, 一向都係青蛙仔的偶像, 佢講墮胎的場面直頭好似專業醫生一般, 令人懷疑到底佢有無親歷其境, 所以青蛙仔對此片都幾有興趣, 至於喜歡【傻大姐】的年輕fans, 如果未夠秤都唔使愁, 因為之後【鍋貼】會連同兩部電影三合一再上畫, 到時一定會刪掉三級場面, 又或者出加長版之類的DVD, 到時先睇囉!

18.08.2004 (Wed) 有煙霞, 焗熱
報紙刊登一大段營養師的報告, 有註冊營養師分析了市民外出用膳常吃的五十種食物, 其中乾燒伊麵同乾炒牛河分別含有23及17茶匙的油份, 堪稱十大不健康食物的首兩位, 長期食用會增加患癌的機會, 認真得人驚, 其餘八種食物包括：焗豬扒飯、咖喱牛腩飯、魚香茄子飯、菠蘿咕嚕肉飯、西炒飯、燒腩飯、梅菜扣肉飯同枝竹班腩飯, 都係唔健康, 青蛙仔有時都會點其中三幾款來食, 為了自己健康著想, 以後都係少食為佳, 而十大健康食物就包括：雜錦海鮮湯烏冬、鮮牛肉通心粉、雜錦壽司、日式冷麵、去皮少調味醬油的切雞飯、越式雞絲檬粉、菜肉雲吞麵、鯪魚蒸釀豆腐飯、瑤柱冬瓜粒湯飯同埋清蒸魚客飯, 睇落除了壽司同冷麵之外, 其餘真係唔算太吸引, 大家想為健康定為口福好呢?

19.08.2004 (Thu) 仍然焗熱
放工返到屋企睇電視得知吳浩康因藏毒罪被法庭判罰5000元, 裁判官話, 不能因被告的藝人身分而加重刑罰, 青蛙仔都好同意, 因為通常一位年輕偶像係唔可以贏得全世界, 總有正反兩面去對佢, 身社裁判官真係唔可以有偏差, 今次祗係罰款了事, 都算呢位後生仔一場造化, 相信唱片公司唔會咁輕易放棄佢, 可能再將佢收埋一陣子, 讓事情丟淡之後, 又會俾佢有一番作為, 如果佢真係肯改過自新, 從此向毒品say no, 青蛙仔仍然覺得佢係有前/錢途的!

22.08.2004 (Sun) 陰，七月初七
最近天水圍又有【拜神黨】出現, 欺騙了一位婦人高達62萬, 另外再加金飾, 青蛙仔已經多次提及佩服【拜神黨】, 祗係得三數人, 但就個個演技了得, 三言兩語就攪到人地個心七上八落, 驚住自己及家人會大禍臨頭, 乖乖奉上巨額來拜祭, 其實而家銀行方面都加強了此類防範, 遇到有老人家忽然提取大量金錢, 都會多口問句用來做咩, 同埋提佢地帶咁多現金出街會有危險, 但師奶們祗係三至五十左右, 佢地周不時都會投資買賣, 現金來來往往唔出奇, 不過即時可以拎到六十幾萬出來的婦人, 肯定都係辛辛苦苦儲埋的, 因為關心自己同家人所以被騙, 都幾值得同情, 唔同話電子黨跌錢黨果種, 因為貪心而被騙就抵佢死, 六十幾萬真係可以做好多野, 青蛙仔要搵成世先供得掂層幾十萬的居屋, 原來呃人係咁易, 真係好想見識下呢班高人的廬山真面目!

13.08.2004 No.184

26.07.2004 (Mon) 間中有大雨
暑假來臨, 又係學生準備新課本的時候, 電視新聞提醒家長要對二手書店小心, 因為好多都係混水摸魚搵著數, 宣傳單張話就話幾低價, 甚至本本都有, 但去到又唔係果回事, 價錢唔係咁平不得止, 仲有些用未有修訂過的來代替修訂本, 亦有些收了訂之後連舖都摺埋, 令唔少人損失, 青蛙仔可幸自己當年讀書都從來無買過舊書, 雖然有個時期家境唔太好, 但父母仍堅持替子女買新書開學, 記得當年有相熟書局, 預訂了所有新書之後, 可以到差唔多開學先去俾錢, 周轉方面可以靈活一點, 不過就少了暑假睇新書的樂趣, 亦要在臨開學前先臨急臨忙用膠紙包書, 青蛙仔的雙層包裝法都幾特別, 要包一層月曆紙, 之後再用膠紙包裝, 而一般同學未必會花錢買膠紙, 祗係用風景月曆紙包裝就算, 而青蛙仔反而喜歡用白色的一面來包, 之後再在封面用自己字跡寫上書名, 本本書都係全白色, 夠特別吧? 大家又點包書的呢?

27.07.2004 (Tue) 間中有大雨
尋日台灣的警匪駁火戰, 共開了三千槍, 真係好似警匪片咁誇張, 簡直係槍林彈雨, 其實做警察本份係應該除暴安良, 但又有邊個想遇上這樣刺激的事情呢? 祗係一瞬之間, 條命就會交了俾別人, 可能年紀輕的會希望有呢種大案出現, 好讓自己立功, 揚名立萬, 但係一旦有事, 損傷甚至死在一班爛命之徒手上, 確實係好唔抵, 其實今日各報章都用大篇幅來報導, 不過可能唔係香港發生, 所以青蛙仔都祗係係咁意睇下就算, 始終都離得遠, 總之香港唔好發生呢種事就得了!

28.07.2004 (Wed) 陰, 又係間中有大雨
今日睇報紙的國際消息, 知道德國某製衣公司聯同電腦片製造商, 合力製造了一件絛線音樂外套, 集保暖與娛樂於一身的MP3外套, 藏在外套內的MP3機由左手袖口的衣鈕控制，耳筒則安裝在衣領之內。此外，衣領還有一個免提式的手機裝置，可以配合藍芽近距離無線規格的手機使用。MP3 機使用充電池，每次充電後可以使用八小時，機身和電池都可以從外套中取出，避免在洗衣服時弄濕, 真係幾理想, 不過件衫的價錢都唔平, 計落要五千幾蚊港元, 而且MP3機係屬於隨身聽的一種, 即係話應該會日日帶出街, 但係又無理由日日都著住同一件外套, 所以真係好懷疑有幾多人會買呢類產品, 當然如果有錢人唔志在, 著出來威下又無妨, 但青蛙仔就應該唔會買呢類野了, 大家又會唔會買呢?

29.07.2004 (Thu) 早上黃雨及雷暴警告
今日新聞焦點當然落在電台話事人【俞小姐】同埋【大班】身上, 雖然真係好似茶杯裡面的風波咁簡單, 但係偏偏就有人將件事要攪到全港人都談論, 青蛙仔係世俗人, 於是又跟埋一齊講下, 其實真係好唔明幾位所謂名咀相繼封咪係為了咩原因, 講就講到受到某些壓力, 驚住自己或家人會受傷害而封咪, 但又完全毫無明示與暗示係邊方面俾壓力, 即係口話口賠, 講乜都得啦, 到底係吊起來賣自抬身價抑或真係有原因, 真係要佢地自己先知, 到底告假封咪是否仲要出糧, 同埋要到幾時先再開咪, 幾個當事人似乎仲係敵不動我不動, 站在電台的立場, 以利益為大前提, 無理由不斷支出, 與之解約實在合情合理, 點解其他人要激動得咁緊要呢? 青蛙仔真係好唔明! 其實呢個節目完全唔吸引青蛙仔去聽, 完全係有佢講無人講, 選擇性地接聽聽眾電話, 中聽就俾佢講耐D, 唔中聽就會被截線, 咁樣都係言論自由? 唔該唔好玩啦! 最攪笑係【數字行動】的成員, 又出動到電台攪攪震, 人地勞資雙方有拗撬, 又關呢班人事? 係唔係最近無野好做, 驚人地唔記得, 所以又出來做下秀呢? 睇見佢地聲嘶力竭, 忽然覺得佢地好可憐!

晚上的電視娛樂節目真係好精彩, 本來青蛙仔洗緊碗都停下來睇下梅媽有咩講, 本來係一個宴請沙士受害人聚會的場合, 但又一個都無到場, 以致場面冷清, 但梅媽果然係出慣大場面走慣江湖, 仍然可以獨力支撐, 留住記者兩小時, 含住兩眶淚水, 不停地控訴, 堅決要打官司保住愛女的遺產, 其實一家唔知一家事, 人已經死了, 真係好難理解點解呢位老人家會受這樣的對待, 而那位阿哥之前到底又做過咩事令到梅姐唔再認佢, 作為一個梅姐的歌迷, 真係唔想件事沒完沒了, 相信梅姐的朋友都唔想咁樣, 其實會唔會一切都係錢作怪, 祗要有一筆錢到手, 老人家就會收聲呢?

02.08.2004 (Mon) 陽光普照
尋日係我國解放軍建軍七十七周年記念的日子, 當局在石崗軍營來個大曬冷, 支持董伯伯的政府, 維謢香港繁榮, 有三萬市民可以欣賞閱兵儀式, 雖然在早上十點先開始, 但市民未到八點已經提早到場霸位, 攝氏三十二度烈日當空之下, 無論係兵係民都一樣辛苦, 兵民同樣都係人, 都會有倒下的時候, 可幸都祗係普通休克, 未有性命危險, 青蛙仔忽然記起好多年前睇過一部內地製作的電影【大閱兵】, 士兵們都為了自己可以參與閱兵而高興, 全力以赴的日夜操練, 長時間的訓練就祗係在閱兵表演短短的時間, 可謂不容有失, 閱兵確實是令人感動, 這一剎間覺得國家真的可以令平民有安全感, 因為實在太嚴謹, 太整齊, 沒有絲毫的錯誤, 但當閱兵完畢之後, 大批市民都唔知要趕住去邊, 爭搭巴士的情況令人慘不忍睹, 與之前的有秩序、互相合作的精神完全相反, 有這樣的市民, 國家有更好的兵又怎樣?

08.08.2004 (Sun) 晴朗
今朝睇報紙見到段新聞，一名三十九歲已婚且有女兒的助理小販管理主任，涉嫌訛稱自己身患重病，在青衣公園內向十五歲女童「博同情」要求施以援手，將女童帶往僻靜處，自言很辛苦而要女童替他手淫，完事後再索取女童的電話號碼，結果在再致電女童相約見面時被拘捕，警方更在其手機內發現有另三名年介十四至十九歲少女的電話號碼，調查下發現她們亦與上述女童有相同遭遇，經進一步的調查後，發現該三名女子年齡分別為十四、十七及十九歲，她們分別報稱於荃灣、沙田及西貢等地點，遭遇與十五歲女事主相同的經歷。青蛙仔睇完之後慨歎可以有如此不顧廉恥的男人，雖然結了婚，為了一己私慾仍出來行騙，令少女留下長久陰影，但另一方面又覺得點解而家咁多少女的性知識咁貧乏，完全唔覺得件事有問題，被人苦苦哀求之下就幫人手淫，幾個之中祗有一個幫完人之後識得報警，到底係怕事定係根本都仲未知發生咩事呢？

30.07.2004 No.183

13.07.2004 (Tue) 晴，間中有雨
睇報紙見到歌星李玟小姐往泰國探訪愛滋病人，笑容滿臉地與愛滋病人牽手擁抱合照，青蛙仔非常佩服李小姐的專業，因為無論是不是為了宣傳自己，又或者笑容是真是假，她仍然是確確實實的擁抱著一位愛滋病人，而且還是一位有色人種，雖然大家都知咁樣的接觸係唔會傳染愛滋病，但如果係青蛙仔就無呢種勇氣，要與一位不相識的病人牽手已經唔易，仲要擁抱愛滋病人，雖然唔會歧視佢地，但如果係唔相識的，都係會盡量避免接觸，難得李小姐仲笑得好燦爛，忽然覺得她高貴得像戴妃！

15.07.2004 (Thu) 晴, 一號風球
放工趕往九龍灣, 晚上約了朋友睇戲, 在長途巴士中拎部MP3機來聽歌, 都算唔錯, 因為都有好一段時間無在車上聽歌, 其實搭車都係想訓覺多過聽野, 去到德福, 又係食肯德雞胸, 不過今日都係唔敢造次, 兩件雞都撕走了皮, 一定要繼續keep fit, 傾了一陣之後就夠鐘入場, 今晚睇【十面埋伏】, 開場半小時都覺得套戲係唔錯, 無論美指、武指、佈景同配樂都幾捉得住, 但之後就開始散了, 據聞因為梅姐無法演出而改動了劇本, 會唔會因此而令套劇的劇情變差, 甚至幾乎淪為笑片, 就真係不得而知了, 不過三位要角都落力演出, 劉德華出得少, 但內心戲好勁, 金城武勝在夠俊, 雖然好多人唔喜歡章子怡, 但真係做得唔差了, 總括套戲都係呃老外之作, 都可以一看的!

