Milan, la città del fòlbal

El rest d'Italia el podarà anca vess ona nazion de sant, poeta e marinar, 'me se dis solitament, ma Milan l'è propi la città del fòlbal. I sò dò squader, l'Inter e el Milan, hinn de sicur tra i pussee important del mond, e hann giamò vinciuu on sacch de Scudett (el campionaa italian), Còpp di Campion (o Campionaa di Campion, Champions League, 'me se dis adess) e on poo di alter coppett assortii (Còpp Italia, Còpp di Còpp, Còpp UEFA e via discorrend...)

L'INTER, la squadra di bauscia, la gh'ha avuu i sò moment pusse bon in di ann sessanta quand l'allenator l'era l'Helenio Herrera e ghe giogaven denter di campion 'me 'l Sandro Mazzola, el Giacinto Facchetti, el Luisito Suarez e 'l Mariolin Corso, "el pee sinister de Dio". Anca se, a differenza di cusin del Milan, la squadra l'è mai andada in serie B, i ann settanta e vottanta hinn staa brutt assee, ma intant la squadra l'è reussida a vinc on quaj Scudett istess, l'ultim grazie al Giovann Trapattoni, on ex-giogador del Milan diventaa l'allenator pussee bon de tucc i temp. Cont el Lothar Matthäus e 'l Giusepp Bergomi l'ha miss su ona squadra che l'ha battuu tucc i record: el giogava anca el Walter Zenga, el porter Italian miglior de semper. In di 'sti di chì l'Inter l'è tornada la squadra pussee forta d'Italia: con gent 'me el Ronaldo, el Djorkaeff, el Pagliuca, el Moriero e 'l Giusepp Bergomi (semper lu...) l'è de sicur tra i favorii per vinc el campionaa de quest ann. Speremm....

El MILAN, la squadra di casciavid (on riferiment a l'origin pussee popolar de la squadra) l'è vegnuda famosa per i sò dò period de forma: vun in di ann sessanta anca lee e vun in di ann novanta. Grazie ai sò campion de l'Olanda, el Van Basten e el Gullit, pussee di alter, l'ha vinciuu on poo de Còpp e de Scudett. L'è andada in serie B dò volt (ona perchè i sò giogador aveven scommiss su di partit de la sò squadra e l'altra perchè hinn rivaa terzultim....)

Di partid in campionaa, i DERBY, 'me ghe disom, ne ha vinciuu pussee l'Inter, ovviament.

La situazion al di d'incoeu l'è questa chì: