Dewê de mordemê beno, jü lazê xo, jü cinika xo, jü ki gaê xuyo de bor beno. Na mordem zaf pısk-sıst beno. Lazê mordemeki, mordemeki ra daha pısk, bargıra' beno.  

Sarê dewe kar gurê xo, suxra xo kenê, na mordemek ve lazê xo ra qeytan karê de xo nêkenê. Wahtê hêgau ramıtene, cıte kerdene yena  dewıci pêro cıta xo kenê. Na mordemek ve lacê xo ra cıte nêkenê. Dewıji yenê hêgaunê mordemeki ramenê. Zımıston gıra' vêreno ra, usar ki rama Xızıri rınd vorena.  Verva amnoni hekin hên ke beno ra derg ke, lesa isoni ra vêreno ra. Hekin ke benê ra derg, genım ke reseno ra ver, dewuji hekınê xo çinenê, oncenê cün çarnenê, tiğe cia, sımer cia, cünê xo danê we. Hekin u genımê na mordemeki hona hêga de payra beno.  
Dewuci yenê têarê, vanê: "bêrê pêro pia şime yerğatiye, hekin u genimê na mordemi bıçinime,  gunao, honde hekin bınê lingu de sono, genım ki nimeto, xıravo, hora ma ramıt, çinıtene ki oncia ma rê mende." Dewuji yenê mordem ra vanê, pia sonê hêgaunê mordemi (yê her dewuji horê di-re hêgaê ho beno). Yerğat cêno hêgau ra jê meley  roza nême de çinıtena hekini qedenenê. Gırzu oncenê, kenê cün cı rê çarnenê, vay danê, tiğe cia, sımer cia kenê tor, mordemek ve lazê xo Qoçi ra cün de benê. Mordemek cêreno ra lazê xo Qoçi, vano: "ero so çê maa xo ra vace, yerğat biyo vêsa', non hazır kero, yeme non weme".  

Qoç vozeno sono çê, maa xo ra vano:"daê, piyê mı vake 'gaê bori sare bırrno, soji qarme kero, yerğat yeno non weno."  

Cinıke sona gaê bori ana, sare bırrnenê, çerme kenê, gost kenê hurdi, koli kenê lozıne, lozıne gımena. Soji  kenê adır sero gostê gay kenê soji, finê hurê, beno ra sur. Na kar xeyle waht cêno. Mordemek nia dano ke lozına xo ra duma' jê dumanê papure vejino, qısawıte (merex) keno, yeno çê. Vano: "Xatun, to yerğati rê non kerd hazır?" Cüanıke vana: " Ma ga sare bırrna, kerd soji qarme, hazıro, yerğati ra vazê bero." Mordemek sas beno, vano "senê gao, senê soji qarmeo?" Cüanıke vana: "hal-mezal nia, nia..." Mordemek verê lozıne de beno, Qoç ki çêver de payra vıneto, desto jü esto kaleka xo, desto bin ki ozno ro kasa çêveri, gos dano. Mordemek pıngılê adır cêno kuno ve Qoç ra, cı nêgıneno. Qoç pıngıle ceno beno tever sono cün. Yerğati ra vano: "piyê mı vake tiğe ve sımer ra têhorte kerê, eve na pıngıley adır cıkerê bıvêsnê, rew bêrê nu' hazıro, nonê xo borê." Yerğat tiğe ve sımer ra kenê têhorte, adır kenê ver, vêsnenê. Ae de mordemek çêver ra beno tever ke çı bıvino! Cün de kıle vejiya ro osme'. Voz dano, sono cün ke hekın pêro vêso. Qoçi ra mılqi keno, Qoç remeno sono.  

Qoç sono, rastê osterê yeno. Niseno ro osteri rameno, sono rastê bostanê yeno. Oster ra yeno war, sop ra jü tersonek (mordemekê verê bostani) vırazeno, nano ro oster, oster verva bostan keno ra rast. Oster sono, kuno bostan. Qoç ki oster dıma oncino sono. Wairê bostani dota osteri saneno xir u berxu ver tersoneke sere osteri tıro keno war. Qoç vozeno yeno leyê wairê bostani perrneno ra ser vano: "Tu piyê mı kıst!" Wairê bostani vano: "mı xatırê Haq u Xızıri sane,  mı çı zona ke piyê tüyo! Qarsê mı mebe, na bostan ra xo rê çı wazena bicê so."  
Qoç bostanê mordemeki ra qawun, qarpuji, xiari lolik (fırıng), isot lovigi, kundıri cêno, oster bar keno, cêno sono. Bar beno suke de roseno, peru keno cêvê xo, sono.  

Rastê dewê yeno. A dewe de ki moro de gırs koto lulê heni. Sarê dewe ra kam ke seveta awe sono hêni, dano pede, kıseno. Qoç xevere cêno. Dewızu ra vano: "ez na mori kısen!" Sımşêr cêno, sono serê hêni de vındeno. Mor çütır ke lulê hêni ra sarê xo vezeno, Qoç sımşêr dano vıle ro, vıle çelkeno. Sarê dewe zaf benê sa. Pasaê suke Qoç ano leê xo, halete çêna xo dano Qoç, çewres roz u çewres sewi veyve keno. Zerrn u şêmu dano Qoç.  
Qoç çi-miyê xo bar keno, çêna pasay ki cêno, beno ra rast sono.  