16.07.2004 (Fri) 三號→八號→三號→除下風球
相信好多人都多謝【圓規】帶來了半日假期, 尤其是青蛙仔隔離屋, 未到中午已經傳出陣陣戰鬥聲, 劈劈啪啪此起彼落, 可能今日氣溫低了, 打開門就風涼水冷, 唔開冷氣打麻將都唔驚會出汗, 不期然想起後生時的青蛙仔, 每逢颱風高掛之時就會有舊同學發起竹戰, 曾經一次冒住狂風暴雨在東區走廊坐歷奇的飛車去杏花村雲遜的家開檯, 都幾驚險, 不過而家年紀大了, 打風都係留在家中安全一點!

20.07.2004 (Tue) 晴，間中有雨
今朝睇娛樂版報導，黃日華先生從影以來，拍了七十多部電視劇，開始對娛樂圈意興欄柵，有意退出云云，青蛙仔覺得是一件幾可惜的事，黃先生在視圈打滾多年，演技不用置疑，代表作唔算太多，但【射雕英雄傳】的【郭靖】絕對深入民心，連內地觀眾都對佢有深刻的認識，不過青蛙仔卻比較欣賞黃先生在【義不容情】裡面的【丁有健】，近十五年前, 監製韋家輝將黃日華先生同劉嘉玲小姐的演技提升至癲峰, 更加掀起了全港年輕人摺幸運星的熱潮, 就算之後在深夜重播, 青蛙仔做完兼職之後回家, 雖然第二日又要一早返工, 但仍然都帶著疲累身軀看完先安心上床休息, 可想而知吸引力是有幾大, 唯一是結局不是青蛙仔喜歡的大團圓, 頗令人遺憾, 到了今時今日黃先生覺得家庭比一切來得重要, 他希望放棄了自己努力了多年的事業來換取完美的家庭, 這一點作為影迷是絕對支持, 但另一方面, 難免亦是覺得有點遺憾, 真是兩難!

21.07.2004 (Wed) 早上有雷雨
近日打開報紙雜誌同睇電視，纖體美容的廣告簡直覆天蓋地，什麼消腩丸、瘦身茶、膳後收腹水、燃燒脂肪飲品，甚至連沖涼液都可以瘦身，隨口都可以數得出十種八種唔同的牌子，纖體公司的代言人更加多不勝數，男男女女都要加入瘦身行列，有點名氣被人睇中就自然有人塞錢入你袋，最近連以肥做型像的【肥媽】都減了幾十磅，變成了秀媽，真係自拆招牌，可幸【肥姐】斬釘截鐵地宣佈，纖體公司唔好打佢主意，雖然佢個女已經減近百磅，開始由【肥膩】變成【清淡】，但【肥姐】係絕對唔會打爛自己多年來塑造的型像，佢要搵錢都仲有大把途徑；話題扯得太遠，其實青蛙仔係想講，瘦身食品飲品的廣告真係好吸引，效果神奇得令人躍躍欲試，正在積極收腹的青蛙仔都好想一試，但呢類產品動輒都要幾百蚊一盒，如果真係有效就無所謂，最驚係食左都好似泥牛入海，起唔到作用就浪費金錢了，其實大家或者身邊有無朋友試過呢？有效的話，不妨介紹俾青蛙仔啦！

22.07.2004 (Thu) 大暑，間中有雨
講開娛樂圈, 晚上電視節目訪問離開了娛樂圈近十年的【卡拉OK皇后】, 當年她的唱片公司為佢強勢宣傳, 在電視不斷購入廣告時段, 務求一定要將她的歌入屋, 但可惜當年的她一出道已非青春少艾, 樣貌亦不算標青, 加上是內地而來的姑娘, 雖然都算有點歌藝, 始終沒有太多觀眾緣, 極其量祗是用錢換來了點點名氣, 但她的【好朋友】老闆仍然一擲萬金的繼續力捧, 公費旅遊四處拍攝音樂錄影帶, 但唱片的銷量平平, 以致唱片公司經濟出現問題而被收購, 而據聞收購者的首要條件是要與【卡拉OK皇后】解約先有偈傾, 為了顧全大局, 她亦被逼引退娛樂圈, 轉眼間已經十年, 時間過得真快, 卡拉OK亦由LD變成VCD, 再變成DVD, 下一步會係點呢?

23.07.2004 (Fri) 晴
尋晚睇完【皆大歡喜】又去了運動場跑步, 中間草地足球場被租用, 成班後生仔在踢足球, 多了些【球迷】在運動場內, 都幾熱鬧, 因為驚大家有碰撞或者意外, 內圈幾條跑道被封了, 所以跑步的人都逼在外圈跑, 最討厭仍然係班師奶, 似在行街多過緩步跑, 阻住地球轉, 有個仲一邊行一邊傾電話, 真係頂佢唔順, 不過班師奶都唔算離譜, 因為竟然有足球員在休息的時候, 在草地上食煙, 晚上跑步己經要同草地爭氧氣啦, 條友竟然仲食埋煙, 青蛙仔見到真係火都離, 於是即時同運動場的職員投訴, 職員知道後就開大了咪在廣播, 場內禁止吸煙, 球員係即時收手, 但又點會將煙頭放入垃圾桶丫, 唔好話青蛙仔偏見, 食煙的人, 大部份都會係自私的, 有邊個在街上食煙會盛住煙灰呢? 始終都係任由隨處飄, 噴煙出來逼人吸二手煙, 仲要在運動場上, 真係想星佢兩巴!

16.07.2004 No.182

26.06.2004 (Sat) 陽光普照
真好, 又到周末了, 陽光普照得很, 不過最近元朗有蚊患, 以前就話驚瘧疾, 早前又話登革熱, 最新的就是日本腦炎, 都幾得人驚, 但蚊真係防不勝防, 都唔知點避好, 衛生署教市民的方法都係叫人開冷氣, 但青蛙仔偏偏係唔喜歡開冷氣的人, 唯有盡量少去元朗高危地啦, 不過順帶講下, 其實大家知唔知可以傳播日本腦炎病毒的蚊叫【三帶喙庫蚊】呢? 呢個【喙】字都幾蝦人讀, 青蛙仔好耐之前仲以為係個【啄】字, 但以前因為睇得黃玉郎的連環圖多, 【鷹喙】就即係鷹咀, 當時以為係【鷹啄】, 後來查字典先知係讀個【悔】字音, 都咪話連環圖無教育意義, 哈!

27.06.2004 (Sun) 陽光普照
又是星期天, 都係唔會太遲起身, 不過今朝唔去跑步, 睇下報紙雜誌, 仲係講緊新人王藏毒的事, 有其他唔關事的人又企出來講埋一份, 都係講自己有幾自愛, 唔會受誘惑, 無非都係搏見報, 好似在樂壇【唔覺佢勁】, 無端端又出來話之前接觸過【草】, 又話食過之後塊面浮腫, 對眼無神云云, 最攪野就係報紙登佢個樣偏偏就係佢所形容的樣, 都唔知有心定整蠱, 青蛙仔都覺得, 呢位仁兄明明細過自己好幾年, 在樂壇又唔係忙得咁緊要, 因咩事會殘成咁呢!

05.07.2004 (Mon) 陽光普照
最近【歌神】復出演唱會, 贏盡了不少口碑, 而且好似越演越落力, 越唱越夜益街坊, 無非都係為了唔同階段演出作宣傳, 但到底晚晚唱咁夜, 把聲沙唔沙, 大家似乎都唔太介意, 因為晚晚不同靚女及不同嘉賓撐場, 仲有埋佢大佬椰榆政府的戙篤笑, 成個雜錦家庭秀, 觀眾們就梗係覺得做得越長越抵睇啦, 但因為晚晚都唔知幾時收工, 於是管理場館的政府部門就聯同有關交通運輸的機構及部門向主辦單位發警告勸喻信, 內容大致上係請佢地專重合約精神, 唔應該睇佢心情而完場, 因為咁樣會令到好多部門都好難作出配合而調配交通, 而信中有較為強硬的詞句係提及【後果自負】, 主辦單位收到信之後, 仲唔大造宣傳反擊咩, 於是不少歌星亦出來力撐, 覺得政府部門唔應該出呢種信, 到了今日, 件事雙似乎已經有了共識, 同意於十二點十分前完場, 總算皆大歡喜, 其實青蛙仔覺得呢件事在於政府部門來講係完全無問題, 反而係主辦單位太過恃財傲物, 成日口口聲聲都向公眾話過時罰幾多照俾, 好似政府係好無理, 但又有無人想過, 如果當初唔係有合約, 講明過鐘要罰, 佢地肯唔肯俾先, 至於【後果自負】, 係因為當有觀眾因為遲散場, 夜了返屋企發生了事, 你估呢個責任會推向那一方呢? 青蛙仔覺得呢個部門一定走唔甩, 到時又會有D唔關重要的人走出來, 話部門任由單位超時, 攪到發生事, 況且, 晚晚唔同時間完, 場館的員工幾時放工先? 你就好ENJOY在接受觀眾歡呼, 班帶位員就晚晚要頂到深夜, 人地都有阿媽生, 唔係話你肯罰款就一定要做到咁夜, 火車、巴士, 要安排幾多車在等候你散場先? 預備定班列車在總站等候, 你阿哥一句今晚好開心, 又安歌多幾次, 班車開唔開走好? 過了尾班車之後, 使唔使安排加班車先? 如果唔安排, 觀眾又會賴邊度呢? 所以睇野真係要平心而論, 講野真係要中肯一點, 好似班撐【歌神】的歌星, 話觀眾有咁大個人, 自己會識執生早走, 完全覺得好似俾佢地唱通宵先合理, 但事實係點, 係唔係應該理智一點去分析下呢?

06.07.2004 (Tue) 晴
歐洲國家盃球賽完結，希臘隊爆冷勝出，正道出【Nothing is impossible】，【無事不可能】，最開心的除左希臘球迷之外，相信係贊助運動服的【三間愛迪達】，因為呢個小小奇蹟正正配合廣告的【士撈緊】：【Impossible is nothing】，其實青蛙仔之前都有睇過呢個廣告，亦有朋友問過青蛙仔呢句【士撈緊】通唔通順，不過青蛙仔讀得書少，對英文無研究，但總係覺得【Nothing is impossible】係通順過【 Impossible is nothing】，即係【沒什麼是不可能】會通順過【不可能是沒什麼】，有沒有英文高手可以指點一下？

09.07.2004 (Fri) 晴
晚上同兩老去大記食飯, 隔離檯係兩個好似樣的年輕人, 老爸問青蛙仔係唔係孖仔, 青蛙仔好肯定的回答係, 因為一兩年前曾經幫佢地辦過手續, 而其中一個唔記得係阿哥定細佬的智商較低, 不過一切起居及行為都與常人無異, 相信祗係低了少少, 但已經令人可以好好的反思一下, 一對雙胞胎可以有如此差別, 上天是否公平地對待呢? 那一個會較為開心呢? 其實以青蛙仔所見, 佢地兩兄弟的感情好好, 像是註定要走在一起般, 但將來的事誰會知, 正常的一個亦將會過正常人的生活, 一樣會拍拖、結婚，甚至生仔, 另一個逼於無奈都會被遺棄的, 忽然想起兩部好舊的電影：【手足情未了】及【龍的心】, 都是令人感動的電影, 亦想起自己有位要好的朋友亦有類同的情況, 雖然事不關己, 但仍然都有點感觸, 他的壓力真的很大呢!

