Few More Interesting Ghazals……
kyaa sarokaar ab kisii se mujhe
Zia Jalandari
kyaa sarokaar ab kisii se mujhe
vastaa thaa to thaa tujhii se mujhe
behisii kaa bhii ab nahii.n ehasaas
kyaa huaa terii beruKhii se mujhe
maut kii aarazuu bhii kar dekhuu.N
kyaa ummiide.n thii zi.ndagii se mujhe
phir kisii par na aitabaar aaye
yuu.N utaaro na apane jii se mujhe
tera Gam bhii na ho to kyaa jiinaa
kuchh tasallii hai dard hii se mujhe
kar gaye kis qadar tabaah 'Zia'
dushman, a.ndaaz-e-dostii se mujhe
kaash mai.n tere hasiin haath kaa ka.ngan hotaa
Wasi Shah
kaash mai.n tere hasiin haath kaa ka.ngan hotaa
tuu ba.De pyaar se chaao se ba.De maan ke saath
apanii naazuk sii kalaa_ii me.n cha.Dhaatii mujhako
aur betaabii se furqat ke Khizaa.N lamho.n me.n
tuu kisii soch me.n Duubii jo ghumaatii mujhako
mai.n tere haath kii Khushbuu se mahak saa jaataa
jab kabhii "mood" me.n aa kar mujhe chuumaa karatii
tere ho.nTho.n kii mai.n shiddat se dahak saa jaataa
raat ko jab bhii tuu nii.ndo.n ke safar par jaatii
mar-marii haath kaa ik takiyaa banaayaa karatii
mai.n tere kaan se lag kar ka_ii baate.n karataa
terii zulfoln ko tere gaal ko chuumaa karataa
mujh ko betaab saa rakhataa terii chaahat kaa nashaa
mai.n terii ruuh ke gulashan me.n mahakataa rahataa
mai.n tere jism ke aa.Ngan me.n khanakataa rahataa
kuchh nahii.n to yahii benaam saa ba.ndhan hotaa
kaash mai.n tere hasiin haath kaa ka.ngan hotaa
Dayaar-e-Gair me.n kaise tujhe sadaa dete
Wasi Shah
dayaar-e-Gair (unknown place) me.n kaise tujhe sadaa dete
tuu mil bhii jaataa to tujhe ga.Nvaa dete (to lose)
tumhii.n ne ham ko sunaayaa na apanaa dukh varanaa
duaa vo karate ke ham aasamaan hilaa dete
hame.n ye zom (illusion) rahaa ab ke vo pukaare.nge
u.nhe.n ye zid thii ke har baar ham sadaa dete
vo teraa Gam thaa ke taasiir (effect) mere lahaje (style) kii
ke jis ko haal sunaate use rulaa dete
tumhe.n bhulaanaa hii avval (firstly) to dastaaras (within reach) me.n nahii.n
jo iKhtiyaar (control) bhii hotaa to kyaa bhulaa dete
tumhaarii yaad ne ko_ii javaab hii na diyaa
mere Khayaal ke aa.Nsuu rahe sadaa dete
sama'to.n (hearing power) ko mai.n taa-umr (life long) kosataa (blame) "Syed"
vo kuchh na kahate magar ho.nTh to hilaa dete
Sataa sataa ke hame.n ashk-baar karatii hai
Wafa Roomani
sataa sataa ke hame.n ashk-baar (tearful) karatii hai
tumhaarii yaad bahut beqaraar karatii hai
vo din jo saath guzaare the pyaar ke hamane
talaash un ko nazar baar baar karatii hai
gilaa (complaint) nahii.n jo nasiibo.n ne kar diyaa hai judaa
terii judaa_ii bhii ab ham ko pyaar karatii hai
kinaare baiTh ke jis ke kiye the qaul (promise)-o-qaraar
nadii vo ab bhii teraa i.ntazaar karatii hai
Qariib maut kha.Dii hai, zaraa Thahar jaao
Saifuddin Saif
Qariib maut kha.Dii hai, zaraa Thahar jaao
qazaa (death) se aa.nkh la.Dii hai, zaraa Thahar jaao
thakii thakii sii fazaa_e.N, bujhe bujhe taare
ba.Dii udaas gha.Dii hai, zaraa Thahar jaao
nahii.n ummiid ki ham aaj kii sahar dekhe.n
ye raat ham pe ka.Dii hai, zaraa Thahar jaao
abhii na jaao ki taaro.n kaa dil dha.Dakataa hai
tamaam raat pa.Dii hai, zaraa Thahar jaao
phir is ke baad kabhii ham na tum ko roke.nge
labo.n pe saa.Ns a.Dii hai zaraa Thahar jaao
dam-e-firaaq (moment of separation) me.n jii bhar ke tum ko dekh to luu.N
ye faisale kii gha.Dii hai, zaraa Thahar jaao
Kabhii Kabhii mere dil me.n Khayaal aataa hai
Sahir Ludhianvi
kabhii kabhii mere dil me.n Khayaal aataa hai...
