sample

Hirıs u Hire Qersuni

-1-
No ko, koê Mengênio
Zereqê sodıri ke suka Vani de est,
Parçıkê de Nemrodio na ko
Fejirê sodıri ke verva Nemrodi est,
Hetê mıno ju rewa cêno, diarê Qafqasi
Hetê mıno bin cacımo, mılkê Ecemi
Sero saninê ra helquştê cemedi
Ağwe seroê gogerçinê yavani
Bêlê Ğezali
U refê Zaranci....

Çhêrêni inkar nêbena
Leza xuya juvejuye de bınnêkoti qe
Hazar serru ra nat xortê na cay
Bê ke xevere koti ra bıdime!
Ni refê suqulıngu niyê
Asmen ra komê Astaru qe niyê
Hirıs u hire zerrê eve qersuni
Hirıs u hire çhımeê gonini
Bêştiyê de na koy sero
Berr nêbenê.

Kişiyu,
Gılê koê issizi ra
Waxtê fejirê sodıri de
Gına ve mı
Ramerdayune,
Dergaderg
Wertê gon u gonaşêri de.

Ğeyalê mı
Zılamotia sewu ra tariyo
Kêsê de mı nêvejino ke
bıcerevno xêre rê,
Can u roê mı cênê koğınde
Kıtavu de nêşikinu ca keri
Serva mı şifre do pasaê
Ezo kiştu bê pers u bê berfek.

Kêwra,
Halê ma nia nia bınusne!
Tersa ke riwayet saybo
Cızıkê şênê şişi niyê
Qersunê domdomê
Fekê mınê pırtley de...

-2-
Fermanê kiştene ard hurêndi,
Mızê koyio hewz
U sızına vaê sodıria hewn u hayige
Çarnê ve gon u gonaşêri ro.
Dıma lewê made çheki sanay pê
Pıstınê ma juveju saekerdi
Ma sero qırsê nêverda.
Sala mına sura hirama Kêrmanşay
Tezbê mı u qutiya mı gureti berdi
Haleti bi mırê, têde hardê Ecemi ra..

Kêwrayime,
Xınamime
Gonia jüminime
Ma ve dewız u morebaunê boveri
Jumini ra çênêy guretê
Gundê veri ra nat,
Ciranime naver u bover pia
Mal u mulê ma kuno têwerte
Nêzonıtene ra nê,
Fıqareni rao,
Zerê ma ve Pasaporte nêvêso
Nawa qırrkerdêna marê sevet,
Endi namê ma vejino jêvegên rê
Qeçaxçiyên rê
Dızdên u xayinên rê...

Prodê ero prodê!
Ez hên rehet nêmıron!
Lozıne de tramia mına welıne,
Hona qesê zerê mı estê
Juyê de hal-zonaği rê.

Piê mı verê Urfa de çımê xo day
Hirê ki braê xo;
Hirê ternê nazıki
Hirê çivikê koy, weşiya xorê nêbiay vi sa.
Kêwray, derezay
U domanê aşirê bi têde
Diyar u meterıs u minaru ra
Verva qersuna Fransıji ke vınetêne.
Zımelê xo hona newe vejiay vi
Xalê mıno qız Nazif
Semt
Xort
U asporo de hewl

"Prodê bra! Roza cuamerdına!" vato
U vıreniya astorê xo fişta hewa.

Kêwra,
Halê ma nia nia bınusne!
Tersa ke riwayet saybo
Cızıkê şênê şişi niyê
Qersunê domdomê
Fekê mınê pırtley de.

Ahmed Arif
(Tırki ra çarnais: H. Tornêcengi)