10.07.2004 (Sat) 間中有驟雨
今朝打開份報紙，仍然係講及沙士疫症後的責任誰負，就算有人引咎辭職都仍然未能平息，真係好煩，所以都係揭兩揭就算了，青蛙仔反而覺得尋日AL放榜，有學生同學校爭拗的事件較為有趣，事緣係何文田有間學校的學生回校取成績，因為有部份學生除了著便服進入學校之外，仲染了髮及戴了耳環，校長認為校有校規, 唔守規矩會影響低年班同學有樣學樣, 於是就扣起成績單唔俾佢地, 要佢地換過校服再回來, 有學生認為學校的做法僵化無人情味, 唔體諒考生心情, 而且佢地已經行了畢業禮, 唔再係學生云云, 事件擾攘了四粒鐘, 學校先肯讓步, 青蛙仔都覺得校長係無做錯, 學校就係學校, 如果班學生認為自己咁叻唔再係學生, 唔該唔好再踏足入母校, 未入大學已經咁反叛, 將來出來做事都唔知變成點, 真係巴之閉, 不過如果青蛙仔係校長的話, 唔會阻人發達, 成績單係一定會發俾佢地, 不過既然佢地已經覺得佢地唔再係學生, OK, 得, 就搵個校工在校門外派成績單俾你囉, 唔該金毛戴耳環果D, 唔好行入來!

02.07.2004 No.181

14.06.2004 (Mon) 晴
今朝睇到單有趣新聞，有位做地產經紀的女士，慘被某收費電視台所害，手機一晚接百幾個來電，原來該電台的主持隨口講了一個由三次612組合而成的電話號碼，錯誤引導觀眾打入去，其實根本無遊戲玩兼無此號碼，最慘就係呢個老作號碼的頭八個字同該受害人的手電號碼吻合，於是成晚就要接聽無聊電話，後來先知原來係電視台的【好事】，於是即時打去電視台投訴，初時對方都係懶懶閒，後來先有負責人道歉並呼籲觀眾唔好再打去，並會給予受害人優惠價賠償云云，青蛙仔睇見覺得幾好笑，該主持人一向講野無句真，觀眾低能信錯佢亦唔奇，因為電視台的號碼一向無定係幾多個數字，因此以為係真號碼都無可厚非, 但因為機主祗係普通人一名, 所以電視台睬佢都傻, 錯了又如何? 如果出錯係名流官紳的手電號碼的話, 睇怕個主持都唔使再返工, 仲有, 賠償祗係俾個優惠價呢樣野, 唔該佢慳D啦, 好似人家好恨睇你個台咁, 青蛙仔就一點興趣也沒有, 要賠就唔該賠現金最實際!

15.06.2004 (Tue) 早上大雨，下午陽光普照
今朝仲差幾分鐘就到公司，忽然落起大雨，想懶得開遮都唔得，好在常備雨傘同埋早到公司，否則會好似幾位同事變落湯雞；大雨之下，開門都唔算太多人，但仍可以睇到人性自私的一面，大堂座位坐唔滿，帶傘的人就將水滴滴的雨傘放在隔離座位，有時真係好睇唔過眼呢種人，自己就坐得舒服，但就唔理會隔離係點，青蛙仔覺得呢種都應該係家教來的，平時遇著落雨搭巴士，青蛙仔寧願自己濕都絕對唔會整濕隔離位，但有好多人偏偏就係咁，買完菜都係照放隔離位，自私無倫，一代傳一代，如果有個人間判官，可以即時整治呢類人，你話幾好呢！

19.06.2004 (Sat) 晴，間中有雨
今日睇見單新聞好好笑，有幾個男人被控誘使他人作不道德行為(即係當街兜搭女子賣淫)，通常都係罰款了事，其中一位【老而彌堅】的七十歲阿伯向法官求情話佢無野做無收入，法官好幽默地問佢：【無收入但又有錢嫖妓？】，可能阿伯真係好有需要，寧願食少幾餐都要搵人幫幫手呢！而個法官最後都判佢罰款少過其他人，算唔算唔公平呢？而另一個被控的男人就話，本來祗係行下街，但因為位警花確係省鏡，於是先會上前兜搭，其實個警花心裡到底高唔高興呢？本來俾人話靚就梗係開心啦，但靚得來似雞就真係唔知好嬲定好笑了，如果唔信，下次試下同女仔講：【小姐，你真係靚到好似隻雞！】，睇下對方點反應?

20.06.2004 (Sat) 晴，父親節
今日係父親節, 先祝天下父親快快樂樂, 就算係母代父職的好媽媽都一樣要開開心心, 仔女都乖乖孝順, 雖然父親節比起母親節好似無咁大陣杖, 但好多商品當然都唔會放過任何值得宣傳的日子, 打開報紙都有唔少廣告係借父親節為名, 總之就願者上釣, 而青蛙仔就覺得馬會真係別有用心, 安排了今日舉行賽事, 俾做爸爸的可以先行玩下馬仔, 夜晚先同家人食飯, 做仔女的就可以有個空閒的下午, 晚上先做乖乖都唔遲, 大家又去邊度慶祝呢?

21.06.2004 (Mon) 早上有雨
今日太陽底下無新事, 忽然醒起了一件事想同大家討論一下, 青蛙仔有一位朋友在外國留學, 讀書期間認識了現今的太太, 大家感情有增無減, 直至完成大學課程然後一齊返香港, 之後各先都搵到份唔錯的工作, 不久就結埋婚, 好快之後仲有埋BB, 於是太太就疊埋心水在家湊小朋友, 無幾耐又再生第二個, 一家四口雖然係樂也融融, 但花了這麼多年時間在外國留學, 結了婚之後就在家相夫教子, 其實會唔會有點浪費呢? 不過話分兩頭, 如果唔係去外國讀書, 緣份又唔會安排佢地互相認識而結婚, 愛情確實偉大, 如果你係呢位太太, 會否願意犧牲呢?

22.06.2004 (Tue) 陽光普照的端午節
今日係端午節假期, 祝大家端午節快樂, 其實近呢幾年已經唔多注重呢個日子, 以前就話食粽同埋煲煲五豆粥, 而家青蛙仔同兩老都要注重健康, 食粽其實唔係咁有益, 所以都無買粽來食, 而五豆粥要煲好多個鐘, 三個人又唔食得幾多, 費時失事, 唔整好過整, 至於電視有無直播龍舟競渡都唔知, 因為青蛙仔一早起身就去了跑步, 連電視都無開, 祗係記得以往年年端午節都有機會落雨, 但今年似乎陽光普照, 天氣熱得很, 過埋今日, 寒衣真係可以收埋了, 哈!

24.06.2004 (Thu) 晴
今朝睇新聞有點唔開心，一位新晉正在上位的男歌手涉嫌藏毒被捕，真係幾失望，因為最近青蛙仔好睇好佢，成日有聽佢的歌，加埋見過真人覺得佢幾友善，而家仲拍埋劇，可以講話前途無限，但偏偏唔珍惜，大把人等機會上唔到位，上到位的又不知自愛染惡習，真係令人好無奈，最可笑的就係佢拍緊套劇的角色，本來係另一位歌手參演，但因為該位歌手早前又係被控藏毒而辭演, 估唔到.....唉!

25.06.2004 (Fri) 晴，間中有雨
今日睇報紙, 話題仍然係環繞樂壇新人王藏毒的事, 似乎人心惶惶, 好多人都有得震無得訓, 其實祗要行得正企得正就唔會驚二五仔篤背脊, 而家風聲鶴淚, 無理由仲咁蠢唔收下制掛, 不過真係好難講, 癮起上來唔通去賽馬會診所排隊飲美沙硐咩, 不過由呢單案又可以見到圈中的現實, 患難見真情就係呢個時候見到了, 不過青蛙仔真係好佩服家燕姐的人緣, 就連呢件事都為主角講好說話, 好一句【或者有朋友放住晌佢度先】, 大家圈中人, 今日講野留一線, 日後一定好相見, 俾著青蛙仔係新人王, 第日有機會見到家燕姐都會同佢見個禮!

18.06.2004 No.180

30.05.2004 (Sun) 早上晴, 下午大雨, 晚上晴
唔知大家有無留意最近地鐵的新廣告, 似乎都係有貶低女性的說法, 但確實現實中係有這樣的女性先抵死, 其中一個係在擠逼的空間內發現男朋友出暗瘡, 於是大驚小怪, 旁若無人的大叫, 並且一定要幫男友擠暗瘡, 討厭非常, 於是男友帶女朋友去飲涼茶解決此事; 另一對較為成熟, 在地鐵站內用【三知】電話, 女朋友明明在shopping, 但又要呃男朋友話去藝術館, 結果原來男友係遠在天邊近在眼前, 女朋友被揭穿仍然死撐, 其實熱戀中的男女係唔係永遠都唔會介意另一半所做的錯事呢? 青蛙仔覺得如果係一次半次有以上行為都唔算大問題, 但如果成日都係咁的話, 應該唔會忍得佢住, 靚過黎姿都係假(何況果兩位都唔靚), 閣下的男/女朋友又會唔會咁對你? 你忍得住嗎?

31.05.2004 (Mon) 晴，世界不吸煙日
今日睇到一單國際新聞都幾有趣, 有位愛爾蘭銀行的總栽, 因為辦公時間內瀏覽色情網頁, 在銀行內部定期檢查電腦時揭發了, 雖然那些色情網頁並非非法, 但此舉仍然不符合銀行的規矩, 所以佢都決定自動辭職, 損失了一份年薪超過一千五百萬港元的高薪厚職, 而一份資料顯示, 英國一千萬名網民中, 有三份之一曾經睇過鹹網, 又有七成人都係在上班時間睇, 原來有咁多人在上班時真係可以咁得閒, 仲日光日白都咁有需要, 青蛙仔識唔少朋友在香港的返工時間係需要上網搵資料, 但搵資料之餘會唔會去其他網, 又或者利用即時通訊軟件來與其他人聯絡呢? 如果公司會有好似愛爾蘭銀行的定期檢查電腦, 呢班朋友的職位真係危危乎, 哈!

04.06.2004 (Fri) 晴，十五年了
又一年了，今日是一個值得懷念、記念，定係悼念的日子呢？要平反還是由得件事變成歷史呢？誓要平反的又是怎麼樣的心態呢？為利益還是真的替犧牲了的人不值呢？下一代已開始成長，他們今晚也許會去燭光晚會，但有幾多會明白當中的真正意義，還是盲目主觀地認為單方面的錯，硬要揪出負責的人呢？道了歉又如何？國家就這樣會好起來？國民不自強，祗空講民主訴求，真的有用嗎？太多問題了。可否從日曆中刪除了這一天呢？

人氣樂壇組合【男孩子'z】的其中一位唔定性成員，在公司忍佢唔住之下，終於被懲罰，暫停所有工作，要佢重投校園，原因係逃學兼攪緋聞，仲暪住公司搵緋聞女友替新歌填詞，間接幫人新碟宣傳云云，青蛙仔真係替呢位成員可惜，大好前途竟然不知自愛，愛情盲目，喜歡個有才華但樣貌平平兼大過佢好幾年的家姐仔，真係令人跌眼鏡，不過青蛙仔對娛樂版的報導仍有少少懷疑，點可能製作唱片之時可以隨便用不知名人士所填的歌呢？就算真係有人力薦首歌，話係朋友所填，唱片公司都一定會見呢位填詞人，同佢簽約攪清版權手續，首歌先會灌錄出版，絕對唔會好似做戲咁兒戲，所以內情係點真係要佢地先知，不過好肯定係個男仔太唔聽話先令到公司行呢一步，年輕人真係要珍惜前途，大好機會人地恨都恨唔到，點解咁不知自愛呢？得十八九歲仔，拍遲幾年拖會死？不過拍拖都算，感情事係無人可理解，最抵死係食丸仔藏毒果種，未紅就話壓力大要減壓，好丫，無得撈就無壓力啦，求仁得仁了。

09.06.2004 (Wed) 陽光燦爛
今日放假一天, 天氣真的很好, 起身洗過面就去運動場跑步了, 十次八次跑步之後, 開始見到有熟口熟面的人, 大家會打個招呼, 在熱身或休息之時, 亦會傾談幾句, 有位阿叔好自豪地展示跑步前後的照片, 兩年前的他, 五呎六吋左右, 是個近二百磅的大肥佬, 因為有高升壓病, 經醫生勸喻要減肥兼戒煙, 於是由此就跑步減肥兼戒煙, 今時今日見佢雖然仲有個小肚腩, 但身型已經fit得好緊要, 祗係得一百四十磅以下, 雖然要用兩年時間, 但實在好好成績, 連病都無埋, 唔怪得佢可以咁自豪, 青蛙仔都幾羨慕佢, 亦加強跑步的信心, 不過阿叔話初期半年係跑極都完全唔會有進展, 要過了個熱身期先慢慢減磅, 直至而家, 如果唔跑就真係周身唔舒服, 青蛙仔覺得呢種人先應該上電視講瘦身心得, 短時期減幾十磅果種, 真係好難令人信服!