ke zi.ndagii terii zulfo.n kii narm chaao.n me.n
guzarane paatii to shaadaab ho bhii sakatii thii
ye tiirgii jo merii ziist kaa muqaddar hai
terii nazar kii shuaao.n me.n kho bhii sakatii thii
ajab na thaa ke mai.n begaanaa-e-alam ho kar
tere jamaal kii raanaaiiyo.n me.n kho rahataa
teraa gudaaz badan terii niim-baar aa.Nkhe.n
i.nhii.n hasiin fasaano.n me.n maaho rahataa
pukaaratii.n mujhe jab talKhiyaa.N zamaane kii
tere labo.n se halaawat ke ghuu.NT pii letaa
hayaat chiikhatii phiratii barahanaa-sar, aur mai.n
ghanerii zulfo.n ke saaye me.n chhup ke jii letaa
magar ye ho na sakaa aur ab ye aalam hai
ke tuu nahii.n, teraa Gam, terii justajuu bhii nahii.n
guzar rahii hai kuchh is tarah zi.ndahii jaise
ise kisii ke sahaare kii aarazuu bhii nahii.n
zamaane bhar ke dukho.n ko lagaa chukaa huu.N gale
guzar rahaa huu.N kuchh a.njaanii guzar_gaaho.n se
muhiib saaye merii simt ba.Date aate hai.n
hayaat-o-maut ke pur_haul Khaarazaaro.n se
na koii jaadaa na manzil na roshanii kaa suraaG
bhaTak rahii hai Khaalaao.n me.n zi.ndagii merii
i.nhii.n Khalaao.n me.n rah jaauu.Ngaa kabhii khokar
mai.n jaanataa huu.N merii ham-nafas magar yuu.N hii
kabhii kabhii mere dil me.n Khayaal aataa hai
Niiyat-e-shauq bhar na jaaye kahii.n
Nasir Kazmi
niiyat-e-shauq bhar na jaaye kahii.n
tuu bhii dil se utar na jaaye kahii.n
aaj dekhaa hai tujhe der ke baad
aaj kaa din guzar na jaaye kahii.n
na milaa kar udaas logo.n se
husn teraa bikhar na jaaye kahii.n
aarazuu hai ke tuu yahaa.Naaye
aur phir umr bhar na jaaye kahii.n
jii jalaataa huu.N aur ye sochataa huu.N
raa_egaa.N ye hunar na jaaye kahii.n
aao kuchh der ro hii le.n ‘Nasir’
phir ye dariyaa utar na jaaye kahii.n
kisii kalii ne bhii dekhaa na aa.Nkh bhar ke mujhe
Nasir Kazmi
kisii kalii ne bhii dekhaa na aa.Nkh bhar ke mujhe
guzar ga_ii jaras-e-gul udaas kar ke mujhe
mai.n so rahaa thaa kisii yaad ke shabistaa.N me.n
jagaa ke chho.D gaye qaafile sahar ke mujhe
mai.n ro rahaa thaa muqaddar kii saKht raaho.n me.n
u.Daa ke le gayaa jaaduu terii nazar kaa mujhe
mai.n terii dard kii tuGiyaaniyo.n me.n Duub gayaa
pukaarate rahe taare ubhar ubhar ke mujhe
tere firaaq kii raate.n kabhii na bhuule.ngii
mazaa mile i.nhii.n raato.n me.n umr bhar ke mujhe
zaraa sii der Thaharane de ai Gam-e-duniyaa
bulaa rahaa hai ko_ii baam se utar ke mujhe
phir aaj aa_ii thii ik mauj-e-havaa-e-tarab
sunaa ga_ii hai fasaane idhar-udhar ke mujhe
Giriftaa-dil hai.n bahut aaj tere diivaane
Nasir Kazmi
giriftaa-dil hai.n bahut aaj tere diivaane
Khudaa kare ko_ii tere sivaa na pahachaane
miTii miTii sii ummiide.n thake thake se Khayaal
bujhe bujhe se nigaaho.n me.n Gam ke afasaane
hazaar shukr ke ham ne zubaa.N se kuchh na kahaa
ye aur baat ke puuchhaa na ahal-e-duniyaa ne
baqadr-e-tashnaa-labii pursish-e-vafaa na hu_ii
chhalak ke rah gaye terii nazar ke paimaane
Khayaal aa gayaa maayuus rahaguzaaro.n kaa
palaT ke aa gaye ma.nzil se tere diivaane
kahaa.N hai tuu ke tere i.ntazaar me.n ai dost
tamaam raat sulagate rahe dil ke viiraane
