பெற்றோர் ஆவல்

ராகம்: தேஷ்

இயற்றியவர்: பாரதிதாசன்

படம்: ஓர் இரவு (1951)

பாடியோர்: M.S. ராஜேஸ்வரி, V.J.வர்மா



துன்பம் நேர்கையில் யாழெடுத்து நீ

இன்பம் சேர்க்க மாட்டாயா? - எமக்கு

இன்பம் சேர்க்க மாட்டாயா? - நல்

அன்பிலா நெஞ்சில் தமிழில் பாடிநீ

அல்லல் நீக்க மாட்டாயா? - கண்ணே

அல்லல் நீக்க மாட்டாயா?                [துன்பம்]

 

வன்பும் எளிமையும் சூழும் நாட்டிலே

வாழ்வில் உணர்வு சேர்க்க - எம்

வாழ்வில் உணர்வு சேர்க்க - நீ

அன்றை நற்றமிழ்க் கூத்தின் முறையினால்

ஆடிக்காட்ட மாட்டாயா? - கண்ணே

ஆடிக்காட்ட மாட்டாயா?                [துன்பம்]


அறமி தென்றும் யாம் மறமி தென்றுமே

அருகி லாத போது - யாம்

அருகி லாத போது - தமிழ்

இறைவ னாரின் திருக்குறளிலே ஒருசொல்

இயம்பிக் காட்ட மாட்டாயா? - நீ

இயம்பிக் காட்ட மாட்டாயா?            [துன்பம்]

புறமி தென்றும்நல் லகமி தென்றுமே

புலவர் கண்ட நூலின் - தமிழ்ப்

புலவர் கண்ட நூலின் - நல்

திறமை காட்டிஉனை ஈன்றஎம் உயிர்ச்

செல்வம் ஆக மாட்டாயா? - தமிழ்ச்

செல்வம் ஆக மாட்டாயா?              [துன்பம்]