10.06.2004 (Thu) 晴
元朗南生圍山貝河的鱷魚仔終於落網, 擾攘超過半年的牠誤入羅網, 被漁護署的人員戰戰競競的生擒帶走, 發言人表示小鱷精神好好, 好happy, 而對於小鱷今後的安排, 會讓鱷魚在動物管理中心內居住數周，以便牠適應環境，之後會由嘉道理農場接收，待香港濕地公園2005年年尾建成後，才會把鱷魚送到濕地公園展出。其實咁多個月以來都有兩位叫做專家曾經嘗試捉小鱷, 但都無功而回, 今次無心插柳全靠漁民幫手, 小鱷雖然將會失去自由, 但牠將會一世受到保護, 一定無愁食用, 大家會喜歡這樣的生活嗎?

最近幾個月以來, 全國內地已經發現了唔少害人食物, 真係千奇百怪, 講得出的都可以用有害物質加工, 食用之後唔係致癌就係營養不良, 甚至即時死亡, 相信元兇一定會知道自己所做的事, 但仍然為了利益咁做, 本來呃秤就係無可厚非, 起碼唔會害人, 但加工食物就真係令人髮指, 中國有呢種害人精, 真係丟了全球中國人的架, 捉到真係要遊街示眾先再槍斃就最好!

13.06.2004 (Sun) 陽光普照
最近美容纖體的廣告真係汎濫得緊要, 都唔知邊間打邊間, 用唔同的藝人來號召, 確實又真係見到減肥(纖體)前後的分別, 不過青蛙仔真係好質疑成效, 到底祗係長期定係一時之效就真係佢地先知了, 不過最近青蛙仔又見到另一種美容廣告, 係永久激光脫毛, 可以幫你去除身體任何部位的難看毛髮, 但收費就真係勁貴, 如果要清除了腋下、大腿側、手及腳毛, 合共收費港幣四萬幾, 唔知真係有無人去試呢? 試完唔得又如何? 夾生電死毛囊令佢唔再生長, 對身體有無害架?

04.06.2004 No.179

16.05.2004 (Sun) 天氣十分好
官方已經否決了重辦搶包山的提議, 主辦單位仍然未肯放棄, 希望可以在長洲太平清醮之前爭取呢個項目, 以吸引遊客, 其實官方都有其難處, 在不肯定擔保所有參賽者無事的情況之下, 真係好難批准, 唯有開出了一難題, 要為參賽者買昂貴保險之外, 仲要戴頭盔同埋安全帶, 確實令人啼笑皆非, 但因為人命關天, 如果草率批准而又發生意外的話, 市民要責怪的一定唔會係主辦單位, 政府實會食多一棍, 大家應該要互相體諒, 唔搶包山就諗過第二樣啦!

18.05.2004 (Tue) 晴
今日睇見內地一單新聞都幾有趣，諗落亦幾值得人思考，黑龍江有一對夫婦生下一名女嬰，但丈夫覺得女嬰貌醜兼皮膚黝黑，而他自己樣貌不算差，妻子更是美人兒，因此覺得可能是醫院弄錯調了包，但妻子卻堅持女兒是自己的，丈夫再三追問之下，妻子終於拿出一張相片，相中女子貌醜皮膚黑，與女嬰如餅印一般，原來妻子在嫁夫之前因為貌醜而找不到對象，於是斥資一百萬往南韓改造自己成為美女，之後回國認識丈夫結合，丈夫知道真相後不能接事實，覺得妻子欺騙自己感情，於是提出離婚，妻子黯然帶著女嬰回鄉，故事完結了。就此看來，可能覺得像笑片的情節，但其實原來怎樣改變外表也改不了內裡基因，一個人是好是壞都是天生的，無論怎樣修飾，披著羊皮的狼，始終都是狼，修飾成美若天仙，披起新娘裝嫁得出又如何，真相終有一天會被揭發，日久見人心永遠都係至理明言。

21.05.2004 (Fri) 陰雨
最近的【三知】電話宣傳頗大，不過青蛙仔興趣不大，但都有朋友及同事購置了，不過聽聞部電話及網絡方面仍未完善，除左要久不久拎回代理更新軟件之外，仲未必係度度收到，同事同男友買左兩三個月，就成日為部電話煩惱兼嘈交，新的視像科技並沒有帶來方便與歡樂，結果全面退貨兼取消合約，長痛不如短痛，唯一最好的售後服務係可以全數退款，台費就用幾耐計幾耐(但其實回廠修理時間都頗長)，總算買了個新科技的教訓，青蛙仔就奇怪咁大間公司可以咁獊猝就推出呢種電話，雖然係食頭啖湯侵佔市場，但如果口碑太差可能會有反效果都唔定，不果而家電話的功能越來越多，所以越出越大部，風水輪流轉，再落去可能人人都會帶住一部多功能的小型電腦出街都未定。

睇報紙見到一單新聞，覺得真係好唔公平，兩夫婦身為高級知識份子，於醫學院居要職，搵錢應該唔少，但仍然都諗辦法騙馭取房屋津貼，但又愚蠢地老公買屋租俾老婆住，真係當政府係阿茂，紙包唔住火，終於被揭發，但最後祗判犯人交還騙取的金錢之外，不用受刑，祗係緩刑，且仲有機會繼續【服務社會】，這樣的判決對她懲罰了什麼？

22.05.2004 (Sat) 晴
真係好多年無接觸過【臭彈】呢樣野，尋日將軍澳一間學校就有學頑皮學生擲臭彈，攪到成間學校好似受恐怖襲擊咁，廿幾位師生聞到臭味之後不適，學校於是報警求助，全體送入急症室，可幸經過檢驗之後全部都無事出院，一個小小的惡作劇攪到咁大件事，相信擲【臭彈】果位學生都有排被責罰，不過報紙內文提及一件現實的事情，就係咁多人入急症室，每位都需要繳交一百元費用，校方就當然要家長支付，但家長又覺得學校在開學前已經預先收取了一百元，以備需要時的支出，如今果然發生事就應該校方支付，而且某些家長又認為應該由惡作劇的學童負責才對，一百元的原則問題，亦可以引出人性的一面，都幾有趣！

23.05.2004 (Sun) 陽光燦爛
今朝起身個陽光真係勁靚, 天都係藍色的, 有節目的朋友一定會好開心, 雖然青蛙仔無諗住去街, 但晨早收到消息知道張曼玉小姐再度獲得康城影展的最佳女主角, 都好開心, 雖然近年佢一直都低調過活, 任由狗仔隊點追點寫都好, 佢一樣我行我素, 但完全無荒廢演戲的功夫, 今次演一個戒毒的失婚婦人, 又再一次被認同, 實在為香港人爭光, 不過話雖如此, 青蛙仔覺得香港電影似乎已經容不下佢, 好難有一位導演可以與她合作發揮她的所長, 諗落反而有點惆悵!

梳洗完之後就食早餐睇報紙雜誌, 明周以【阿姐】的泳裝照作封面, 真係好難想像一個五十幾六十歲的女人仲可以以咁佳的狀態示人, 可能後生一輩會覺得一個近乎阿婆級的女人著泳裝仲有咩好睇, 但呢輯照片出街, 一定收效好大, 呢間纖體公司肯定會收旺場, 青蛙仔係【阿姐】多年的fans, 如今睇見佢仲可以【標尾會】, 真係幾令人安慰, 阿姐你好野!

25.05.2004 (Tue) 晴
相信大家都會有睇今日娛樂版, 偉仔的高尚情操可謂千年道行一朝喪, 竟然會口出酸葡萄的說話, 唔抵得人地十四歲就做影帝, 似乎有失自己曾經係影帝的身份, 而且大家都未知拍了數年的【數字電影】到底有幾好, 空口講白話都唔能夠證實套戲有無料到, 仲有評審團當中有徐大俠, 相信已經俾了友情分, 但仍然都係落敗的話, 似乎真係相差好遠, 其實身為一位老將兼大將, 應該不問收獲, 祗勞力耕耘先對, 又何必介懷呢?

26.05.2004 (Wed) 晴, 佛誕假期
今晚睇【旺角黑夜】, 青蛙仔對爾冬陞的電影一向有期望, 今次亦沒有失望, 除了演員做得好之外, 好多場面都好震憾, 如果有人認為【受難曲】的場面令人受唔住的話, 青蛙仔同你講, 原來祗係小兒科, 爾冬陞會話係知, 什麼才是真正的虐打, 睇見吳彥祖被打同埋張柏芝的表情, 真係好驚, 個人觀感覺得【旺角黑夜】雖然好似抄【PTU】的橋, 但青蛙仔覺得【旺角黑夜】更出色, 到睇完出到戲院外都仲係有點震憾感, 好在有成班好朋友一齊嬉笑下先唔會有事, 哈!

29.05.2004 (Sat) 間中有雨
晚上洗完碗之後在床上休息一會, 轉了平時唔睇的弱台來看, 因為三色台播放青蛙仔都有VCD的電影, 既然弱台台慶, 都想睇下有無特別節目, 其實開場有好多運動員做運動都算幾有氣勢, 但之後一班藝員表演籃球技術就真係失禮嘉實, 雖然相佢地都下過苦工, 但花式表演並非速成可以做得到, 因此睇到AC米蘭班球員掩住面, 真係做又辛苦睇又辛苦, 之後陳秀雯的歌舞表演應該可以做得更好, 有此表現都算盡力了, 但睇完全場未有太特出項目, 到底2004, 勢在哪裡呢?

21.05.2004 No.178

02.05.2004 (Sun) 晴朗的星期天
五一黃金周祗係頭兩日已經吸引近廿萬的內地同胞來港, 粗略一計己經知道遊客為香港帶來以億計的收入, 香港的旅遊景點全部都係遊客的天下, 金舖的人流直頭仲多過十蚊店的人, 買金好似買日用品咁, 香港的繁榮真係有賴國內同胞帶起, 其實祗要佢地斯斯文文乾乾淨淨, 守下規矩, 青蛙仔真係會好多謝佢地對香港咁幫手, 青蛙仔亦樂於讓路俾佢地觀光, 但真係希望做生意的人唔好趁呢個黃金期來欺騙顧客, 經營黑店唔係長遠辦法, 祗有正當手法做生意先可以有口碑傳出, 況且賺番來的錢亦使得安心, 呃番來的, 祗會用來買藥吧!

03.05.2004 (Mon) 晴
最近歌神為復出的事頻頻宣傳, 兩首新歌經已出街, 青蛙仔仔細聽過兩首歌, 老實講, 如果呢兩首歌係由其他人所創作而交去唱片公司的話, 真係好懷疑會唔會被錄用, 因為旋律熟口熟面, 歌詞祗係一般淺白的勵志歌, 而且其中的一首的結尾仲來個照抄, 將大家聽了多年的友誼萬歲的其中幾句搬過來, 好讓首歌更加易上口, 青蛙仔唔係咁大膽去彈呢兩首歌, 呢兩首歌確實有佢可取之處, 起碼都有鼓勵作用, 祗係覺得任何事情都要有背景支撐先可以事半功倍, 這樣的歌, 如果係歌神唱作就肯定會流行, 但如果係青蛙仔拎去唱片公司就真係丟入垃圾桶都嫌阻地方, 跟紅頂白就係娛樂圈的至理明言, 歌神復出確實係萬眾期待, 佢的好歌陪伴大家成長亦係事實, 但呢兩首新歌會唔會係有點過時, 大家有無諗過呢?

04.05.2004 (Tue) 早上有雨
今日係五四運動八十五周年，其實青蛙仔對歷史都係一知半解，祗係知道中國學生在多年來都在【爭取】，當然都有他們的理由與原則，但係時代越進步，年輕人就會越來越偏激，覺得社會欠佢地太多，因此有部份學生就唔安於本份，將求學與政治混埋一齊，雖然而家十八歲已經有投票權，未入大學已經有機會參與政治，甚至可以參選從政，但青蛙仔疑惑到底咁細個從政係真有理想抱負，定係唔使讀書都可以搏取優厚報酬呢？當然，香港的未來係有賴新一代去撐起，如果無學生對政治有興趣就好有危機，但學生們可否不要太偏激、不要凡事皆反，以平和的態度去處事呢？

06.05.2004 (Thu) 晴 今朝的電視及報紙新聞都著重報導尋日某大學的學生打鬥事件, 估唔到校園暴力伸展至大學校園, 明明係有益身心的籃球運動, 竟然會演變成毆鬥, 雖然祗係一小部份人, 但己經頗為影響大學生形像, 讀得大學就個個都係成年人, 文化水準亦應該比人高, 到底讀大學係為咩野, 點解會咁衝動咁唔識諗呢?

晚上睇電視, 三色台新聞部深入了健康產品公司, 作出揭露, 呢種公司利用老人家的貪念, 先俾少少甜頭佢地, 然後就推銷昂貴產品, 誇大了醫療的功能, 在舊區開設座談會, 像做show一般, 再搵一些聲稱食過用過產品的老人家來見證, 次次都座無虛席, 老人家接受了一些免費平價貨品之後就買下唔少貴價貨, 仲買完一次又一次, 電視台今次深入調查, 質疑了那些產品的成效, 為老人家做了件好事, 相信今次件事已經通了天, 行騙者應該會暫時聞風而遁, 不過可惜唔可以將佢地繩之於法, 要等個天修佢地, 真係好難!

07.05.2004 (Fri) 晴
今日報紙再報導大學生毆鬥事件，原來有幾分鐘的過程已被搬上網，據聞拍攝者顯得非常興奮，不停用粗口旁述，並清楚好多同學的名字或稱號，但似乎祗係志在拍攝撥火，並未有幫手化解或制止的意圖，青蛙仔暫時未有機會睇到，如果真係事實的話，青蛙仔覺得拍攝者的行為都幾有問題，雖然係拍攝了過程，令全世界知道事件的真相，但其出發點係唔係咁，都好令人懷疑!

08.05.2004 (Sat) 早上黑雨紅雨黃雨無雨
今朝洗完頭出來準備食早餐，電視新聞報導天文台發出黑雨警告，個心一點也不歡喜，心想又玩野呀？既然暫時唔使返工, 於是慢慢食早餐，然後開電腦上網，唔夠幾分鐘就見到新聞女郎帶住尷尬的笑容佈導已經由黑雨轉為紅雨，青蛙仔都估到唔會咁著數，唯有立即關機換衫返工，落到樓下見到管理員在忙碌地更換天氣消息的膠牌，又在呻被個天玩，哈！

13.05.2004 (Thu) 晴
尋日新聞片播出美國人被伊拉克人報復斬殺的片段，雖然最重要之處已被刪剪無得睇，但係網上傳播資訊係快到無倫，到了晚上大家已經睇到條片的足本，好多網民已經將檔案互傳，青蛙仔睇完唔算震憾，因為好多電影拍得比真實更真實，但相信都仍然嚇到好多人，青蛙仔真係唔知今次事件誰是誰非，祗係知道冤冤相報停不了，私人恩怨都可以用互不相見、各不相干來終止，但國家之間的鬥爭係唔同的，都唔知要持續幾多年先解決到了。

尋日青衣又有慘案，丈夫殺死妻子之後再自殺，又係因為【貧賤夫妻百事哀】引起，比丈夫後生十幾年妻子在內地本來有碧桂園靚樓住，但又要申請來港住屋�h，初時夫婦都尚算恩愛，但日子耐了，女的就要求高了，到住滿七年變成永久居民就萌去意，仲係非常決絕，青蛙仔覺得呢種根本唔係家庭問題，而係個人問題，一個內地女子肯嫁一個大自己十幾年的香港男人, 你估愛情真係咁偉大咩, 歸根究底係為咩, 相信唔使講都知, 青蛙仔久不久都眼見唔少內地少婦來港住滿七年之後就會走佬, 老夫暗啞底怕無面亦有, 苦苦追尋亦有, 但何苦要動殺機呢? 請不要將呢種慘案推落社會問題度, 青蛙仔覺得呢種係人格的問題來的!

07.05.2004 No.177

19.04.2004 (Mon) 晴
最近天水圍的家庭慘案有咁多唔關事的人出來遣責警署，似乎誓要追究到底，但青蛙仔真係唔明，點解反而無人話兇徒無人性，係都要抽出邊個差人處理不當，其實香港咁多無聊人，周之無日去煩警察局，投訴呢樣果樣，加埋惡作劇報假案班變態人，如果野野都開個file來處理，你話要用幾多人力物力先夠，家庭糾紛並非一日之寒可以形成，當事人都應該有責任，大家亦無從知道死者當時係點同個值日官投訴，點解攪到好似個差人先係行兇者咁呢？跟風鬧人者有無用腦架？

足球萬人迷的性醜聞一單接一單，青蛙仔對佢何B仔有咩特徵完全無興趣，反而覺得佢唔係老粗波牛咁簡單，因為佢識得用唔同的情慾短訊來哄女仔，非要有番咁上下文學根底先挑得動人心, 有時口講唔出的說話, 透過短訊又係真易出口好多, 而且仲容易感動人心, 難怪中國內地每年傳出的短訊以億來計算, 不過而家手機的科技比前幾年真係先進了好多好多, 竟然可以容納幾百條短訊儲存在手機內, 青蛙仔用緊部cheap cheap 8210, 祗係可以儲存十幾條唔係太多字的短訊, 儲滿就唔會再收到新訊息, 要刪除一部份先得, 想要好似萬人迷咁, 一定唔會傳得過癮, 哈!

20.04.2004 (Tue) 晴
今日報紙頭條係癱瘓漢去信特首要求安樂死，本來係大好青年，因為一次意外而癱了十多年，祗係得頭部有活動能力，現年祗係三十幾歲，真係唔知生趣何在，勉強支持活著又真係唔知為乜，所以艱辛地用口含著筆打電郵俾特首，希望要求安樂死，真係俾個難題特首，呢個討論了多年的人道問題，點會咁容易有決定丫，唔好話青蛙仔無人道，一向都贊成安樂死，因為條命係自己的，唔應該由其他人決定控制，有人活得堅強，有權堅持活在世上，但如果認為生存已經完全無意義，好像植物人或者癱瘓的人，點解一定要佢生存呢？無事無幹活得好地地的人就梗係想長命百歲啦，俾你同佢調轉，睇下你想生定想死？

22.04.2004 (Thu) 晴
癱瘓漢斌仔的要求安樂死，事件引起了很大迴響，反映出香港人愛心汎濫及諸事八卦的心態，有人睇到新聞之後，竟然自作主張向親友募捐，籌了三十萬，但唔係話你籌了錢人地就要收，斌仔的父親話自己唔係乞兒，使咩人捐錢，而其他人又話義載、又話要幫助買呼吸機及電動輪椅等等，又有名人出來勸喻斌仔應該學習其他癱瘓的名人積極面對人生云云，其實呢班人有無了解當事人的意願係咩呢？佢地咁多事攪咁多野，會唔會更增添了當事人及家人的麻煩呢？老人家日日被記者追訪、無端端有人話俾錢你，真係壓力大，就算真係做到好似超人基斯杜化李夫咁又點？俾你做啦！公眾人物講說話要小心就一定會鼓勵一番，都無可厚非，但係其他人點解係都要將自己的想法來安排人家的生命呢？

23.04.2004 (Fri) 晴
新一輪選民登記又再谷宣傳，選舉事務處又派了同事在大堂兜生意，爭取剛剛成年的人士成為選民，有好多都樂意，甚至主動要求登記，有些卻不願意登記，識青蛙仔耐都知道青蛙仔都唔係選民，除了政治冷感之外，亦唔覺得有邊個政黨做得好好，不過原來而家有好多人都自願成為選民，目的唔係話想投咩人，反而係唔想某黨獲選，所以專登要登記做選民，然後就投佢敵對一票，果然係用心良苦，青蛙仔就唔會咁攻於心計, 總之佢地邊便有本事就即管爭取票數, 損人不利己的事, 真係唔會去浪費時間!

25.04.2004 (Sun) 陽光普照
飯後睇三色台的籌款節目, 久違了的【伊麵】終於都以歌手身份【復出】, 容光煥發面帶笑容, 就好似今日的陽光一樣, 一首輕快的【心照】, 一聽就令人起雞皮, 並唔係話佢唱得唔好, 而係聽幾句已經覺得好好聽, 陳光榮呢位監製果等了伊麵好耐, 今次果然係幫佢度身訂造了首好歌, 唔使高難度, 唔使太痴情, 小品形式最適合佢唱, 青蛙仔幾年前非常欣賞伊麵的【我的歌】, 可惜佢唱片事業一直受制, 到今時今日終於逃出生天, 希望呢首歌可以替佢搵番咁多年所失去的啦!

26.04.2004 (Mon) 晴
內地的毒奶粉事件越揭越多，真係好唔明中國人點解可以咁無人性, 用品可以冒牌, 以假代真, 唔緊要, 因為唔會傷害人, 但點解要製造垃圾食物出來害人呢? 而家連奶粉都係假, 連初生嬰兒都唔放過, 賺了的錢真係會有命享? 唔通真係殺人放火金腰帶? 中國人其實好聰明, 但都要好好地利用, 取之社會, 用諸社會先係對, 為了自己利益而唔理人死活, 仲要俾外國人恥笑, 拉到應該要餵佢地食番自己的製品一年半載, 然後先再判佢地死刑就差唔多!

29.04.2004 (Thu) 晴，出糧日
最近兩套電視劇都係講及忘年戀, 男的起初都有位同齡的女士追隨身旁, 但後來認識了起碼細十幾年的女主角, 可能因為有新鮮感或者對方活潑可人, 因此就轉移目標, 戲就係咁做, 但其實現真之中的忘年戀是否真的有幸福, 而點為之忘年戀呢? 大十年? 十五定二十年呢? 青蛙仔每日都會見到一些夫婦, 男的年紀都有五六十歲, 拖住個三十來歲的老婆, 帶埋三幾歲的小朋友辦證件, 個男的樣子唔係劉松仁謝君豪咁款, 個女的到底貪佢咩好? 抑或貪來香港好呢? 家庭問題是否由此起呢?

23.04.2004 No.176

04.04.2004 (Sun) 陽光普照的清明及兒童節
今日係一個好特別的日子, 040404, 零舍零舍零舍........哈, 你自己覺得係點就點啦! 清明節遇著星期日, 所以聽日先有日補假, 都算唔錯了, 本來清明時節雨紛紛, 但今日竟然陽光普照, 比起舊年令任何人都灰暗暗來得精神, 希望以後香港真係有好日子過啦!

除此之外, 四月四日係兒童節, 但似乎唔多覺有咩特別節目慶祝, 可能青蛙仔一早起身祗係掛住做家務, 洗地吸塵都佔了唔少時間, 根本唔會開電視睇為兒童而設的特備節目, 況且識青蛙仔的人都知道, 其實青蛙仔唔係咁喜歡細路仔, 尤其係唔聽話的頑皮細蚊, 簡直係厭惡, 不過如果係聽話的小朋友又係幾得人鍾意的, 青蛙仔有唔少外甥同埋姪仔姪女, 現今已全部長大成人, 但在佢地兒童時代都有同青蛙仔一齊住, 所以一到兒童節, 青蛙仔都會買點小禮物哄下佢地, 不過通常都唔會買無謂野, 多數係買棋、砌圖, 或者係文具之類的益智野, 目的係想佢地可以多點用腦, 一件好的玩具確實可以啟發兒童的心智, 而家科技咁發達, 樣樣野都講求電子產品, 又有幾多小朋友識捉象棋呢? 而家送象棋俾小朋友, 可能嫌你cheap呢!

05.04.2004 (Mon) 晴
相信尋晚有睇香港電影金像獎的朋友, 都會俾三色台吹到啤一聲, 除了開頭兩三部份可以睇得舒服, 可以完全收到得獎者的感受之外, 但在之後就每一位嘉賓及得獎者都被催逼, 甚至無禮地斬纜播廣告, 真係唔明今次三色台控制時間咁差, 其實一個頒獎典禮最重要就係頒獎嘉賓同埋得獎者的妙語及感受, 應該每一位都要給予若干時間講說話先係專重, 黃子華果幾條唧都唔笑的最佳電影片段就應該唔使拍啦, 攪到連最佳男主角的得獎感受都要夾硬cut掉, 真係好唔應該, 到最後宣佈最佳電影之時, 直頭係上演另一齣亂世佳人, 連黃子華咁有急才都唔識得點應付, 直頭慘不忍睹, 真係近期最差的大騷, 不過青蛙仔又無咁得閒打電話去投訴, 其實免費娛樂真係唔應該要求咁高, 雖然佢係有逼人睇廣告, 但睇唔睇都有自己的決定權, 可以選擇去洗手間、食野, 甚至做任何野, 到正片先埋位都唔遲, 所以嘈過鬧過就算喇!