Qoç sono peyê hawt kou de qonaxê vırazeno, tede lınge erzeno lınge ser, çêfê xo de nia dano. Xeyle waht werte ra vêreno ra. hawt bezırgani nejdiyê qonaxi ra vêrenê ra, qonaxi vinenê, vanê: "na qonax de meyman vime." Sonê qonax çê Qoçi. Qoç çêver de verva cı yeno, bezırganu beno zerre. Qatıru ki beno axure de  bar nano ru gire dano. Ciniya Qoçi bezırganu rê werd ana, werdê xo wenê, hata sewelete xecelinê. Wahtê rakotene yeno. Qoç oda meymanu de hawt cılu têververde keno ra, venga bezırganu dano, beno oda, cı ra vano: "Bıraenê, cılê mı neweê, nêvo sıma cılunê mıde riye ya ki ci (gı) bıkerê". Bezırgani vanê: "Ma thoa domanime, ça cılunê  to  

bıxerrepnime!?" Bezırgan kunê cılu, kunê ra. Sewelete de Qoç urzeno ra keska pozeno. Keno serdın, beno oda meymanu. Yê her bezırgani kundezê keska keno ro. Cêreno ra, sono kuno ra. Verva soderi bezırganu ra jüyê beno hayıg. Nia dano ke riyê verda xo u cıle. Leê xo de kuno bezırganê bini de, vano: "bıra urze mı riyê verda xo!" Uyo bin vano: " Wuyyy, mı ki riyê verda xo!" Pêro urzenê ra, kıncunê xo cênê, dızdiya qaturu, qav-qacax ca verdanê, remenê sonê. Tenê ke çê ra benê düri, Qoç dıme ra zırçeno, Vano: "Weey, ero sıma cılunê mı de riye kerda? Sıma meşêrê ke ez sıma bıkışine!" Qoç qaturu ve qav-qacaxu roseno.  

Serru ra têpia qonax de hedıria Qoçi nina, savrê xo beno teng. Qoç çê ca verdano, terkneno sono. Zaf sono, senık ke sono, rastê dewê yeno.  

Dewızu ra vano :"Ez zaf feqırıne, se viyo tenê non mıdê!" Dewıji non, cıl, ca danê Qoçi. Qoç çêfê xo dero. Dewıji nia danê ke hetê ra ki çi-miyê Dewızu tıreno. Rozê nia, dı roji nia, Dewıji endi savr nêkenê. Dorme ro bonê Qoçi cênê. Qoç çêver kılıt keno, pençeru keno tomer. Dewıji sonê lozıne ro ciyê xo kenê. Qoç na ci cêno, keno husk. Nano ro qatıre, beno rast, sono. Qoç sono rastê dalıke u hêni yeno. Qefeliao, bınê jü viale de oroşino ra. Qatıre ki ho ra düri gire dano ke boe mêro. Qoç şiya viale de sono hewn ra. Xeylê têpia bezırganê dota yeno, hetê Hindistani ra yeno, barê xo ipege Hindiyo. Yeno leê Qoçi,  qatıre leê xo de gire dano. Qoçi ra vano: "Bıra, to ça honde qatıra xo, xo ra düri gire da?"  Qoç vano: "Barê mı zaf qumaso, kuraso de hewlo, boa xo vindi mebo, coka."  Hurdemêna dalıke de, bınê viale de sonê hewn ra. Bezırgan  gıra' urzeno ra, barê xo ve barê qoçi ra vurneno, cêno, sono. Qoç bınê çımu ra nia dano. Bezırgan ke çım ra beno vindi, Qoç qumasê Hindi beno, roseno.  

Oncia kuno ra rau. Kou ser de sono, rastê koê yeno. U ko de ki hire dêvi benê. Qoç sono çê dêvu. Nonê dêvu weno, awa dêvu sımeno. Sono peê ondal de xo dano we. Sonde dêvi yenê çê ke çı bıvinê, ne awe esta, ne ki non. Dêvi zumini ra vanê : "Çê vêsaene, ma honde kou ra cêreme, xaraz cême, ison weme, nu mordemek çıxa çhêro ke zerri keno, none ma weno! "Dêvî Qoç ra tersenê. Qoç ke fam keno, peyê ondal ra vejino. Roza bine soder. Dêvi, Qoçi ra vanê: "Bıra, ma tek u tek eve dore some dere ra eve meske awe ame, ewro sıra to dera, su dere ra awe bia!"  
Qoç meske cêno sono derê awe. Meske keno pırrê awe, bese nêkeno hawe fiyo. oncia awa meske keno thol, uskore awe keno meske, meske puf keno, cêno ano verê qomê dêvu. Meske nano ro vano : "Oooxx çıxa qefeline!" Qoç meske keno xo ser de, uskirê awe sımeno. Hewa keno thol. Dêvi tersu ver miji verdanê xo. Zumini ra vanê: "Çê vêsaene, ma se keme bıkeme na mordem ra bıxeleşime!" Hortê ho de vanê: "sonde cılê Qoçi tevera keme ra, sewe lete de cıl saneme phizu ver, Qoçi kıseme; zewna ma destê ney ra nêxeleşime."  

Cılê Qoçi tevera kenê ra, Qoç sono kuno ra. Sewe letera avê Qoç cıl ra vejino, hurêndia xo de loğe keno cıl. Sono, zewna ca de kuno ra.  Hire dêvi sonê tever, cıl sanenê phizu ver hên ke cıl hencnenê.  

Soder sonê tever ke Qoç hawo cıl de rakoteo. Dêvi vanê :"Bıra to emso rehet kota ra?" Qoç vano :"Bıraenê, cılunê sıma de zaf aspız, keki, riski, estê. Esmo ez werdıne!"