ummiid-e-pursish-e-gamkis se kiijiye ‘Nasir’
jo mere dil pe guzaratii hai ko_ii kyaa jaane
dil me.n ik lahar sii uThii hai abhii
Nasir Kazmi
dil me.n ik lahar sii uThii hai abhii
koii taazaa havaa chalii hai abhii
shor barpaa hai Khaanaa-e-dil me.n
koii diivaar sii giri hai abhii
kuchh to naazuk mizaaj hai.n ham bhii
aur ye choT bhii na_ii hai abhii
yaad ke benishaan jaziiro.n se
terii aavaaz aa rahii hai abhii
shahar kii becharaaG galiyo.n me.n
zi.ndagii tujhako Dhuu.NDhatii hai abhii
tere Khayaal se lau de uThii hai tanahaa_ii
Nasir Kazmi
tere Khayaal se lau de uThii hai tanahaa_ii
shab-e-firaaq hai yaa terii jalavaa-aaraa_ii
tuu kis Khayaal me.n hai, ai ma.nzilo.n ke shaadaa_ii
u.nhe.n bhii dekh ji.nhe.n raaste me.n nii.nd aa_ii
puukaar ai jaras-e-kaaravaan-e-subah-e-tarab
bhaTak rahe hai.n a.Ndhero.n me.n tere saudaa_ii
rah-e-hayaat me.n kuchh marhale to dekh liye
ye aur baat terii aarazuu na raas aa_ii
ye saanihaa bhii muhabbat me.n baarahaa guzaraa
ki usane haal bhii puuchhaa to aa.Nkh bhar aa_ii
phir us kii yaad me.n dil beqaraar hai 'Nasir'
bichha.D ke jis se hu_ii shahr shahr rusavaa_ii
vo dil navaaz hai nazar shanaas nahii.n
Nasir Kazmi
vo dil navaaz hai nazar shanaas nahii.n
meraa ilaaj mere chaaraagar ke paas nahii.n
ta.Dap rahe hai.n zabaa.N par ka_ii savaal magar
mere liye ko_ii shayaan-e-iltamaas nahii.n
tere ujaalo.n me.n bhii dil kaa.Np kaa.Np uThataa hai
mere mizaaj ko aasuudagii bhii raas nahii.N
kabhii kabhii jo tere qurbme.n guzare the
ab undino.n kaa tasavvur bhii mere paas nahii.n
guzar rahe hai.n ajab marhalo.n se diidaa-o-dil
sahar kii aas to hai, zi.ndagii kii aas nahii.n
mujhe ye Dar hai ki terii aarazuu na miT jaaye
bahut dino.n se tabiyat merii udaas nahii.n
naye kapa.De badal kar jaauu.N kahaa.N, aur baal banaauu.N kis ke liye
Nasir Kazmi
naye kapa.De badal kar jaauu.N kahaa.N, aur baal banaauu.N kis ke liye
vo shaKhs to shahar hii chho.D gayaa, ab Khaak u.Daauu.N kis ke liye
jis dhuup kii dil ko Tha.nDak thii, vo dhuup usii ke saath ga_ii
in jalatii bujhatii galiyo.n me.n ab Khaak u.Daauu.N kis ke liye
vo shahar me.n thaa to us ke liye auro.n se milanaa pa.Dataa thaa
ab aise-vaise logo.n ke mai.n naaz uThaauu.N kis ke liye
ab shahar me.n is kaa baadal hii nahii.n, ko_ii viasaa jaan-e-Gazal hii nahii.n
aivaan-e-Gazal me.n lafzo.n ke guladaan sajaauu.N kis ke liye
muddat se ko_ii aayaa na gayaa sunasaan pa.Dii hai ghar kii fazaa
in khaalii kamaro.n me.n ‘Nasir’ ab shammaa jalauu.N kis ke liye
ye bhii kyaa shaam-e-mulaaqaat aaii
Nasir Kazmi
ye bhii kyaa shaam-e-mulaaqaat aaii
lab pe mushkil se terii baat aaii
sub_h se chup hai.n tere hijr nasiib
haae kyaa hogaa agar raat aaii
bastiyaa.N chho.D ke barase baadal
kis qayaamat ki ye barasaat aaii
koii jab mil ke huaa thaa ruKhsat
dil-e-betaab vahii raat aaii
saayaa-e-zulf-e-butaa.N me.n 'Nasir'
ek se ek naii raat aaii
Jab Meri Haqeekat
Jab meri haqeekat ja ja kar, unko jo sunayee logon nay,
Kuch sach bhi kaha kuch jooth kaha, kuch baat banayee logon nay !
Dayain hain hamesha zulm-o-sitam, duniya nay mohabaat waalon par,
Do dil ko kabhi milnay na diya, deewaar uthayee logon nay !
Aankhon say na aansoo poch sakey, hothon pay khushi dekhi na gayee,
Aabaad jo dekha ghar mera, to aag lagayee logon nay !
Tanhayee ka saathi mil na saka, rusvai mein shaamil shaher hua,
Pehlay to mera dil tod diya, phir Eid manayee logon nay !
Is daur mein jeena mushkil hai, ae `Ashq' koi aasaan nahin,
Har ik kadam par marnay ki, ab rasam chalayee logon nay !
Khuli Jo aankh
Khuli jo aankh to woh tha na woh zamaana tha,
Dehakti aag thi tanhayee thi fasaana tha !
Gamon nay baant liya hai mujhay yun aapas mein,
Ki jaisay main koi loota hua khazana tha !
Yeh kya ki chand hi kadmon pay thak kay baith gayey,
Tumhay to saath mera door tak nibhana tha !
Mujhay jo meray lahoo mein bigo kay guzra hai,
Woh koi gair nahin yaar ik purana tha !
Kahin Sher-o-Naghma
Khumaar Barabankavi
KahiN shair-o-naghma ban ke kahiN aasuoaN meN dhal ke
Woh mujhe mile to laiken mile soorateN badal ke
Yeh wafa ki sakht raheN, yeh tumhaare paae nazuk
Na lo inteqaam mujh se, mere saath saath chal ke
Wahi aankh bebaha hai jo ghamae-jahaN meN roaye
Wahi jam jam-e-jum jo baghair-e-farq chalke
Yeh chirag-e-anjuman to haiN eak shub ke mehmaaN
Tu jala woh shamma aiy dil jo bujhe kabhi na jal ke
Na to hoash se taarruf, na junooN se aashnai
Yeh kahaN pahunch gaye hum teri bazm se nikal ke
Koi aiy Khumaar unko mere shair nazr karde
Jo mukhalifeen-e-mukhlis nahiN motarif ghazal ke
Har Be-Zubaan ko shola-nawa
Har baizabaN ko sho'la-nawa keh lia karo
yaro sukoot hi ko sada keh lia karo
Khud ko fareb do kay na ho talkh zindagi
har sangdil ko jaan-e-vafa keh lia karo
Yaro ye daur, zauf-e-basarat ka daur hay
Aandhi uthay to is ko ghata keh lia karo
Insan ka agar qad-o-qamat na baDh sakay
tum is ko nuqs-e-aab-o-hawa keh dia karo
Apnay liay ab aik hi raah-e-najaat hay
har zulm ko raza-e-Khuda keh lia karo
Lay day kay ab yahi hay nishan-e-zia Qateel
jab dil jalay to usko dia keh lia karo
Daagh Duniyaa ne diye, Zakhm Zamaane se mile
Kaif Bhopali
Daagh Duniyaa ne Diye, Zakhm Zamaane se mile...
Hum ko ye tohfe, tumhe dost banaane se mile...
Hum Taras`te hi, taras`te hi, taras`te hi rahe...
Vo falaane se falaane se, falaane se mile...
Khud se mil jaate to chaahat ka bharam reh jata...
Kya mile aap jo logo(n) ke milaane se mile
Kaise maane ke unhe bhool gaya tu aye "kaif"
Un ke khat aaj hume tere sar`haane se mile.
Ang`daai bhi vo lene na paaye utthaa ke haath
Nizam Rampuri
Angdaai bhi vo lene na paaye utthaa ke haath...
dekhaa mujhe to chod diye muskuraa ke haath...
Besaakta nigaahen jo aapas mein mil gayee..
kyaa mooh pe us ne rakh liye aankhen churaa ke haath
vo zaanon pe seena chupaanaa simat ke haai!
aur phir sambhaalanaa vo dupaTTaa chhudaa ke haath
denaa vo us kaa saagar-e-may yaad hai "Nizam"
mooh pher ko udhar ko idhar ko ba.Dhaa ke haath