07.04.2004 (Wed) 晴
今日係成龍大哥的生日，據聞佢今年去了拉斯維加斯作慈善演出，唔會留在香港，青蛙仔每年都會在此默默祝福佢生日快樂，希望佢即將上影及拍攝的電影可以更上一層樓，再為港人爭光。

午飯時間本來想去銀行攪些自動轉帳的事，點知銀行多人到死，都係留待平日放假先辦算了，回程返公司之時，見到一班小朋友在空地玩遊戲，竟然係玩【何濟公】，真係好多年無玩過了，忽然好懷念童年時代好多唔使錢但又好好玩的遊戲，原來【何濟公】都未失傳，唔知【十字界豆腐】同埋【第一號報告總司令】仲有無人玩呢？

08.04.2004 (Thu) 陰，假期前夕
今日星期四竟然都係賣旗日，可能因為假期而提前了，籌款機構係東華三院，青蛙仔記起自己中學時代的唯一一次賣旗經驗就係幫東華，當時被選中真係幾開心的，因為見過其他同學賣旗好似好好玩，與三幾個熟同學柴嘩嘩半日，開心得來又覺得有意義，到自己有份幾乎開心到訓唔著，廿幾年前真係一分一毫的籌款, 有人俾一蚊五蚊已經非常闊綽, 軟野真係少之又少, 在街上募捐時仲非常緊張個錢箱，正一擔屎都唔偷食，但係而家時代已經唔同，久唔久就會睇到新聞有學生偷賣旗錢袋的錢而被發覺，到底係現今學生比以前的人更窮、還是家庭教育做得唔好呢、抑或物慾太吸引，令佢地把持唔住呢？

12.04.2004 (Mon) 陽光普照的復活節補假
晚上睇電視新聞片, 有高球運動員一桿入洞的畫面, 簡直係技術與運氣集於一身, 好像神推鬼撞的, 個波一直向著洞走, 真係神奇, 忽然想起青蛙仔旅遊之時, 買旅遊保險裡面其中有一條條款, 就係如果去到當地的高爾夫球場玩耍, 可以一桿入洞而又有當地球場發出的證明的話, 係會有一筆獎金, 當時青蛙仔諗極都唔明同旅遊保險有咩關係, 但今晚忽然明白, 保險係保你萬一有意外就得到賠償, 其實有意外唔一定係人身受損或被搶劫之類, 一桿入洞都仲唔係意外, 你話係咩喇, 哈!

14.04.2004 (Wed) 早上有雨, 和暖
最近元朗天水圍區發生了唔少家庭糾紛案件, 最近仲有男子涉嫌將妻子及兩女兒殺害, 案件仍在調查中, 各界開始責怪唔同政府部門互相推卸責任, 其實青蛙仔覺得清官難審家庭事, 現今咁多香港果人轉移向內地娶妻, 根本未有深刻了解就速速成親, 自然問題多多, 青蛙仔工作關係都眼見唔少老夫少妻, 男的大多數係莽夫一名, 女的就花姿招展, 還要生埋小朋友, 到女的落到來香港, 可能都未穩定就露出真面目, 簡直契弟走得摩, 當然亦有唔少男人對妻子唔好, 以為娶佢返來就要為奴為婢, 百般凌辱, 女的為了仔女及面子, 祗有死忍, 甚至像今次案件中賠上性命, 實在令人無奈, 總係想問, 點解年紀大了就一定要搵個伴呢? 何必要累人累己?

16.04.2004 (Fri) 早上有雨
尋晚的六合彩Jackpot又被人一票獨吞，派彩近四千萬，真令人羨慕又妒忌，不過早前同同事提起，如果真係中幾千萬，會搵邊個陪去領獎，而且當時環境會係點呢？雖然已經登記了，但如果去到領獎之時，有職員話叫你將張飛交俾佢，然後在房等候，大拿拿幾千萬要交俾佢，你信唔信先？可能就算祗係等幾分鐘已經好似等成世了，其實馬會有無一套既完善又令得獎人舒服的安排呢？青蛙仔未中過大獎，亦無聽聞有朋友中過，所以領獎方式都仲係一個謎，總之如果要將幾千萬交俾個陌生人去核對，都咪話唔緊張！

09.04.2004 No.175

21.03.2004 (Sun) 晴，國際睡眠日
唔係睇新聞都唔知今日係國際睡眠日, 目的係喚起各人對睡眠的關注, 其實好多人都有睡眠病, 但又覺得唔算係病, 所以根本唔會去延醫, 青蛙仔touch wood講聲, 自己雖然唔算有良好睡眠習慣, 但總算無睡眠病, 祗係好偶然先會訓唔著, 又或者心情唔好先會失眠, 其餘時間都係上床後好快入睡, 可能因為自己好多時都睡眠不足, 所以總係覺得好眼睏, 一上床就會好快進入夢鄉, 雖然睡眠不足都係唔健康, 但青蛙仔覺得過多的睡眠真係幾浪費時間, 亦奢侈得很, 所以每日的平均睡眠時間應該唔會過七小時, 相信比起好多有慣性失眠的人, 已經好好了。

22.03.2004 (Mon) 晴，世界淡水日
尋日係睡眠日，今日就係淡水日，意思即係想大家善用水，切勿浪費，但自從上年爆發沙士之後，每人都特別注意了個人及家居衛生，用水量自然係大大增加了，洗手洗地的次數都多了, 而且更加用多了漂白水及綠水之類的清潔劑, 其實唔多唔少都對自然生態有影響, 其實係真係好難兩全其美, 文明社會一開水龍頭清水就會源源不絕供應, 其實好多落後地方, 水仍然都係好珍貴的東西, 一個人的力量係好微, 但全世界的人, 每日都慳一杯水的話, 就會慳出一個湖來了, 保護環境, 係應該由自己做起的!

23.03.2004 (Tue) 晴
最近有【歌神】之稱的樂壇始祖醞釀復出，並且事先張揚會幾時開演唱會，連嘉賓都預埋係【高妹】同【傻大姐】，傳媒想報導第一手消息，當然就要追蹤當事人，但【歌神】可能養尊處優多年，樣貌變得【富泰】了，所以對於狗仔隊將他提早曝光不甚滿意，竟然報警驅趕，並聲稱會打消復出念頭，青蛙仔唔明點解咁多藝人作了決定之後又唔算數，係都要在最高峰時令歌影迷失望，到自己想搵錢或者想過癮又話復出，但又要唔俾記者影，仲要講埋晦氣說話, 青蛙仔就唔多信佢因為有記者影相而唔復出, 祗係扭下計咋掛!

25.03.2004 (Thu) 陰雨，涼
終於有樂壇前輩出來講下對【威廉孔】的意見，毫不留情地指出事實的真相，其實吹捧佢的人當佢係偶像定係小丑，大家都心中有數，當記者問及歌唱老師杜麗莎女士，如果【威廉孔】想跟佢學唱歌會點，杜女士直言叫佢返去讀書，青蛙仔覺得如果一個對音樂無天份、五音不全兼且聽覺對音律唔敏感的人，要教到佢成為歌唱家，真係難得很，倒不如將天才發揮在自己的長處上仲實際，無謂浪費大家時間，今次的批評對杜女士來講，祗係直腸直肚，有碗話碗，但青蛙仔對娛樂版的標題就不苟同，話杜女士狂踩【威廉孔】，講出事實都叫狂踩？擺明裝人彈弓啦！

28.03.2004 (Sun) 陰，涼，香港植樹日
原來今日係香港植樹日, 其實青蛙仔已經有好多年都無做園藝的工作, 反而前半生可能屋企有地方可以種野, 所以都幾有興趣, 所謂種豆得豆, 種豆真係收成好快, 屋企煲紅豆粥, 祗係抽起幾粒放在花盆埋在坭裡, 好短時間己經有豆出來, 剝開豆殼見到裡面的新鮮紅豆, 那份喜悅真係唔同買回來的, 另外, 亦種過辣椒、吊蘭、文竹, 甚至桔仔, 樣樣都種得唔錯, 但係後來搬入狹窄的公屋環境之後, 完全放棄了, 將來如果有機會的話, 仍是希望可以玩下園藝過日辰, 因為種植始終好過養寵物, 如果打理得好的話, 盆栽係會長命過自己, 起碼少了份傷感!

29.03.2004 (Mon) 陰雨，涼
相信好多人都知外國已經可以成功複製動物，青蛙仔今日睇報紙知道, 美國三藩市的基因技術公司, 竟然會推出寵物複製的服務, 祗要客人付出港幣近四十萬就可以將死去的寵物複製, 即係在寵物未離世之前, 抽取基因樣本, 待寵物去世之後就可以複製貓狗出來, 青蛙仔睇完真係有點驚, 明明已經死了, 偏偏又會有代替品重生, 到底主人可唔可以接受, 又會唔會真係可以拎得起幾十萬出來買回另一條生命, 再回頭已是百年身, 複製出來的貓狗真係會同以前一樣嗎? 如果再係咁落去, 會唔會真係好似衛斯理的小說, 有複製人出現, 之後【正本】遇上有咩事, 就會將【副本】的心肝脾肺腎割出來用呢? 人人都唔死得, 真係有違自然定律, 到時人口爆炸, 地球都一樣會爆炸, 人類始終都會自取滅亡!

30.03.2004 (Tue) 雷暴警告，出糧日
娛樂版報導有教育工作者不滿在教院畢業的港姐拍攝的宣傳片, 因為楊小姐說及不喜教師的刻板生活而報名參加港姐, 因此令教育工作者覺得不滿, 並且認為該宣傳片有歪曲事實、打擊教師士氣之嫌，更要求三色台停播該宣傳片及作出道歉, 而楊小姐亦解釋一切都祗是照稿讀, 並沒有不尊重教育工作, 希望觀眾不要介意, 青蛙仔覺得今次楊小姐的自白並不不妥, 就算唔係跟稿讀, 祗係說出心裡面的感受又如何, 個人意見又唔代表一切, 青蛙仔亦覺得教師工作確係刻板, 任憑教師們講到自己的工作是一門專業、講求創意等等, 當然無娛樂圈咁多姿多采, 係無可否認, 況且如果身為教育工作者, 更加唔應該就呢件事來作出投訴, 因為老師唔係應該要明白事理, 黑白分明兼且大方得體咩? 點解會咁小器呢? 真係唔明!

03.04.2004 (Sat) 晴
復活節假期快到, 電視與電影為了爭取兒童觀眾, 同樣地都會播影【多啦Ａ夢】, 亦即係青蛙仔以前叫開的【叮噹】, 確實【叮噹】幾十年來真係陪伴了唔少人成長, 今日睇報紙知道, 日本的一位學者, 樣樣都唔研究, 偏偏研究【藤子Ｆ不二雄】的【多啦Ａ夢】有幾多件法寶, 原來足足有1,963件, 真係佩服作者的科幻頭腦, 可以每一集都有唔同的法寶, 因為讀者總係貪新忘舊, 如果集集都用同一件法寶的話, 根本唔可能吸引到人睇咁多年, 相信大家接受重覆使用的都會係【隨意門】與【時光機】, 其餘就一定要有驚喜先好畫出來, 而且每一次都會有唔同的教育意義, 不勞而獲的行為往往會受到教訓, 作為一位漫畫作者, 可以有作品被大學教授研究, 真係今生無悔, 真係【小貓也自豪】了!

26.03.2004 No.174

04.03.2004 (Thu) 晴，寒冷警告
最近部電腦有點失靈，時常無故hang機，有時打一篇文章到近埋尾之時就停頓了，心血化為烏有的感覺，可能會因此形成抑鬱症，有時電腦唔係百份百可靠，反而白紙黑字仲有保障，尋晚同好朋友傾起寫信的話題，早幾年未流行網上溝通，分隔遠方的朋友會以書信聯絡，可能還來得熱情與純真，加上筆跡可以顯示一個人的性格，生動文字的感覺係電腦字及不上的，而且信件還可以拿出來回味，每次感覺都未必相同，每個階段再看都會覺得成熟了，不過近年青蛙仔已經棄掉數以千百計的舊信件，祗留下一小部份，又並非好有記念價值，祗係家裡仍然有空間同埋懶得去攪，所以就由得佢吧, 大家又保存了多少信(包括情信)呢?

