Enya

La fenomeno di Enya povas semblar astonigiva, ma multa faktori helpis elu: ondo iranta adsupre di spiriteso aurore di la nova ero, chanjemeso nepreferate kam populara kansoni qui kompozesas nur ek refreno e qui tristigas la muzik-amanti, la fatigeso di la monolinguismo (me mem dicez la danjero di la kultural endogamio) e la kuriozeso deskovrar altra loki di nia mikrega planeto, yen kelka cirkonstanci tre favoroza por Enya, la pure vocala sorcistino.

Elua admiranti ne havas spektakli. La amas-komunikili devas saciesar per la strikta minimumo de interviuvi nur por savigar ke elu existas. La savo de elua privata vivo limitizesas a damzeleso e senmezura amo por muziko. Apene onu savas elua nasko-dato ed elua restado en monakineyo. Desfacile traktebla por jurnalisti e por socio quale la nia ube bruisego egalesas valorigo. Yen elu rikomencas kun altra disko "La maxim bona da Enya" qua kontenas du nova kansoni e bonege elektita kansonaro. Parolar pri Enya nur quale la kantistino di la Nova Ero (mem se ico ne es desvera) signifikas neglektar la kelta radiki ek qui elu prenas sua inspiro. La kelta mitologio es apud la latina mistikismo por krear vera transepokala muziki qui sorcas la orelo nedistingante la nacionaleso o linguo. Parolar pri Enya, koncentrante su pri la personeso mem di la kantistino es sakrilejo: plur-foye Eithne (quale pronuncesas Enya Irlandane) klarigis ke Enya es tri personi: e Niki Ryan e Eithne e Roma Ryan qui, ensemble, parturis Enya (do ta tri personi parturis Enya). Se mankus un ek iti, Enya simple esus nultempe aperinta.

Enya Nibhraonain (o plu exakte: Eithne Ni Bhraonain) es elua nomo. Irlandane (Eyre) la peco "Ni" signifikas "unika filiino di" e la altra "Brennano" (o Bhraonain), do olu signifikas "unika (o segun me plu vere unika) filiino di Brennano". Es hodie nur kelka parti di Eyrio ube homi fluante parolas la Eyra linguo. Elu venas de un ek ita loki. En Eyrio Enya pensigas pri sam-nomizita legendala feino. Me probos dividar kun vi, en la venonta dii, traduko di olu. Olua denaska linguo es la Eyra, e kande elu komencis irar a la lerneyo elu esis obligata studiar la Angla. Riveninte heme elu riuzis la Eyra. Elu naskis ye la 17ma di mayo 1961 en mikra vilajo nomizita Gweedore quo trovesas en Grafio Donegal en la Nord-estala regiono di Irlando. Es tote sovaja ruro kun dispersita dometi. Ne es vilajo: via maxim proxima vicino es atingebla nur pos multa disto.

Same kam Marjorie Bolton, elu amas kati. Enya asertis, ke nultempe li lasis leporaji an olua pordo-mato: "li es tre inteligenta kati. Tre atencema".

Du inklin(aj)i guidas la kreado di ica pagini pri Enya: existas tre dispersita e diversalingue TTT-eyi qui esus kunliginda. Anke Ido-parolanta amanti di la muziko di Enya povus ensemble tradukar internaciona-lingue la poezio di Enya.

Mea nemankebla nemankenda ligilaro