05.03.2004 (Fri) 晴，驚蟄
今朝睇報紙，真係驚歎醫學進步得咁緊要，西班牙有一男子因車禍而斷臂，經接駁之後，因為傷口發炎又要再度切除來處理傷口，但驚條手臂因時間而壞死，竟然可以暫時接駁在大腿共用某些組織，直至手臂傷口正常之後，又再駁回正常位置，手術十分成功，圖片上見到該男子的大腿上依附了一條手臂，頗似恐怖片的特技化妝，真令人意想不到，該名男子見到自己條手臂接在大腿上有咩感受呢？會唔會試圖用腦去控制移動隻手呢？

10.03.2004 (Wed) 陽光普照
睇新聞知道最近美國有一人氣新星【威廉孔】好快就會出碟, 青蛙仔覺得呢個真係現代版【國皇的新衣】的故事, 相信年輕一輩的朋友都在網上看過佢的演出, 其實當初有人將佢參賽的片段放上網, 祗係當笑話般一樣, 但因為佢被評判叮了之後, 講了些【盡了力, 無悔】之類的說話, 令人覺得好同情佢, 反而令佢忽然令人關注起上來, 商業社會就係商業社會, 唱片公司當然唔會放過呢個機會, 將佢變成商品推出來搏大家一笑, 青蛙仔就覺得呢個奇貌不揚兼五音不全的人, 根本唔係做歌星的材料, (當然可以係唱歌的材料, 因為祗要有聲就人人都可以唱歌, 好唔好聽係另一回事), 但佢確實係令唔少人得到歡樂, 所以仍然可以當商品推出來, 佢亦會得到佢所想要的；講起佢被叮走之後所說的話, 相信每一位曾經參加過歌唱比賽的人都在心中講過類似的, 因為好多人都對自己極有信心, 表演慾極強, 未唱完首歌就被人叮走確實係侮辱, 其實青蛙仔覺得【威廉孔】參賽當日已經被善待, 起碼可以唱了大半首歌, 記得青蛙仔在好多年前參加一個電視台的歌唱比賽, 由電視台開始排隊試音, 一直排到成條廣播道都係參賽者, 因為時間所限, 要在一日之內揀出幾位出來, 因此幾乎係每人唱兩句就被叮走, 仲點會有時間俾你騷首弄姿, 青蛙仔揀了一首無人敢唱的南音【神雕大俠】(當年由劉德華主唱)來吸引評判, 先可以全段唱完先被叮, 結果順利入選, 但有時比賽都要講天時地利人和不同因素, 最緊要睇得開, 唱歌最緊要係為興趣先唱得開心的, 能夠入圍、被發掘，甚至成名就當係BONUS啦!

11.03.2004 (Thu) 陽光普照
一年度的財政預算案已經公佈，似乎公眾對唐爺頗為接受，沒有太多反對聲，青蛙仔一向都唔會有意見，不過對於年底推出的自選車牌號碼又覺得幾過癮，因為青蛙仔以前都有想過擁有一個代表自己的車牌，好似JF1962之類，都幾好玩，其實外國好多地方的車牌都係自定，香港都算遲起步，財爺的智囊團終於可以諗到用來增加收入，又對民生無大影響，都算唔錯，至於有人驚恐會有炒風及對以往拍賣唔公平，青蛙仔又唔覺得好大問題，因為心頭好人人唔同，每人的價值觀都唔同，八個位的又豈能同六叔的6號車牌比呢？至於炒賣就更難，八個位的組合仲要係字母加數字，真係好難壟斷了

16.03.2004 (Tue) 晴
青蛙仔的工作上會接觸一些年輕人，佢地好多都係在球場打波之時唔見身份證，確實球場真係好多老鼠，祗係幾十秒時間，就會成個袋都俾人抽走，其實有關當局都有關注呢類罪案，於是近日就在幾個球場放置了不鏽鋼儲物籠，好讓使用者安心運動，但唔知咩人作出決定，呢款鋼籠除了要自備鎖頭之外，設計十足十寵物店的狗籠，一條條疏罅鋼條方便直搗黃龍探囊取物，最安全的地方就係最危險之地，真係唔知設計者有無設身處地諗下，如果自己去用呢個籠會唔會有安全感，專家到底係天才定白痴，有無人知？

18.03.2004 (Thu) 晴
唔講真係唔知，原來一般家庭安裝濾水器係會有機會觸犯法例，因為水務署供水已經符合衛生標準，如果裝置濾水器反而會積聚污染物，如果無定時更換，污染物有機會倒流而令全幢大廈的食水受污染, 所以如果真係要裝濾水器, 係需要有牌的水喉匠向水務署申請, 確保濾水器唔會倒流食水先用得, 水務署發言人更指出, 其實如果見水質呈現黃色都應該無問題, 祗係鐵質比較豐富, 市民無須信某些濾水器廣告誇大話會引致癌症, 可幸青蛙仔住的屋苑水質都算唔錯, 如果要飲用黃色的水又真係幾為難, 雖然證實無害, 但心理上始終都唔多好過!

20.03.2004 (Sat) 晴
青蛙仔好耐之前提過，而家好多年輕人講野會係唔係都加個【囉】字在尾，乜乜囉、物物囉咁，青蛙仔工作上需要問客人的名字，如果聽到對方在自己的名後加個囉字，覺得佢都幾無禮貌，但無奈都要照樣招呼佢，不過有時都要睇自己係咩名先好加個囉字，因為今日青蛙仔個拍檔問個女仔的名，可能對方又係【囉字輩】，呢位小姐名叫【XX珠】，佢講完自己個名之後就順口加個囉字, 青蛙仔聽完真係笑出來，其實佢都可能聽到青蛙仔笑, 但又唔知係咩事, 估唔到有人會自稱豬囉, 哈!

12.03.2004 No.173

23.02.2004 (Mon) 晴
最近不斷有假網站出現, 冒充唔少銀行套取客戶資料, 當然上網經驗夠的人就一定唔會被騙, 最有可能被騙就係新玩e-banking的人, 連銀行的網址都未攪清楚就入錯謀人寺了, 其實呢樣野都唔怪得人, 但今日報紙又報導有網站冒充馬會, 收取客戶入會費就可以預早提供六合彩的 特別號碼, 即係話未開獎就知道號碼, 你話邊會有咁著數的事丫, 青蛙仔反而覺得如果有人因而被騙的話, 佢地又真係唔抵可憐, 咁無腦的 人, 真係抵佢地要交學費學精了!

24.02.2004 (Tue) 晴
今朝睇報紙真係好笑，有個五十幾歲的婦人又中了電子黨的計，損失了萬多元，騙徒的手法千篇一律，睇怕記者都可以將舊稿改了受騙者同銀碼就可以登出來，不過今次事件有少許不同，事主竟然話有睇警訊，仲知道有呢種行騙手法，不過就唔知點解會被騙，青蛙仔睇到覺得真 係好笑，有咩點解丫，歸根究底都係個【貪】字，唔係貪又點會被人呃呢？

26.02.2004 (Thu) 晴
報載入境處每年耗用紙張於表格上達千萬張，因此希望可以推廣網上填表，以減少浪費，青蛙仔眼見浪費紙張的情況確實係頗嚴重，每份申請表都有多頁的說明，如果一家幾口拎幾份，份份都有說明就會好浪費，加上通常人的心態係拎多一兩份無蝕底，返到屋企墊煲底就一件 事，而且好多家長為了讓小朋友安靜，亦會求其拎份表格俾佢地塗鴉，所以每日都見有唔少廢表流落在大堂，其實想要保諼環境, 真係要由 家庭教育開始, 連大人都無環保意識, 又點會教得好細路呢, 要香港變得更好, 似乎條路仲好遙遠!

27.02.2004 (Fri) 晴，出糧日
今朝拎起份報紙嚇了一嚇, 睇見娛樂版頭頂的小標題, 寫住【某女歌星遇扑頭黨, 頭骨爆裂險死】, 不過青蛙仔眼細睇錯個險字做【而】字, 雖然唔係佢fans, 但都好驚訝, 即時打開內文來睇, 睇真先知自己睇錯, 有時差一個字就差之毫厘, 謬之千里, 所以凡事都一定要小心求證, 唔好盡信自己的一廂情願, 亦唔應該對傳聞盡信, 如果青蛙仔無睇清楚就將消息傳出去, 青蛙仔的朋友又信到十足, 一傳十, 十傳百, 再在網上傳開去........真係好驚!

01.03.2004 (Mon) 晴
下午去銀行打完簿之後，經過元朗大馬路，有小販在擺檔賣玉吊墜，木頭車上寫著玉器公司執笠貨，全部賣十蚊一粒，而每件貨都綁在咭紙上，並印有價錢牌，由二百幾到三百幾不等，如果係真的話又幾抵，佢部木頭車都唔算細，成車鋪滿各式的小玉墜，吸引了唔少人來揀，青 蛙仔反正未夠鐘開工，於是亦停低湊熱鬧，睇下會唔會有青蛙型的，不過大都係十二生肖或者係一些不規則型狀的，講真青蛙仔就唔信佢原 價真係賣咁貴，價錢可以任佢貼都得，不過顧客見到覺得抵，加上羊群心理，人買自己唔買就好蝕底，加上檔主同顧客講：【唔好問我邊粒 靚，玉係跟人的，好講緣，鍾意就得。】可惜青蛙仔又揀唔落手，不過反而留意到檔主都有在成堆之中揀揀下，揀中就收埋唔賣，到底係同 舊玉有緣所以唔賣，抑或知道唔止值十蚊呢，青蛙仔無再考究就走了。

02.03.2004 (Tue) 陰雨，稍涼
方向報新聞講及十載友情因財因義, 有銀行女助理經理, 因為豪賭而欠下數十萬巨債, 無力償還之際, 醒起好友上司有百多萬存款在銀行, 於是冒充對方簽名, 轉帳了八十萬到自己戶口應急, 之後再向其自首, 聲稱以後會每月攤還, 結果不為上司原諒, 其上司還即時報警處理, 將其拘捕, 就算唔係先斬後奏, 開口求對方商借幾十萬, 相信對方都可能未必會應承, 其實到底友情何價, 有朋友開聲問你借錢的話, 底線 會係幾多呢? 自己銀行確實有百多萬, 但唔代表可以借八十萬出來, 所以犯案者想過度過, 寧願冒險然後自首可能仲會有一線生機, 不過有 時誠信係一個好大的問題, 朋友失去誠信就已經唔再係朋友, 不過如果係青蛙仔俾人咁樣【借錢】的話, 祗要對方即時回水都仍可俾對方一 條生路, 但以後一定唔會有朋友做, 如果錢已經還了俾債主的話, 話之佢以後無得還都一定會報警, 雖然代價好大, 但犯錯者一定要得到教 訓, 俾著你又會點做呢?

03.03.2004 (Wed) 陰，黃昏寒冷警告
晚飯後睇電視音樂節目, 見到小休復出的【尊奴】, 氣息好得很, 而且有種大個仔的感覺, 說話應對小心翼翼得來不失成熟, 來捧場的幾位fans亦大膽露出真面目支持, 相信呢幾位並非傳聞中的職業fans吧? 訪問中他坦然說不介意別人接不接受佢, 祗希望人家不要盲目跟隨指責, 先認真看看他的工作才作出批評, 事實上真係好多人根本無睇清楚佢, 祗係跟風憎人富貴厭人窮, 其實睇清楚下佢首新歌【真功夫】的舞步, 雖然有點刻意的花巧, 但真係唔易跳, 唔信? 你跳下丫! 不過講真, 佢型像上的設計仍然有待改進, 明明一個唔高大的人, 點會叫佢又裙又 褲一齊著架, 太累贅了!

27.02.2004 No.172

09.02.2004 (Mon) 陽光普照，寒冷警告
睇報紙報導了三單燒炭事件，有一單係自殺，一家唔知一家事, 就算係幾有錢都一樣有難言之隱, 原來金錢真係唔可以萬能, 不過唔知點解, 青蛙仔真係好尊重了結自己生命的人的意願, 條命係佢自己, 當然係想過度過先有此決定, 佢唔想活在世上, 總有理由, 苟且偷生都唔會開心, 由他吧! 另外兩單係因為知識貧乏，因天寒而燒炭取暖，導致缺氧死亡，尼泊爾籍母親用原始方法燒炭燒木與女嬰一齊取暖, 結果釀成 慘劇, 而任職看更的男子亦以同樣方法因而命喪, 此兩單新聞令青蛙仔覺得自己非常幸福, 雖然不是富有人家, 但於嚴寒天氣中, 仍可以與 兩老安坐家中, 開著暖氣共聚天倫, 另一方面卻有有人冷死街頭, 幸福唔係必然, 事實上, 每個人都應該要多行善事, 就算今世得唔到好報, 都希望可以帶落下一世!

11.02.2004 (Wed) 陽光燦爛
睇報紙報導香港一個美食博覽，煤氣公司同電力公司大鬥法，【明火】鬥【無火】煮食，青蛙仔以一個入廚過來人來講，【明火】又真係好鑊氣過無火，電爐煮野總有好似滾唔起，但係就會比較安全，而燉湯炆牛腩之類用【無火】就會較為原汁原味，總之各擅勝長，如果住豪宅 的話，最好有齊【明火爐】、【無火爐】、【焗爐】加【微波爐】就為之very good了。

13.02.2004 (Fri) 晴，黑色星期五
晚上睇新聞得知芭比公仔竟然在情人節前夕同男朋友阿Ken分了手, 該公司發言人仲煞有介事的開記招公告全世界, 話佢地祗係各有各空間, 真係令人啼笑皆非, 可能青蛙仔係男性, 所以自細到大都唔鍾意呢個虛榮心咁重, 成日由朝換衫換到晚的公仔, 但又真係好多女仔喜歡幫佢 換衫, 仲儲埋唔少有關佢的產品, 而家芭比同男朋友手, 會唔會係因為銷量下跌, 公司想出下奇謀製造話題呢? 無論點都好啦, 當笑話睇都 唔錯!

14.02.2004 (Sat) 晴，情人節
今日係情人節了, 其實呢個節日都唔一定係俾有情人專有, 一樣可以對身邊的人來個熱切的祝福與慰問, 青蛙仔在此祝大家情人節快樂, 情人當然要甜甜蜜蜜的度過開心時刻, 獨身的都祝你早日如願, 請你開心的過日子吧!

16.02.2004 (Mon) 晴
真係人紅沒法擋，傻大姐歌手替衛生署拍了條牙齒保健的宣傳片, 本來都唔會有好多人關注, 但今日竟然就因為呢件事而見報, 仲要係頭條新聞, 因為生產商的疏忽, 竟然在幾萬隻免費派發的光碟之中, 混了一張四級變態影片, 有家庭【幸運地】獲贈了一隻, 仲齊齊當飯後甜品 的觀賞, 嚇到阿爸關機都關唔切, 事後就向報館投訴, 鬧有關當局唔抽查光碟內容, 而有關當局亦即時作出道歉, 其實青蛙仔覺得件事都唔 怪得曬當局, 明明係生產商有問題, 就算抽查都未必抽得中果小部份有問題貨品啦, 希望件事一人行一步, 就咁算啦, 唔好希望有咩賠償定 驚啦, 當係自己的彩數啦, 幾萬人都抽唔中, 係要自己抽中中, 好好留番佢做記念啦, 呢件事件, 最大得益應該係傻大姐, 因為方向報頭條 就係佢個名, 仲大大張相登出來, 真係至發係佢!

香港總係有個怪現象, 就係一係唔發生事, 有事發生的總係會一單接一單, 一件大鑊過一件, 好似校園暴力事件, 相信自盤古初開以來都有, 祗不過係無人正視, 苦主就唯有啞子吃黃蓮, 其實唔少電影都有講出呢個社會問題啦, 不過大家都當係娛樂性質的故事咁睇, 直到爆大鑊有 人受傷報警先會有人跟進, 之後其他人就會慌死蝕底不斷挖出來伸冤, 不過咁都好, 起碼都可以令受欺凌的弱小可以抬起頭來做人, 惡人始 終有惡報的!

19.02.2004 (Thu) 晴
娛樂版報導唱片公司即將替幾個月前發生交通意外以致嚴重創傷的歌手推出唱片，呢位前輩歌手死過翻生，一次意外已經唔可以回復以往一樣，但歌手曾經都算為唱片公司搵過錢，寫俾【小鳳姐】的一首自傳式歌曲紅極一時，才華洋溢, 而且佢自己的聲線亦好獨特, 雖然唔算大 紅, 但好多佢自作自唱的歌仍然都令人難忘, 而發生意外之前亦差不多錄完整隻大碟, 準備推出, 可惜......., 其實新一代的年輕人已經唔 會記得佢係邊位, 但相信大家都會有睇過一個日本食店的廣告片, 如果青蛙仔無聽錯的話, 應該係蔡先生的作品, 短短幾十秒已經覺得首歌 極有流行原素, 非常好聽, 唔知新碟會唔會收錄埋呢首歌呢? 希望可以流行起來, 讓他在療傷中得以安慰吧!

20.02.2004 (Fri) 晴
今朝巴士站排了長龍，青蛙仔排得好後，後來來了一部吉車，總算安心，點知部車的前門壞了，乘客要從中間上車再行去車頭俾錢嘟機，然後再行番轉頭搵位，初時都尚算順利，但漸漸樓下坐滿之後，好多人因為好快落車而唔願上樓上，於是就逼在樓下塞住通道，青蛙仔見到有 些人都無去車頭俾錢就直接上樓上，不過青蛙仔就唔理人地咁多，自己大聲同車長講聲落車先嘟機，總好過俾人估估下係唔係乘機搏懵，其 實一程車都係四蚊雞，真係無必要呃，係睇自己做唔做得出吧，無俾錢上車總係唔多自在, 要記住落車俾錢, 費時到真係唔記得之時, 俾司 機認得叫番轉頭就瘀皮了!

13.02.2004 No.171

27.01.2004 (Tue) 陰，連續八日寒冷警告
年初六的早上, 天文台話會回暖少少, 但青蛙仔都係唔多覺, 仍然係幾凍下, 香港已經破了紀錄, 連續第八日寒冷警告了, 話雖如此, 其實比起外國地方的低溫, 真係有點小巫見大巫, 香港最凍都祗不過係幾度, 就已經全民皆縮, 甚至有凍死人的情況出現, , 但好多地方的冬天, 凍起上來, 零下幾十度都有機會, 真係幾難想像點生活, 雖然外國度度都會有暖氣開放, 但總會有點機會係個人暴露冷空氣中掛, 風如刀割 的場面, 真係諗起都驚, 哈, 香港始終係福地, 過幾日又會回暖了, 春天還會遠嗎?

梅姐雖然已入土為安, 但死後仍然有不少是是非非, 今日娛樂版就報導有關其經理人與纖體美容公司老闆娘的對話被錄音傳出來, 事情真係 沒完沒了, 人都死了, 一切合約都應該跟隨梅姐而去啦, 再打官司真係對死人不敬, 兼且大家都渡有把握, 結果似乎係律師最受惠吧!

28.01.2004 (Wed) 陰，初七人日
今日初七人日, 先祝大家生日快樂, 身體健康, 人人開心!

晚上煮完飯之後如常洗碗, 到最後沖水的階段竟然出了小小意外, 沖洗菜刀之時忘了方向, 竟然用刀鋒輕輕拖了自己的右姆指背一下, 當堂 出了一道一吋長的血痕, 可能因為沖水關係, 血即時出來, 青蛙仔不敢再沖, 即時按住傷口止血, 腦裡閃過了今年沖太歲的念頭, 又會咁準? 希望呢個血光之災已經可以化解一切衰運, 由而家開始可以開開心心就好了!

29.01.2004 (Thu) 晴
唔知最近大家有無收到病毒電郵, 佯裝係由科大寄來, 題目係【TEST】, 但附件就係一個壓縮檔, 不過大家記住千祈唔好開啟, 否則真係唔知會有咩事發生, 青蛙仔最近都收過兩三次呢種郵件, 但一向係唔會開啟來歷不明的附檔, 所以唔會中招, 希望各位小心d啦!

30.01.2004 (Fri) 晴, 回暖了
最近除了怕凍之外, 日日都聽到睇到有關東南亞有禽流感肆虐, 都害死了一些人命, 幾個國家都嚴陣以待, 對有關禽鳥有殺錯無放過, 香港到現時為止都尚算安全, 最近青蛙仔家都仲會買雞來食, 因為一向都喜歡炆雞, 唔會食半生不熟的白切雞, 所以安全度好高, 不過記起早兩 年前都曾經全面殺雞, 有宗教團體批評會令亡魂過多, 得不到超度, 其實萬物都係有生命, 但會唔會每樣野都有靈魂就真係不得而知, 既然 投得胎做雞, 相信都算係一種懲罰, 繼而再被滅殺, 可能根本就係因果, 祗係睇唔透的人先會覺得佢地死得唔抵, 可能會有冤魂, 其實冥冥 中有主宰, 可能一次過大量殺生其實係一次大赦, 可以令佢地盡快再投胎都未定呢?

03.02.2004 (Tue) 雨，寒冷警告
政務司司長曾蔭權今日啟程赴日本訪問三日, 據聞日本將會送個大禮俾佢帶俾香港人, 就係手持特區護照去日本, 將會有機會免簽證, 相信此舉真係會多了香港人考慮去日本旅行, 亦會因此而考慮放棄申請【啤奀噢】, 青蛙仔正是祗得一本【啤奀噢】護照的人, 而且剛剛已經到 期, 如果在短期內想出外旅行的話, 就要再申請護照, 而【啤奀噢】的價錢真係貴特區好多, 而且最近又出現印尼要手持【啤奀噢】的人士 簽證, 雖然青蛙仔應該都唔會去印尼, 不過從種種的著數看來, 青蛙仔都應該會在未來的日子申請特區護照去旅行算了, 真真正正做個中國 香港人, 大家又用邊本護照呢?

04.02.2004 (Wed) 整日下雨，寒冷警告
今日睇報紙, 有段庭外和解的新聞好想討論一下, 一名男子因為用礦泉水開奶俾嬰兒飲用, 以致小朋友腹瀉, 竟然都可以告飲品公司, 話佢誤導, 令佢以為用礦泉水機的熱水都可以開奶, 青蛙仔就覺得呢件畸士都幾無理, 係人都知嬰兒的腸胃唔係咁適宜亂飲野架啦, 水機的熱水一來未必夠熱, 二來礦泉水唔同蒸溜水, 雜質好多, 自己用來沖奶, 飲病左個小朋友就賴人地, 真係好無理, 不過飲品公司為了息事寧人, 結果要賠了幾千蚊俾佢, 所以話, 呢個世界真係惡就得, 一如市民去政府部門辨手續, 乖的個待遇未必唔好, 但唔乖而且惡人先告狀的人, 一定受到禮待兼快靚正送佢走, 你話邊有公平丫!

06.02.2004 (Fri) 晴，寒冷警告
今日天氣終於稍為好轉, 但仍然都係寒冷非常, 真係唔明外國居住的人可以耐寒得咁緊要, 香港祗係凍幾日就已經令全港市民怕怕, 稍為好少少的有品牌暖爐竟然被搶購一空, 羽絨厚褸的銷量亦大大增加, 打邊爐亦係禦寒的最佳動作, 不過青蛙仔估唔到今日方向報的頭條新聞竟 然祗係講打邊爐咁小事, 報導食得多會引起腸胃不適, 除此之外, 另一以半版報導的篇幅乃係【便秘困擾百萬港人】, 同樣都係與腸胃有關, 加上禽流感在內地肆虐的報導, 證明健康真係好重要, 香港已經漸漸向好兼且太平, 呢幾日又冷得緊要, 似乎壞新聞都被冷藏了, 大家都係 記緊要注意健康!

07.02.2004 (Sat) 雨，寒冷警告
晚上睇電視播放傑出華人年輕音樂家李雲迪的特輯, 年紀輕輕的他, 成就無可置疑, 由細到大都刻苦練功, 與很多有成就童星出身的演藝人一樣艱辛, 都係失去童年, 連睇卡通片都係一種奢侈品, 甚至如果唔練琴的話, 家長就會連電視都搬走, 任由佢點傷心都硬住心腸, 有得必 有失, 想有一門技能就要犧牲好多野, 結果終於都成功, 揚威海外, 確實係極大的光榮, 祗係廿一歲的他吸引了唔少fans的仰慕, 不過以青 蛙仔一個老男人的眼光來看他, 祗是一個普通年輕人的樣貌, 總不覺得他是一個美少年, 好多時看到報導及訪問, 記者或採訪者都會客氣地 稱讚他好靚仔, 甚至與日本的木村拓哉相提並論, 成名的人總會受人推崇, 青蛙仔在想, 如果他祗是中國內地一位藉藉無名的藝術家, 還會 有人這樣讚他嗎?